କାମାକ୍ଷାନଗର, ୯।୬ – ଶୁଭିଲାଣି ମୌସୁମୀର ପଦଧ୍ୱନି। ଅଖିମୁଠି ଅନୁକୂଳ କରି ବର୍ଷାକୁ ଅନାଇ ରହିଛନ୍ତି ଚାଷୀ। ଏଥର ସ୍ବାଭାବିକ ବର୍ଷା ହେବ ବୋଲି ପାଣିପାଗ ବିଭାଗ ସୂତ୍ରରୁ ମିଳିଥିବା ସୂଚନା ଚାଷୀଙ୍କ ମଧ୍ୟରେ ବଢ଼ାଇଛି ଉତ୍ସାହ। ହେଲେ କାମାକ୍ଷାନଗର କୃଷି ଜିଲା ଏବେ ମୁରବି ଖୋଜୁଛି। କୃଷି ଭଳି ଗୁରୁତ୍ୱପୂର୍ଣ୍ଣ ବିଭାଗରେ ଦୀର୍ଘଦିନ ହେଲା ଖାଲିପଡ଼ିଛି କୃଷି ଜିଲା ଅଧିକାରୀ ପଦବୀ। ୩୦ରୁ ଊର୍ଦ୍ଧ୍ୱ ପଦବୀରେ କେହି ନାହାନ୍ତି। ଚାଷୀଙ୍କୁ ଠିକ୍ ସମୟରେ ଉଚିତ ପରାମର୍ଶ ମିଳୁ ନ ଥିବାରୁ ଚାଷ କାର୍ଯ୍ୟ ଗୁରୁତର ଭାବେ ପ୍ରଭାବିତ ହେବା ଆଶଙ୍କା ସୃଷ୍ଟି ହୋଇଛି।
କଥାରେ ଅଛି ‘ଚାଷ ତରତର, ବଣିଜ ମଠ।’ ଏହାକୁ ହୃଦ୍ବୋଧ କରିଛନ୍ତି କାମାକ୍ଷାନଗର କୃଷି ଜିଲାର ଚାଷୀକୂଳ। ଅକ୍ଷୟତୃତୀୟାରୁ ବିହନ ବୁଣି ମୌସୁମୀ ବର୍ଷାକୁ ଅପେକ୍ଷା କରିଛନ୍ତି ସେମାନେ। ଇତିମଧ୍ୟରେ ମୌସୁମୀ ବାୟୁ କେରଳ ଛୁଇଁଥିବାବେଳେ ରଜ ପରେ ଓଡ଼ିଶାରେ ପହଞ୍ଚତ୍ବା ପୂର୍ବାନୁମାନ କରିଛି ପାଣିପାଗ ବିଭାଗ। ହେଲେ ବିହନ ବୁଣିବା, ସାର, ପୋକ ଦମନ, କୀଟନାଶକ ପ୍ରୟୋଗ ଭଳି କାର୍ଯ୍ୟରେ ଗୁରୁତ୍ୱପୂର୍ଣ୍ଣ ପରାମର୍ଶ ଦେବାକୁ କୃଷି ବିଭାଗରେ କର୍ମଚାରୀଙ୍କ ଘୋର ଅଭାବ ଦେଖାଦେଇଛି।
କୃଷି ଜିଲାର ମୁଖ୍ୟ କାର୍ଯ୍ୟାଳୟରେ ୫ ସହକାରୀ କୃଷି ଅଧିକାରୀଙ୍କ ସ୍ଥାନରେ ୩ଜଣରେ କାମ ଚାଲିଛି। ସେମାନଙ୍କ ମଧ୍ୟରୁ ଜଣେ କୃଷି ଜିଲା ଅଧିକାରୀ ଦାୟିତ୍ୱରେ ଅଛନ୍ତି। ଦୀର୍ଘଦିନ ହେଲା ଜିଲା କୃଷି ଅଧିକାରୀ ପଦବୀ ଖାଲିପଡ଼ିଛି। ବ୍ଲକ କୃଷି ବିଭାଗରେ ମଧ୍ୟ ସମାନ ଅବସ୍ଥା ଦେଖିବାକୁ ମିଳିଛି। କାମାକ୍ଷାନଗର, ଭୁବନରେ ୨ ଜଣ ଲେଖାଏଁ ସରକାରୀ କୃଷି ଅଧିକାରୀ ଅବସ୍ଥାପିତ ଅଛନ୍ତି। ପରଜଙ୍ଗରେ ଜଣେ ଥିବାବେଳେ କଙ୍କଡ଼ାହାଡ଼ରେ କେହି ନାହାନ୍ତି। ଆବଶ୍ୟକସ୍ଥଳେ କାମାକ୍ଷାନଗର, ଭୁବନ ଏବଂ ମୁଖ୍ୟ ଦପ୍ତରରୁ ସହକାରୀ କୃଷି ଅଧିକାରୀମାନେ ଯାଇ ପରଜଙ୍ଗ, କଙ୍କଡ଼ାହାଡ଼ରେ କାର୍ଯ୍ୟ ତୁଲାଇଥାନ୍ତି। ସେହିପରି କୃଷି ଜିଲାରେ ୫୩ ଗ୍ରାମ୍ୟ କୃଷି କର୍ମଚାରୀଙ୍କ ମଧ୍ୟରୁ ୨୭ ପଦବୀ ଖାଲିପଡ଼ିଛି। କାମାକ୍ଷାନଗର ବ୍ଲକରେ ୧୩ଜଣଙ୍କ ପରିବର୍ତ୍ତେ ୬ଜଣରେ କାମ କରାଯାଉଛି। ସେହିପରି ଭୁବନରେ ୧୩ରୁ ୭, କଙ୍କଡ଼ାହାଡ଼ରେ ୧୩ରୁ ୬ ଏବଂ ପରଜଙ୍ଗରେ ୧୪ରୁ ୭ ଜଣ କର୍ମଚାରୀ କାର୍ଯ୍ୟରତ ଅଛନ୍ତି। ଜଣେ କର୍ମଚାରୀଙ୍କୁ ୨ରୁ ୩ଟି ପଞ୍ଚାୟତ ଦାୟିତ୍ୱ ଦିଆଯାଇଥିବାରୁ ଆବଶ୍ୟକ ସମୟରେ ସେମାନେ ଚାଷୀଙ୍କ ସହ ଯୋଗାଯୋଗ କରିପାରୁନାହାନ୍ତି। ଏପରି କି, ଚାଷୀମାନେ କର୍ମଚାରୀଙ୍କୁ ମଧ୍ୟ ଚିହ୍ନିପାରୁନାହାନ୍ତି।
ଏ ନେଇ ଜିଲା କୃଷି ଅଧିକାରୀ ଦାୟିତ୍ୱରେ ଥିବା ଦେବୀ ପ୍ରସାଦ ସାହୁ କୁହନ୍ତି, ଓଡ଼ିଶାର ଚାଷ ହେଉଛି ମୁଖ୍ୟ ସମ୍ବଳ। କାମାକ୍ଷାନଗର ଭଳି ବୃହତ୍ ଉପଖଣ୍ଡକୁ କୃଷି ଜିଲାର ମାନ୍ୟତା ମିଳିଥିବାବେଳେ କର୍ମଚାରୀ ମରୁଡ଼ି ଏବେ ପ୍ରମୁଖ ସମସ୍ୟା ଭାବେ ଉଭା ହୋଇଛି। ଉପରସ୍ତରରେ ନୂଆ ନିଯୁକ୍ତି ହେଉ ନ ଥିବାରୁ କର୍ମଚାରୀଙ୍କ ସଙ୍କଟ ଦେଖାଦେଉଛି। ତୃଣମୂଳସ୍ତରରେ ଯୋଜନା କାର୍ଯ୍ୟକାରୀ କରିବା ଅସମ୍ଭବ ହୋଇପଡୁଛି। ଉପରସ୍ତରରେ ଆନ୍ତରିକତା ଦେଖା ନ ଗଲେ କୃଷିକ୍ଷେତ୍ରର ଉନ୍ନତି ଅସମ୍ଭବ।