ଗଣ୍ଡତୁରୁମ, ୮।୧୨ (ଡି.ଏନ.ଏ)-
ରଏଜ୍ ସରକାର ଲୁକ୍କର ଯିବାର ଆଏବାର ସୁବିଧା ଲାଗି ରାସ୍ତାଘାଟ ତିଆର କରୁଛନ୍। ସେନ୍ତା ବସ୍ଷ୍ଟାଣ୍ଡ, ଭିନେ ଭିନେ ଗଁାଗଁଡ଼ାର ଛକେ ଗାଡ଼ିମଟର ଟାକ୍ବାକେ ଲୁକ୍କର ଲାଗି ଯାତ୍ରୀ ପ୍ରତିକ୍ଷାଳୟ ତିଆର କରୁଛନ୍। ହେଲେ କେନ୍ଠାନେ ଇ ଯାତ୍ରୀ ପ୍ରତିକ୍ଷାଳୟ ହଲ୍କା କାମ୍ ଲାଗି ବିପଦ୍ ଅବସ୍ତାରେ ରହିଛେ ତ ଆର କେନ୍ଠାନେ ବସ୍ଷ୍ଟାଣ୍ଡରୁ ଦୂରେ ତିଆର ହେଇଥିବାର ଲାଗି ଲୁକ୍କର କାମେ ନାଇଁ ଲାଗ୍ବାର। ଏନ୍ତା ଉଦାହରନ୍ ଦେଖ୍ବାକେ ମିଲିଛେ ଗୋଡ଼ଭଗା-ସୋନପୁର ୫୪ ନମ୍ବର ଜାତୀୟ ରାଜପଥରେ ଥିବାର ଅନେକ ଜାଗାର ଯାତ୍ରୀ ପ୍ରତିକ୍ଷାଳୟରେ।
ସୂଚନା ଅନ୍ସାରେ ବରଗଡ଼ ଜିଲା ଭେଡ଼େନ ବ୍ଲକ ଅଧୀନ ଗଣ୍ଡତୁରୁମ, ମହୁଲପାଲି, ମେହେନା, ଗର୍ଭଣା, ଉଦେପୁର, ଖୁଣ୍ଟୁଲିପାଲି, ଡାଲବ ଆଦି ଛକେ ଥିବାର ଯାତ୍ରୀ ପ୍ରତିକ୍ଷାଳୟମାନ ଲୁକ୍କର କାମେ ନାଇଁ ଲାଗ୍ବାର। ରାଏଜ୍ ସରକାର ଲକ୍ଷାଧିକ୍ ଟଁକା ଖରଚ୍ରେ ଲୁକ୍କର ସୁବିଧା ଲାଗି ଇ ସବୁ ଜାଗାମାନକେ ଯାତ୍ରୀ ପ୍ରତିକ୍ଷାଳୟ ସଂଗେ ପରିସ୍ରାଗାର ତିଆର କରିଛନ୍। ହେଲେ ଅନେକ ଜାଗାରେ ହଲ୍କା କାମ୍ ଲାଗି କୁଠାମାନ ବିପଦ ଅବସ୍ତାରେ ରହିଛେ। ଯେନ୍ଥିରଲାଗି ଇ ଯାତ୍ରୀ ପ୍ରତିକ୍ଷାଳୟମାନ ଲୁକ୍କର କାମେ ନାଇଁ ଲାଗ୍ବାର। ଯାତ୍ରୀମାନେ କେନ୍ ଗଛ୍ତଲେ, ଦୁକାନ୍ ତରେ ଗାଡ଼ିମଟରକେ ଟାକୁଥିବାର ଦେଖ୍ବାକେ ମିଲୁଛେ। ସେନ୍ତା ଯାତ୍ରୀ ପ୍ରତିକ୍ଷାଳୟମାନ୍କେ ବେଲବୁଡ଼ଲେ ଅସାମାଜିକ ଲୁକ୍କର ଆସର ଜମୁଛେ। ଇ ଦିଗେ ପରଶାସନ ଦୁରୁଷ୍ଟି ଦେଇ ପରତିକାର ବେବସ୍ତା କରବାକେ ସାଧାରନରେ ଦାବି ହେଉଛେ।
