ଛତ୍ରପୁର,୨୦ା୧(ଡି.ଏନ.ଏ.)-ଗଞ୍ଜାମ ଜିଲାରେ ଧାନ ମଣ୍ଡି ସବୁ ସ୍ଥାନରେ ଖୋଲି ନ ଥିବା ଏବଂ ବିଭାଗୀୟ ପଦାଧିକାରୀମାନଙ୍କ ଦ୍ୱାରା ଧାନ କିଣାରେ ଅନିୟମିତତା ହେଉଥିବା ନେଇ ଋଷିକୁଲ୍ୟା ରୟତ ମହାସଭା ପକ୍ଷରୁ ରାଜ୍ୟ ଖାଦ୍ୟ ଯୋଗାଣ ଓ ଖାଉଟି କଲ୍ୟାଣ, ସମବାୟ ମନ୍ତ୍ରୀ ରଣେନ୍ଦ୍ର ପ୍ରତାପ ସ୍ବାଇଁଙ୍କ ନିକଟରେ ଅଭିଯୋଗ ହୋଇଥିଲା ା ଏହାର ତଦନ୍ତ କରି ୭ ଦିନ ମଧ୍ୟରେ ରିପୋର୍ଟ ଦେବା ପାଇଁ ଗଞ୍ଜାମ ଜିଲାପାଳଙ୍କୁ ମନ୍ତ୍ରୀ ନିର୍ଦ୍ଦେଶ ଦେଇଥିଲେ। ଏ ସମ୍ପର୍କରେ ୬ ତାରିଖରେ ଏକ ନିର୍ଦ୍ଦେଶନାମା (ନଂ-୨୧) ଜିଲାପାଳଙ୍କୁ ଆସିଥିଲା। ଜିଲା ଯୋଗାଣ ଅଧିକାରୀ (ସିଏସ୍ଓ) ଓ ସମବାୟ ସମିତି ଉପନିବନ୍ଧକ (ଡିଆରସିଏସ୍)ଙ୍କୁ ଏହାର ତଦନ୍ତ ଋଷିକୁଲ୍ୟା ରୟତ ମହାସଭା ସମ୍ପାଦକ ସୀମାଞ୍ଚଳ ନାହାକ ଓ ଧାନ ସଂଗ୍ରହ ଦାୟିତ୍ୱରେ ଥିବା ଅଧିକାରୀଙ୍କ ଉପସ୍ଥିତିରେ କରିବାକୁ ମନ୍ତ୍ରୀ ନିର୍ଦ୍ଦେଶ ଦେଇଥିଲେ। ଅପରପକ୍ଷରେ ୧୩ ଦିନ ପରେ ମଧ୍ୟ ଯୋଗାଣ ମନ୍ତ୍ରୀଙ୍କ ନିର୍ଦ୍ଦେଶକୁ କାର୍ଯ୍ୟକାରୀ କରାଯାଇନି। ଏନେଇ ଋଷିକୁଲ୍ୟା ରୟତ ମହାସଭା ସମ୍ପାଦକ ନାହାକ ରବିବାର ତୀବ୍ର ପ୍ରତିକ୍ରିୟା ପ୍ରକାଶ କରିଛନ୍ତି ା ମନ୍ତ୍ରୀଙ୍କ ନିର୍ଦ୍ଦେଶକୁ କାର୍ଯ୍ୟକାରୀ କରା ନ ଯିବା ଅତ୍ୟନ୍ତ ଦୁର୍ଭାଗ୍ୟଜନକ ବୋଲି ସମ୍ପାଦକ ନାହାକ ଏକ ପ୍ରେସ୍ ବିବୃତିରେ କହିଛନ୍ତିି ା ଜିଲାରେ ନଭେମ୍ବର ୧୫ ତାରିଖରୁ ଚାଷୀଙ୍କ ଠାରୁ ଧାନ କିଣା ଆରମ୍ଭ ହୋଇଥିଲା। ମାତ୍ର ଜିଲାର ସମସ୍ତ ସ୍ଥାନରେ ଧାନ ମଣ୍ଡି ଖୋଲିନି ା ଫଳରେ କି ମଧ୍ୟସ୍ଥମାନଙ୍କ ଜରିଆରେ ସରକାରୀ ନିର୍ଦ୍ଧାରିତ ଦରଠାରୁ କମ୍ରେ ଚାଷୀ ବିକ୍ରି କରିବାକୁ ବାଧ୍ୟ ହେଉଥିବା, ଧାନ ଆନ୍ଧ୍ର ଯାଉଥିବା ଏବଂ କିଣାରେ ଅନିୟମିତତା ହେଉଥିବା ନେଇ ଋଷିକୁଲ୍ୟା ରୟତ ମହାସଭା ପକ୍ଷରୁ ଯୋଗାଣ ମନ୍ତ୍ରୀଙ୍କୁ ୬ ତାରିଖରେ ଭେଟି ଲିଖିତ ଅଭିଯୋଗ କରାଯାଇଥିଲା ା ଏହାପରେ ତଦନ୍ତ କରି ରିପୋର୍ଟ ଦେବାକୁ ଯୋଗାଣ ମନ୍ତ୍ରୀ ନିର୍ଦ୍ଦେଶ ଦେଇଥିଲେ। ଏ ସମ୍ପର୍କରେ ୯ ତାରିଖରେ ଏକ ଖବର ଧରିତ୍ରୀରେ ପ୍ରକାଶ ପାଇଥିଲା ା ଏଥିସହ ୬ ତାରିଖରେ ଖୋଲିନି ସମସ୍ତ ମଣ୍ଡି, ଆନ୍ଧ୍ର ଯାଉଛି ଧାନ’ ଶୀଷର୍କ ଏକ ଖବର ଫଟୋ ସହ ଧରିତ୍ରୀରେ ମଧ୍ୟ ପ୍ରକାଶ ପାଇଥିଲା ା ଟୋକେନ୍ ଆସିବାରେ ବିଳମ୍ବ ହେଉଥିବାରୁ ଧାନ କିଣା ଯାଉ ନ ଥିବା, ୭୭ କି.ଗ୍ରା. ଧାନକୁ ୧୦୫୦ ଟଙ୍କାରେ ବିକ୍ରିକରି ଚାଷୀ କ୍ଷତି ସହୁଥିବା, ଦୈନିକ ସୋସାଇଟି ପକ୍ଷରୁ ଧାନ କିଣାଯାଉ ନ ଥିବା, ଏମ୍ଆଇ ଓ ମିଲର୍ମାନଙ୍କ ମଧ୍ୟରେ ମଧୁଚନ୍ଦ୍ରିକା ଯୋଗୁ କୁଇଣ୍ଟାଲ ଧାନରେ ୫ କି.ଗ୍ରା. ଅଧିକା ନିଆଯାଉଥିବା, ଅଖା ଓ ଗାଡି ଖର୍ଚ୍ଚ ଚାଷୀମାନଙ୍କୁ ଦିଆଯାଉ ନ ଥିବା ନେଇ ଋଷିକୁଲ୍ୟା ରୟତ ମହାସଭା ପକ୍ଷରୁ ଜିଲାପାଳଙ୍କ ନିକଟରେ ଅଭିଯୋଗ ହୋଇଥିଲା ା ଏହାପରେ କୌଣସି ପଦକ୍ଷେପ ନ ନିଆଯିବାରୁ ମହାସଭାର ଏକ ପ୍ରତିନିଧି ଦଳ ଭୁବନେଶ୍ୱର ଯାଇ ଯୋଗାଣ ମନ୍ତ୍ରୀଙ୍କୁ ଭେଟି ଏହି ଅଭିଯୋଗ କରାଯାଇଥିଲା ା