ଚମ୍ପୁଆ,୨୫ା୭(ଡି.ଏନ.ଏ.)-ଚମ୍ପୁଆ ବସଷ୍ଟାଣ୍ଡ ନିକଟରେ ଏନଏସି ପକ୍ଷରୁ ନିର୍ମାଣ କରାଯାଇଥିବା ଡ୍ରେନ ମାସେ ନପୁରୁଣ ଧସିଯାଇଥିବା ଦେଖିବାକୁ ମିଳିଛି। ଫଳରେ କାର୍ଯ୍ୟର ସ୍ଥାୟୀତ୍ୱ ନେଇ ପ୍ରଶ୍ନବାଚୀ ସୃଷ୍ଟି ହୋଇଛି। ଚମ୍ପୁଆ ସବଜେଲ ଠାରୁ ନବନିର୍ମିତ ଆହାର କେନ୍ଦ୍ର ପର୍ଯ୍ୟନ୍ତ କିଛିଦନ ହେବ ବର୍ଷାଜଳ ନିଷ୍କାସନ ପାଇଁ ଚମ୍ପୁଆ ବସ୍ଷ୍ଟାଣ୍ଡ ପର୍ଯ୍ୟନ୍ତ ବିନା ସୂଚନା ଫଳକରେ ଏକ ଡ୍ରେନ ନିର୍ମାଣ କରାଯାଇଥିଲା। ମାତ୍ର ନିର୍ମାଣ କାର୍ଯ୍ୟ ନସରୁଣୁ ଅସରାଏ ବର୍ଷାରେ ଗତ ବୁଧବାର ସନ୍ଧ୍ୟାରେ ଡ୍ରେନଟିର ସମ୍ମୁଖ ଭାଗ ଭୁଶୁଡ଼ି ପଡିଛି। ସୂଚନା ଅନୁସାରେ ୩ଲକ୍ଷ ୮୫ହଜାର୮୮୮ ଟଙ୍କା ବ୍ୟୟ ଅଟକଳରେ ଉକ୍ତ ଡ୍ରେନଟି ନିର୍ମାଣାଧୀନ ରହିଛି। ଏସମ୍ପର୍କରେ ବିଭାଗୀୟ କନିଷ୍ଠ ଯନ୍ତ୍ରୀ ସୁଶିଲ କୁମାର ମୁର୍ମୁଙ୍କୁ ପଚାରିବାରୁ ନୂଆମାଟି ପଡିଥିବାରୁ ଡ୍ରେନର ୮ରୁ ୯ଫୁଟ ଭାଙ୍ଗି ପଡିଛି। ତୁରନ୍ତ ଏହାର ମରାମତି କରିବାକୁ ସମ୍ପୃକ୍ତ ଠିକାଦାରଙ୍କୁ ନିର୍ଦ୍ଦେଶ ଦିଆଯିବା ପରେ ଠିକାଦାର କାର୍ଯ୍ୟ ଆରମ୍ଭ କରିଛି। ସୂଚନା ଯୋଗ୍ୟକି ଏନଏସିର ବହୁଉନ୍ନୟନ କାର୍ଯ୍ୟରେ ବିନା ସୂଚନା ଫଳକରେ କାର୍ଯ୍ୟ ହେଉଥିବାବେଳେ ବିଭାଗୀୟ ଅଧିକାରୀମାନେ କାର୍ଯ୍ୟର ଉପଯୁକ୍ତ ତଦାରଖ କରୁ ନ ଥିବା ଅଭିଯୋଗ ହେଉଛି।