କୋଲକାତା,୧୪।୭- ଦୁଇ ଥର ଆଇପିଏଲ ଚାମ୍ପିୟନ କୋଲକାତା ନାଇଟ ରାଇଡର୍ସ (କେକେଆର) ମୁଖ୍ୟ କୋଚ୍ ଜ୍ୟାକ୍ସ କାଲିସ ଓ ଆସିଷ୍ଟାଣ୍ଟ କୋଚ୍ ସାଇମନ କ୍ୟାଟିଚଙ୍କ ସହ ସମ୍ପର୍କ ଛିନ୍ନ କରିଛି। ଏ ନେଇ ଫ୍ରାଞ୍ଚାଇଜ ପକ୍ଷରୁ ରବିବାର ଘୋଷଣା କରାଯାଇଛି। କୋଚ ଷ୍ଟାଫଙ୍କ ସ୍ଥାନରେ କାହାକୁ ନିଯୁକ୍ତ କରାଯିବ, ତାହା ସ୍ପଷ୍ଟ କରାଯାଇ ନାହିଁ। କେକେଆର ସିଇଓ ଭେଙ୍କି ମ୍ୟାଇସୋର କହିଛନ୍ତି, କାଲିସ କେକେଆର ପରିବାରର ସଦସ୍ୟ। ଭବିଷ୍ୟତରେ କାଲିସ ଆମ ଯୋଜନାର ଅଂଶ ହୋଇପାରନ୍ତି। କୋଲକାତା ଫ୍ରାଞ୍ଚାଇଜ ସହ କାଲିସ ୯ ବର୍ଷ ଧରି ଜଡ଼ିତ ରହିଥିଲେ। ପ୍ରଥମେ ଜଣେ ଖେଳାଳି, ମେଣ୍ଟର ଓ ପରେ ଦଳର କୋଚ ଭାବେ କାର୍ଯ୍ୟ କରିଥିଲେ। ସେ ୨୦୧୫ ଅକ୍ଟୋବରରେ କୋଚ୍ ଦାୟିତ୍ୱ ସମ୍ଭାଳିଥିଲେ। ତାଙ୍କ ତତ୍ତ୍ୱାବଧାନରେ କେକେଆର ୬୧ ମ୍ୟାଚ୍ ଖେଳି ୩୨ ବିଜୟ ହାସଲ କରିଛି। କ୍ରମାଗତ ୩ ଥର ପ୍ଲେ ଅପ୍ସ ଖେଳିଥିଲା। ହେଲେ ୨୦୧୯ ସଂସ୍କରଣରେ ଦଳ ବିଫଳ ହୋଇଥିଲା। ୨୦୧୧ଠାରୁ ୯ ବର୍ଷ ପର୍ଯ୍ୟନ୍ତ ଜଣେ ଖେଳାଳି, ମେଣ୍ଟର ଓ ମୁଖ୍ୟ କୋଚ୍ ଭାବେ ଦାୟିତ୍ୱ ସମ୍ଭାଳିବା ପରେ କିଛି ନୂଆ କରିବାକୁ ଚାହେଁ ବୋଲି କାଲିସ କହିଛନ୍ତି।