ପାଟଣା,୨।୬(ସ୍ବ.ପ୍ର.): କାଳବୈଶାଖୀ ତାଣ୍ଡବରେ ସୋମବାର ଅପରାହ୍ନରେ କେନ୍ଦୁଝର ଜିଲା ପାଟଣା ଅଞ୍ଚଳରେ ବହୁ କ୍ଷତି ଘଟିଛି। ଏଠାରେ ଘଡ଼ଘଡ଼ି ସାଙ୍ଗୁ ବର୍ଷା ପବନରେ ବଡ଼ ବଡ଼ ଗଛ ଭାଙ୍ଗିଯାଇ ବିଦ୍ୟୁତ ସରବରାହ ମଧ୍ୟ ବ୍ୟାହତ ହୋଇଛି। ଗଛ ଭାଙ୍ଗି ରାସ୍ତା ଅବରୋଧ ହେବାରୁ ଯାତାୟତରେ ବାଧା ସୃଷ୍ଟି ହୋଇଥିଲା। ଖବରପାଇ ଘଟଣାସ୍ଥଳରେ ପାଟଣା ବିଧାୟକ ଜଗନ୍ନାଥ ନାଏକ ପହଞ୍ଚି ପାଟଣା ଅଗ୍ନିଶମ କର୍ମଚାରୀଙ୍କୁ ଡକାଇ ଗଛ କଟାଇବା ସହ ରାସ୍ତା ସଫା କରାଇଥିଲେ।
ପାଟଣା ମୁଖ୍ୟାଳୟ ଥାନା ନିକଟରେ ଏକ ନିମ୍ବ ଓ ଆମ୍ବ ଗଛ ଏବଂ ପାଟଣା କେନ୍ଦେଇପଶି ଆରଡ଼ି ରାସ୍ତାର ଟାଙ୍ଗରପଡ଼ା ଅବକାରୀ ଥାନା ନିକଟରେ ଏକ ଆକାଶିଆ ଗଛ ଭାଙ୍ଗି ରାସ୍ତା ଉପରେ ପଡି ରହିବାରୁ ଗମନାଗମନ ବାଧାପ୍ରାପ୍ତ ହୋଇଥିଲା। ବିଧାୟକଙ୍କ ଉପସ୍ଥିତିରେ ଅଗ୍ନିଶମ କର୍ମଚାରୀ ଗଛ କାଟି ରାସ୍ତା ସଫା କରିଥିଲେ।