ପବିତ୍ରନଗର/କଣିହାଁ, ୪ା୬(ଡି.ଏନ.ଏ.)
ଅନୁଗୋଳ ଜିଲା କଣିହାଁ ବ୍ଲକରେ ଗତ ଗୁରୁବାର ଓ ଶୁକ୍ରବାର କାଳବୈଶାଖୀ ଯୋଗୁ ବ୍ୟାପକ କ୍ଷୟକ୍ଷତି ଘଟିଛି। ସୋମବାର ପାଲଲହଡ଼ା ବିଧାୟକ ମୁକେଶ ପାଲ ବିଭିନ୍ନ ଗ୍ରାମକୁ ଯାଇ କ୍ଷତିଗ୍ରସ୍ତଙ୍କୁ ଭେଟିଛନ୍ତି। ବିଧାୟକ ପ୍ରଥମେ ବୁରୁକୁନା ପଞ୍ଚାୟତର ଶରଧାପୁର ଗ୍ରାମରେ କନକେଶ୍ୱରୀ ପୀଠକୁ ଯାଇ ମା’ଙ୍କ ଦର୍ଶନ କରିଥିଲେ। ପରେ ଝୁଲାଖୁଣ୍ଟିଆ ଗ୍ରାମରେ ମା’ ମଙ୍ଗଳାକୁ ଦର୍ଶନ କରି ଅଞ୍ଚଳର କ୍ଷତିଗ୍ରସ୍ତଙ୍କୁ ଭେଟିଥିଲେ। କ୍ଷତିଗ୍ରସ୍ତ ହରିଜନସାହିର ଲୋକଙ୍କ ସହ କ୍ଷୟକ୍ଷତି ନେଇ ଆଲୋଚନା କରିଥିଲେ। ପରେ ମହୀଧରପୁର, ବୁରୁକୁନା ଗ୍ରାମକୁ ଯାଇଥିଲେ। ବିଧାୟକ ପାଲ ରାଜସ୍ବ ବିଭାଗ ଅଧିକାରଙ୍କୁ ଯୋଗାଯୋଗ କରି ତୁରନ୍ତ ସହାୟତା ପ୍ରଦାନ କରିବାକୁ ନିର୍ଦ୍ଦେଶ ଦେଇଥିବା ଜଣାପଡିଛି। ସେହିପରି କଣିହାଁ ବ୍ଲକ ହନୁମାନପୁର ପଞ୍ଚାୟତ ଖଜୁରିଆ ଗ୍ରାମର ତେଲୁ ସାହୁଙ୍କ ଘର ଉପରେ ଶୁକ୍ରବାର ସନ୍ଧ୍ୟାରେ ଗଛ ପଡିବାରୁ ସ୍ତ୍ରୀ ଚଞ୍ଚଳା ସାହୁଙ୍କ ମୃତ୍ୟୁ ଘଟିଥିଲା। ବିଧାୟକ ପାଲ, କଣିହାଁ ବିଡିଓ ରମେଶ ଜେନା ପ୍ରମୁଖ ମୃତକଙ୍କ ପରିବାରକୁ ଭେଟିଥିଲେ। ତାଙ୍କୁ ସମବେଦନା ଜଣାଇବା ସହ ଖୁବଶୀଘ୍ର ସରକାରୀ ସହାୟତା ପ୍ରଦାନ କରାଯିବାକୁ ପ୍ରତିଶ୍ରୁତି ଦେଇଥିଲେ। ଏଥିସହ କେତେଜଣ ସାମାଜିକ କର୍ମୀ ଓ ବିଜୁ ଯୁବ ବାହିନୀ ସଦସ୍ୟ ତାଙ୍କ ଘର ଉପରୁ ଗଛ ହଟାଇଥିବା ଜଣାପଡିଛି। ବିଧାୟକଙ୍କ ଏହି ପରିଦର୍ଶନ ବେଳେ କଣିହାଁ ବ୍ଲକ ବିଜେଡି ସଭାପତି କୈଳାସ ଚନ୍ଦ୍ର ସାହୁ, ପୂର୍ବତନ ସମିତି ସଭ୍ୟ ଯୁଗଳ କିଶୋର ସାହୁ, ବିଜେଡି କର୍ମୀ ସୁବାସ ମହାନ୍ତି, ଦୁର୍ଯ୍ୟୋଧନ ସାହୁ, ନୃସିଂହ ଚରଣ ପ୍ରଧାନ ପ୍ରମୁଖ ଉପସ୍ଥିତ ଥିଲେ।