ଯୋଡ଼ା, ୨୮।୪(ଡି.ଏନ.ଏ.)-କାଳବୈଶାଖୀ ପ୍ରଭାବରେ କେନ୍ଦୁଝର ଜିଲା ଯୋଡା ବ୍ଲକ ଚମକପୁର ପଞ୍ଚାୟତର ବିଭିନ୍ନ ଗ୍ରାମରେ ବ୍ୟାପକ କ୍ଷୟକ୍ଷତି ହୋଇଛି। କୌଣସି ସରକାରୀ ସହାୟତା ମିଳୁ ନ ଥିବା ଲୋକେ ଅଭିଯୋଗ କରିଛନ୍ତି। ଏହାର ପ୍ରତିବାଦ କରି କ୍ଷତିଗ୍ରସ୍ତ ହୋଇଥିବା ଲୋକେ ମଙ୍ଗଳବାର ପଞ୍ଚାୟତ କାର୍ଯ୍ୟାଳୟରେ ପହଞ୍ଚି ସରକାରୀ ସହାୟତା ଯୋଗାଇ ଦେବାକୁ ଦାବି କରିଛନ୍ତି।
ଗତ ୨୪ତାରିଖରେ କାଳବୈଶାଖୀ ଯୋଗୁ ରେଭେନ୍ସାପୁର(କ), ରେଭେନ୍ସାପୁର(ଖ), ଶଙ୍କରପୁର, ଧୋବାକୁଚୁଡା, ଚମକପୁର, ରୁଗୁଡି, ଆଖଡାପଦ, ମୁର୍ସୁଆଁ ଆଦି ଗ୍ରାମର ପ୍ରାୟ ୬୫୦ରୁ ଊର୍ଦ୍ଧ୍ୱ ଲୋକଙ୍କର ଘର ଭାଙ୍ଗିଯାଇଥିଲା। ସେମାନଙ୍କୁ ପ୍ରାଥମିକ ସ୍ତରରେ ତାର୍ପୋଲିନ୍ ପାଲ ଯୋଗାଇ ଦେବା ପାଇଁ ନିୟମ ରହିଥିଲେ ହେଁ କ୍ଷତିଗ୍ରସ୍ତ ଗ୍ରାମବାସୀଙ୍କୁ ତାହା ଦିଆଯାଇ ନ ଥିବା ରେଭେନ୍ସାପୁର (କ) ଗ୍ରାମର ଜଗନ୍ନାଥ ତିରିଆ ଅଭିଯୋଗ କରିଛନ୍ତି। ସେହିପରି କ୍ଷତିଗ୍ରସ୍ତ ଗ୍ରାମବାସୀ ପ୍ରଶାନ୍ତ ବାରିକ, ଦିଲୀପ ମହାକୁଡ, ଜୟ ମୁଣ୍ଡା, ଯୋଗେନ୍ଦ୍ର ମୁଣ୍ଡା ମଧ୍ୟ ଅନୁରୂପ ଅଭିଯୋଗ କରି କହିଛନ୍ତି ଯେ , କାଳବୈଶାଖୀ ପରେ ସେମାନଙ୍କର ଘର ଭାଙ୍ଗି ପଡିଥିଲେ ହେଁ, ଏହାର ତଥ୍ୟ ସଂଗ୍ରହ ପାଇଁ କେହି ଅଧିକାରୀ ଆସି ନାହାନ୍ତି। ସେମାନେ ଏକାଠି ହୋଇ ସରପଞ୍ଚ ଓ ରାଜସ୍ବ ନିରୀକ୍ଷକଙ୍କଠାରେ ଅଭିଯୋଗ କରିବା ପରେ ମଧ୍ୟ ସେମାନଙ୍କର ତାଲିକା କରାଯାଇ ନ ଥିବା ଅଭିଯୋଗ କରିଛନ୍ତି। ଏ ସମ୍ପର୍କରେ ଚମକପୁର ରାଜସ୍ବ ନିରୀକ୍ଷକ ପ୍ରକାଶ ପ୍ରଧାନ ତାଙ୍କ ପ୍ରତିକ୍ରିୟାରେ କହିଛନ୍ତି ଯେ, ଉକ୍ତ ପଞ୍ଚାୟତରେ ପ୍ରାୟ ୬୬୪ ଜଣଙ୍କର ଅଳ୍ପ ବହୁତ କ୍ଷୟକ୍ଷତି ହୋଇଥିବା ତାଲିକା ବଡବିଲ୍ ତହସିଲଦାରଙ୍କୁ ସେ ପ୍ରଦାନ କରିଛନ୍ତି। ଏହି ତାଲିକା କେନ୍ଦୁଝର ଜିଲାପାଳଙ୍କଠାରେ ଦାଖଲ ହେବା ପରେ ଜିଲାପାଳଙ୍କ ପକ୍ଷରୁ ସରକାରୀ ସହାୟତା ରାଶି ମଞ୍ଜୁର ହେଲେ କ୍ଷତିଗ୍ରସ୍ତ ହୋଇଥିବା ଲୋକଙ୍କ ବ୍ୟାଙ୍କ ଆକାଉଣ୍ଟରେ ସହାୟତା ରାଶି ପ୍ରଦାନ କରାଯିବ। ଇତିମଧ୍ୟରେ ୫୭ଜଣଙ୍କୁ ତାର୍ପୋଲିନ୍ ପାଲ ପ୍ରଦାନ କରାଯାଇଛି ା