ବ୍ରହ୍ମପୁର ଅଫିସ,୩ା୬-ଗଞ୍ଜାମ ଜିଲାରେ ରବିବାର କାଳବୈଶାଖୀ ହୋଇଛି। ଏହାର ପ୍ରଭାବରେ ସନ୍ଧ୍ୟାରେ ବ୍ରହ୍ମପୁର ସମେତ ଏହାର ଉପକୂଳ ଅଞ୍ଚଳ, ଏବଂ ଜିଲାର ବିିଭିନ୍ନ ସ୍ଥାନରେ ଘଡଘଡି ସହ ପ୍ରବଳ ବର୍ଷା ହୋଇଛି। ଫଳରେ ଦୀର୍ଘ ଦିନର ତାତିରୁ ସହରବାସୀ ତ୍ରାହି ପାଇଛନ୍ତି।
ଦୁଇମାସ ଧରି ସାରା ରାଜ୍ୟରେ ଗ୍ରୀଷ୍ମ ପ୍ରବାହ ଜାରି ରହିଥିଲା। ଏଥିରୁ ବାଦ ପଡି ନ ଥିଲା ରେଶମ ସହର ବ୍ରହ୍ମପୁର। ପ୍ରଚଣ୍ଡ ଖରା ଯୋଗୁ ତାତି, ଗୁଳୁଗୁଳି ଜନଜୀବନକୁ ଅସ୍ତବ୍ୟସ୍ତ କରିଥିଲାା ଦିନସାରା ପ୍ରଚଣ୍ଡ ଖରା ଯୋଗୁ ବାହାରକୁ ବାହାରିବା ସହରବାସୀଙ୍କ ପାଇଁ ଏକ ପ୍ରକାର ଅସମ୍ଭବ ହୋଇଥିଲା। ରବିବାର ସନ୍ଧ୍ୟାରେ ବ୍ରହ୍ମପୁରରେ କାଳବୈଶାଖୀ ଓ ଘଡ ଘଡି ସହ ବର୍ଷା ହୋଇଛି।
ଗୋପାଳପୁର ପାଣିପାଗ କେନ୍ଦ୍ର ପକ୍ଷରୁ ମିଳିଥିବା ସୂଚନା ପ୍ରକାରେ, କାଳବୈଶାଖୀ ଆରମ୍ଭ ହୋଇଥିବାରୁ ଏଣିକି ତାପମାତ୍ରା ହ୍ରାସ ପାଇବା ସହ ତାତିରୁ ତ୍ରାହି ମିଳିବ। ତେବେ ଦିନରେ ଖରା ଜାରି ରହିବ। କିନ୍ତୁ ଅପରାହ୍ନରେ କାଳବୈଶାଖୀ ପ୍ରଭାବରେ ଦୁଇରୁ ତିନି ଦିନ ପର୍ଯ୍ୟନ୍ତ ଗଞ୍ଜାମ ଜିଲାର ବିଭିନ୍ନ ସ୍ଥାନରେ ଘଡ ଘଡି ସହ ବର୍ଷା ହେବ। ଏହି ସମୟରେ ୪୦ ରୁ ୪୫ କିମି ବେଗରେ ପବନ ବହିବ ବୋଲି କେନ୍ଦ୍ର ଇନ୍ଚାର୍ଜ ଉମାଶଙ୍କର ସାହୁ ସୂଚନା ଦେଇଛନ୍ତି। କାଳବୈଶାଖୀ ପରେ ଆସନ୍ତା ୧୪ ରୁ ୧୫ ତାରିଖ ମଧ୍ୟରେ ମୌସୁମୀ ଓଡିଶା ଉପକୂଳ ଛୁଇଁବାର ସମ୍ଭାବନା ରହିଛି। ତେଣୁ ଚଳିତ ମାସରୁ ଗ୍ରୀଷ୍ମ ତଥା ତାତିର ପ୍ରଭାବ ସମ୍ପୂର୍ଣ୍ଣ ହ୍ରାସ ପାଇପାରେ ବୋଲି ସେ ସୂଚାଇଛନ୍ତି।
