ମନମୁଣ୍ଡା,୨୫।୪(ଡି.ଏନ.ଏ.): ବୌଦ୍ଧ ଜିଲା କଣ୍ଟାମାଳ ବ୍ଲକ ଯୋଗୀନ୍ଦ୍ରପୁର ପଞ୍ଚାୟତର ଏକାଧିକ ଗ୍ରାମ କାଳବୈଶାଖୀ ପ୍ରଭାବରେ ବ୍ୟାପକ କ୍ଷତିଗସ୍ତ ହୋଇଛି। ଶୁକ୍ରବାର ସନ୍ଧ୍ୟାରେ କାଳବୈଶାଖୀ ସହ ପ୍ରବଳ ବର୍ଷା ହୋଇଥିଲା। ଡିମିରିମୁଣ୍ଡାର ଗଣେଶ୍ୱର କହଁର, କୃଷ୍ଣ କହଁର, ମନବୋଧ କହଁର, ଚିତ୍ତରଞ୍ଜନ ପ୍ରଧାନ, ସଦାନନ୍ଦପୁରର ସୁମନ୍ତ ମେହେର, ନବୀନ ମେହେର, ରବିନାରାୟଣ ସ୍ବାଇଁ, ଶ୍ରୀବନ୍ତ ସ୍ବାଇଁ, ଦଶରଥ ମେହେର, ପ୍ରଦୀପ ପ୍ରଧାନ, ମୀନ କୁଦେଇ ଏବଂ ରାବିଡି ଗ୍ରାମର ହୃଷୀକେଶ ମିଶ୍ରଙ୍କ ସମେତ ବହୁ ଲୋକଙ୍କ ଘର ଛପର ଉଡ଼ିଯାଉଛି। କେତେକ ମାଟି ଘର ଭାଙ୍ଗି ଚୁରମାର ହୋଇଯାଇଛି। ଏହି ପରିବାର ସଦସ୍ୟମାନେ ବାସହରା ହୋଇପଡିଥିବା ସ୍ଥାନୀୟ ସରପଞ୍ଚ ବିଦ୍ୟାଧର ମହାକୁଡ କହିଛନ୍ତି। ରାବିଡିର ହୃଷିକେଶ ମିଶ୍ରଙ୍କ ଘରର ବ୍ୟାପକ କ୍ଷତି ଘଟିଛି । ତାଙ୍କ ଘର ଛପର ସମ୍ପୂର୍ଣ୍ଣ ଉଡ଼ି ଯାଇଛି । ବର୍ଷାରେ ସମସ୍ତ ଖାଦ୍ୟ ପଦାର୍ଥ, ଚାଉଳ, ଆସବାବପତ୍ର ନଷ୍ଟ ହୋଇଯାଇଛି । ତଥାପି ପରିବାର ସଦସ୍ୟମାନେ ଏହି ବିପଦରୁ ରକ୍ଷା ପାଇଯାଇଛନ୍ତି। ସରପଞ୍ଚ ମହାକୁଡ, ସାମାଜିକ କର୍ମୀ ପ୍ରହଲ୍ଲାଦ ଭୋଇ ପରିସ୍ଥିତି ଅନୁଧ୍ୟାନ କରିବା ସହିତ ସହଯୋଗର ହାତ ବଢାଇଛନ୍ତି। ପରା ଆରଆଇ ସର୍କଲ କର୍ମଚାରୀ ଘଟଣାସ୍ଥଳ ପରିଦର୍ଶନ କରିଛନ୍ତି । ଅଦ୍ୟାବଧି ସେମାନଙ୍କୁ ପ୍ରଶାସନ ତରଫରୁ କୌଣସି ସହାୟତା ପ୍ରଦାନ କରାଯାଇନାହିଁ। କରୋନା ମହାମାରୀ ତଥା ଲକ୍ଡାଉନ ସମୟରେ ଏହି ପ୍ରାକୃତିକ ଦୁର୍ବିପାକ ଗ୍ରାମବାସୀଙ୍କ ପାଇଁ ଚିନ୍ତାର କାରଣ ହୋଇଛି।