ହିଞ୍ଜିଳିକାଟୁ,୧ା୫(ଡି.ଏନ୍.ଏ.)- ହିଞ୍ଜିଳିକାଟୁ ଓ ଆଖପାଖରେ ଶୁକ୍ରବାର ଅପରାହ୍ନ ପ୍ରାୟ ୩ଟାରେ କାଳବୈଶାଖୀ ପ୍ରଭାବରେ ପ୍ରବଳ ବର୍ଷାପବନ ସହ ବଜ୍ରପାତ ହୋଇଛି। ବିଭିନ୍ନ ସ୍ଥାନରେ ବହୁ ଛୋଟବଡ ଗଛ ଭାଙ୍ଗିବା ସହ ବିଦ୍ୟୁତ୍ ସରବରାହ ବ୍ୟାହତ ହୋଇଛି। ପ୍ରାୟ ୮ କୋଟି ଟଙ୍କାରେ ନିର୍ମିତ ଇନ୍ଡ଼ୋର ଷ୍ଟାଡ଼ିୟମ ମୁଖ୍ୟ ବିଲ୍ଡିଂ ଗ୍ଲାସଓ୍ବାଲ୍ ଓ ଟାଇଲ ଉଡ଼ିଯାଇଛି। ପ୍ରକାଶ ଥାଉକି, ଏହି ଇନ୍ଡ଼ୋର ଷ୍ଟାଡ଼ିୟମ ନିର୍ମାଣ ସମାପ୍ତ ହୋଇ ମୁଖ୍ୟମନ୍ତ୍ରୀଙ୍କ ଦ୍ୱାରା ଉଦ୍ଘାଟନ ହେବାର ଥିଲା। ବୃନ୍ଦାବନ ବିଦ୍ୟାପୀଠ ମିନିଷ୍ଟାଡ଼ିୟମରେ କରୋନା ପାଇଁ ନିର୍ମାଣ ହୋଇଥିବା ଅସ୍ଥାୟୀ ପରିବା ହୋଲ୍ସେଲ ବଜାରରେ ପବନ ମାଡ଼ ହୋଇ ବ୍ୟବସାୟୀଙ୍କ ବହୁ କ୍ଷତି ଘଟିଛି। ପୌରାଞ୍ଚଳ ଜାତୀୟ ରାଜପଥ ନଂ.୫୯ କଡ଼ରେ ୩ସ୍ଥାନରେ ଗଛ ଭାଙ୍ଗି ପଡିଛି।