ଭୁବନେଶ୍ୱର,୬।୧୨(ବ୍ୟୁରୋ): କେନ୍ଦ୍ର ସରକାରଙ୍କ ପିଏମ୍ କିଷାନ ଯୋଜନା ସହ ରାଜ୍ୟ ସରକାରଙ୍କ କାଳିଆ ଯୋଜନା ମିଶିପାରିବ ନାହିଁ। ରାଜ୍ୟ ଭାଜପା ପକ୍ଷରୁ ଶୁକ୍ରବାର ଆୟୋଜିତ ଖବରଦାତା ସମ୍ମିଳନୀରେ ଭାଜପା ନେତା ସମୀର ମହାନ୍ତି ଏବଂ ଗୋଲକ ମହାପାତ୍ର ଏହା କହିଛନ୍ତି।
ସେମାନେ କହିଛନ୍ତି, କାଳିଆ ହେଉଛି ରାଜ୍ୟ ଯୋଜନା। ପିଏମ୍ କିଷାନ କେନ୍ଦ୍ର ସରକାରଙ୍କ ଯୋଜନା। ପିଏମ୍ କିଷାନ ସହ କାଳିଆ ଯୋଜନା ମିଶିପାରିବ ନାହିଁ। ରାଜ୍ୟ ସରକାର ଚାଷୀଙ୍କୁ ପ୍ରତାରିତ କରିଛନ୍ତି। ଭୁଆଁ ବୁଲାଇଛନ୍ତି। କାଳିଆ ଯୋଜନାରେ କେତେ ଚାଷୀଙ୍କୁ ଅନୁଦାନ ଦିଆଯାଇଛି ତାହା ରାଜ୍ୟ ସରକାର ସ୍ପଷ୍ଟ କରନ୍ତୁ ବୋଲି ଉଭୟ ନେତା ଦାବି କରିଛନ୍ତି।
ପ୍ରକାଶଯୋଗ୍ୟ, ରାଜ୍ୟ ସରକାର କାଳିଆ ଯୋଜନା ପରେ କେନ୍ଦ୍ର ସରକାରଙ୍କ ପକ୍ଷରୁ ପିଏମ୍ କିଷାନ ଯୋଜନା ଆରମ୍ଭ କରାଯାଇଥିଲା। ଏହି ଯୋଜନାରେ ଚାଷୀଙ୍କୁ ୬ହଜାର ଟଙ୍କା ଦେବାକୁ କେନ୍ଦ୍ର ସରକାର ଘୋଷଣା କରିଥିଲେ। ମାତ୍ର ଏହାକୁ ଓଡ଼ିଶା ସରକାର ପ୍ରଥମେ ଗ୍ରହଣ କରି ନ ଥିଲେ। ଏପରିକି ଚାଷୀଙ୍କ ତାଲିକା ପ୍ରଦାନ କରି ନ ଥିଳେ। ଯାହାକୁ ନେଇ କେନ୍ଦ୍ର ଓ ରାଜ୍ୟ ମଧ୍ୟରେ ସବୁବେଳେ ଆରୋପ ପ୍ରତ୍ୟାରୋପ ଦେଖିବାକୁ ମିଳୁଥିଲା। ହେଲେ ଗତ ବିଧାନସଭା ଅଧିବେଶନ ସମୟରେ ବସିଥିବା କ୍ୟାବିନେଟ୍ ବୈଠକରେ ପିଏମ୍ କିଷାନ ସହ କାଳିଆ ଯୋଜନା ମିଶାଇଦେବା ପାଇଁ ନିଷ୍ପତ୍ତି ହୋଇଥିବା ଜଣାପଡ଼ିଛି। ଏହାକୁ କୃଷି ମନ୍ତ୍ରୀ ଅରୁଣ ସାହୁ ସ୍ବୀକାର କରିଛନ୍ତି। ତେବେ କାଳିଆ ଯୋଜନାରେ ପ୍ରଥମ କିସ୍ତି ପ୍ରଦାନ କରାଯାଇସାରିଥିବା ବେଳେ ଏବେ ଦ୍ୱିତୀୟ କିସ୍ତି ପ୍ରଦାନ କରାଯାଉଛି।