ନିର୍ଦ୍ଦେଶନା ଏକ ଗୁରୁ ଦାୟିତ୍ୱ। ପୁଣି ମଞ୍ଚରେ ତ କଟ୍ ଓକେ ନାହିଁ। ଲାଇଭ ଆକ୍ଟିଂ। ତେଣୁ ଅଭିନୟ କିପରି ଜୀବନ୍ତ ହେବ, କାହାଣୀରେ ଯାହା ଦର୍ଶାଯାଇଛି ତାହା କିପରି ସଠିକ ଭାବରେ କଳାକାରଙ୍କ ଦ୍ୱାରା ପରିବେଷିତ ହୋଇପାରିବ ତାହା ଉପରେ ଗୁରୁତ୍ୱ ଦିଏ। କାରଣ କାହାଣୀଟିକୁ ଯଦି ମଞ୍ଚ ଉପରେ ସଠିକ ଭାବରେ ଉପସ୍ଥାପନା କରାଯାଇ ନ ପାରିଲା ତେବେ ପରିଶ୍ରମ କିଛି ମୂଲ୍ୟ ରହି ନ ଥାଏ। ତେଣୁ ନିର୍ଦ୍ଦେଶନା ଦେବା ସମୟରେ ତାହା ଉପରେ ମୁଁ ସବୁବେଳେ ଗୁରୁତ୍ୱ ଦିଏ ବୋଲି କହନ୍ତି ନିର୍ଦ୍ଦେଶକ ଶାରଦା ରଣା। ନାଟ୍ୟକାର ତଥା ନିର୍ଦ୍ଦେଶକ ସନ୍ତୋଷ ନାରାୟଣଙ୍କ ସହ ବେଶ୍ କିଛି ବର୍ଷ ସହ ନିର୍ଦ୍ଦେଶକ ଭାବରେ କାମ କରିବା ପରେ ସନ୍ତୋଷଙ୍କ ରଚିତ ତଥା ଅନ୍ୟତମ ଆଗଧାଡିର ଅପେରାପାର୍ଟି ଇନ୍ଦ୍ରଭୁବନ ପରିବେଷିତ (୨୦୧୮-୧୯) ନାଟକ ‘ଭାଇ ଭଉଣୀର ନୂଆ କାହାଣୀ’ରୁ ସୋଲୋ ନିର୍ଦ୍ଦେଶକ ସାଜିଥିଲେ ସେ। ସେ ନିର୍ଦ୍ଦେଶନ ଦେଇଥିବା ନାଟକ ଗୁଡିକ ମଧ୍ୟରେ ରହିଛି-ଚାଲୁଛି ଅଳପ ଝୁଣ୍ଟୁଛି ବେଶି (ଇନ୍ଦ୍ରଭୁବନ), ପୁଣି ଫେରିଛି ତଅପୋଇ (ଇଷ୍ଟର୍ନ ବ୍ଳୁ), ଚଳିତ ଯାତ୍ରା ସିଜନରେ ପରିବେଷିତ ‘ମାଣିକକୁ କିଏ ମାଇଲା ମାଡ’ ଏବଂ ‘ଓଠରେ ହସ ଲୁହରେ ଶେଷ’ (ଇନ୍ଦ୍ରଭୁବନ)। ‘ମୋତେ ନିର୍ଦ୍ଦେଶକ ଭାବରେ ଠିଆ ହେବାକୁ ସନ୍ତୋଷ ନାରାୟଣ, ମନୋଜ ନାୟକ, ନିଗମ ମିଶ୍ର, ମଳୟ ମିଶ୍ର, ବିକାଶ ଶୁକ୍ଳା ଏବଂ ଅରୁଣ ମନ୍ତ୍ରୀ ପ୍ରେରଣାକୁ ମୁଁ କଦାପି ଭୁଲିପାରବି ନାହିଁ ବୋଲି କହନ୍ତି ଶାରଦା।