ମୁମ୍ବାଇ: ଫିଲ୍ମର ଶୁଟିଂ ସେଟ୍ରେ ଆହତ ହେବା ସାଧାରଣ କଥା। ଶୁଟିଂ କରିବା ସମୟରେ କେତେକ ଅଭିନେତ୍ରୀ ଅଭିନେତା ଆହତ ହୋଇଥାନ୍ତି। ଏହାପରେ ବି ସେମାନେ ନିଜ କାମକୁ ଗୁରୁତ୍ୱପୂର୍ଣ୍ଣ ଦେଇଥାନ୍ତି। ଆପଣ ଭାବୁଥିବେ ଆହତ ପାଇଁ ଏତେ ଚର୍ଚ୍ଚା କାହିଁକି। ବେଳେ ବେଳେ ପ୍ରଶଂସକଙ୍କୁ ମନୋରଞ୍ଜନ ଦେବାକୁ ଯାଇ କଳାକାରମାନେ ବଡ଼ ବଡ଼ ବିପଦର ସାମ୍ନା କରିଥାନ୍ତି। କିଛି ଏଭଳି ଘଟଣା ସାମ୍ନାକୁ ଆସିଛି, ଯାହାକୁ ଶୁଣିଲେ ଆଶ୍ଚର୍ଯ୍ୟ ହୋଇଯିବେ। ୨୦୦୨ରେ ରିଲିଜ୍ ହୋଇଥିବା ଫିଲ୍ମ ଦେବଦାସର ‘ଡୋଲା ରେ ଡୋଲା’ ଗୀତ ମନେଥିବ। ଯେଉଁଥିରେ ଐଶ୍ୱର୍ଯ୍ୟା ରାୟ ବଚ୍ଚନ ଓ ମାଧୁରୀ ଦୀକ୍ଷିତ୍ଙ୍କ ଦମ୍ଦାର ଡାନ୍ସ ଦେଖିବାକୁ ମିଳିଥିଲା। ଏହି ଡାନ୍ସ ବଲିଉଡ୍ର ସବୁଠାରୁ ଭଲ ଡାନ୍ସ ଭିତରୁ ଗୋଟିଏ ବୋଲି ଗଣାଯାଏ। ହେଲେ ଜାଣିଛନ୍ତି କି, ଏହି ଗୀତର ଡାନ୍ସ ସମୟରେ ଐଶ୍ୱର୍ଯ୍ୟାଙ୍କ କାନରୁ ରକ୍ତ ବାହାରିଥିଲା ଏବଂ ସେ ଆହତ ହୋଇଥିଲେ। ଦୂର୍ଗାପୂଜା ସେଲିବ୍ରେସନ୍କୁ ନେଇ ତିଆରି ହୋଇଥିବା ଏହି ଗୀତରେ ଐଶ୍ୱର୍ଯ୍ୟା ଓ ମାଧୁରୀ ଭାରତନାଟ୍ୟମ୍ ଓ କଥକର କିଛି ଷ୍ଟେପ୍ କରିଥିଲେ। ଆଉ ଏଥିପାଇଁ ୨ ନାୟିକା ହେଭି ମେକ୍ଅପ ସହ ଜୁଏଲାରୀ ପିନ୍ଧିଥିଲେ। ତେବେ ବିଶ୍ୱସୁନ୍ଦରୀଙ୍କ କାନଫୁଲ ଏତେ ଭାରି ହୋଇଯାଇଥିଲା ଯେ, ତାଙ୍କ କାନରୁ ରକ୍ତ ବହାରିଥିଲା ଏବଂ ସେ ଆହତ ହୋଇପଡ଼ିଥିଲେ। କିନ୍ତୁ ସେ ଶୁଟିଂରେ ବାଧା ନ ଦେବା ସହ କାହାକୁ କିଛି ନ କହି ଏହାକୁ ପୂରା କରିଥିଲେ। ଶୁଟିଂ ଶେଷ ହେବା ପରେ ଏନେଇ ସେ ସମସ୍ତଙ୍କୁ ଜଣାଇଥିଲେ। ସେଟ୍ରେ ତାଙ୍କର ପ୍ରାଥମିକ ଚିକିତ୍ସା କରାଯାଇଥିଲା। ତେବେ ତାଙ୍କର ଏହି ଚିନ୍ତାଧାରା ନିଜ କାର୍ଯ୍ୟ ପ୍ରତି ଥିବା ଭଲପାଇବା ଓ ନିଷ୍ଠାକୁ ଦର୍ଶାଇଥିଲା। ସମସ୍ତେ ତାଙ୍କର ଏଭଳି କାର୍ଯ୍ୟକୁ ବେଶ୍ ପ୍ରଶଂସା କରିଥିଲେ। ଅପରପକ୍ଷରେ ଉକ୍ତ ଗୀତର କୋରିଓଗ୍ରାଫର ସରୋଜ ଖାଁଙ୍କୁ ନୃତ୍ୟ ନିର୍ଦ୍ଦେଶନା ପାଇଁ ନ୍ୟାସନାଲ ଆଓ୍ବାର୍ଡରେ ସମ୍ମାନୀତ କରାଯାଇଥିଲା। ଏହି ଫିଲ୍ମରେ ଐଶ୍ୱର୍ଯ୍ୟା ପାର୍ବତି ଓ ମାଧୁରୀ ଚନ୍ଦ୍ରମୁଖୀ ଚରିତ୍ରରେ ଅଭିନୟ କରିଥିଲେ। ସେହ ସମୟରେ ଏହି ଫିଲ୍ମ ବକ୍ସ ଅଫିସ୍ରେ ଭଲ ବ୍ୟବସାୟ କରିଥିଲା।