ବରଗଡ଼ ଅଫିସ,୧୩।୪: କରୋନା(କୋଭିଡ-୧୯) ଭୂତାଣୁ ସଂକ୍ରମଣକୁ ରୋକିବା ପାଇଁ ଦେଶବ୍ୟାପୀ ଲକ୍ଡାଉନ କଟକଣା ଲାଗୁ ହୋଇଛି। ତେବେ ଏହି କଟକଣାରେ ଚାଷୀକୁଳ ଅଧିକ ପ୍ରଭାବିତ ହୋଇଛନ୍ତି। ବଜାର ବ୍ୟବସ୍ଥା ସୁଗମ ହୋଇ ପାରି ନ ଥିବା ଯୋଗୁ ଚାଷୀଙ୍କ ପରିବା କିଆରୀରେ ପଡିରହି ନଷ୍ଟ ହେଉଛି। ବିକ୍ରି ବ୍ୟବସ୍ଥା ହେଉ ନ ଥିବା ଯୋଗୁ ବରଗଡ଼ ଜିଲା ଭଟଲି ବ୍ଲକ ଅଞ୍ଚଳର ଚାଷୀ ଆଶୁତୋଷ ଆଚାର୍ଯ୍ୟଙ୍କ ଲକ୍ଷାଧିକ ଟଙ୍କାର କାକୁଡି କିଆରୀରେ ସଢ଼ିଯାଉଛି। ଆଶୁତୋଷ ବ୍ୟାଙ୍କରୁ ୧୦ଲକ୍ଷ ଏବଂ ନିଜର ୫ଲକ୍ଷ ଟଙ୍କା ବିନିଯୋଗ କରି ଏକ ପଲି ହାଉସ କରିଛନ୍ତି। ସେଠାରେ ସେ କାକୁଡି ସମେତ ବିଭିନ୍ନ ପରିବା ଚାଷ କରିଛନ୍ତି। ଇତିମଧ୍ୟରେ ପ୍ରାୟ ୪୦ କୁଇଣ୍ଟାଲ କାକୁଡି ଅମଳକ୍ଷମ ଅବସ୍ଥାକୁ ଆସି ବିକ୍ରି ହୋଇ ପାରି ନ ଥିବା ଯୋଗୁ ତାହା ନଷ୍ଟ ହୋଇଥିବା ଆଶୁତୋଷ ଅଭିଯୋଗ କରିଛନ୍ତି। ତେବେ କେବଳ ଆଶୁତୋଷ ନୁହନ୍ତି, ଜିଲାର ଅନେକ ଚାଷୀ ଏଭଳି କ୍ଷୟକ୍ଷତିର ସମ୍ମୁଖୀନ ହୋଇଛନ୍ତି। ଏଭଳି ସ୍ଥିତିରେ ଚାଷୀକୁଳ ଋଣ ପରିଶୋଧ ଏବଂ ପରିବାର ପୋଷଣ ନେଇ ଚିନ୍ତିତ ହୋଇ ପଡିଛନ୍ତି।