ଭବାନୀପାଟଣା,୨୪।୮(ଡି.ଏନ୍.ଏ.): କଳାହାଣ୍ଡି ଜିଲା ଭବାନୀପାଟଣା ସଦର ଥାନା ଅନ୍ତର୍ଗତ କିଟପଦର ଛକରେ ଗତ ୧୫ ତାରିଖ ରାତିରେ ଘଟିଥିବା ହତ୍ୟାକାଣ୍ଡ ଘଟଣାରେ ୩ ଅଭିଯୁକ୍ତ ଶୁକ୍ରବାର ଜେଲ ଯାଇଛନ୍ତି। ସେମାନେ ହେଲେ ସିର୍ଲିଗୁଡା ଗ୍ରାମର ରାକେଶ ପୁଞ୍ଜି (୧୯), ଡମ୍ବରୁଧର ପୂଝାରୀ (୨୧) ଓ କାମଦେବ ଜାଲ (୨୫)।
ପୋଲିସ ସୂତ୍ରରୁ ପ୍ରକାଶ, କିଟପଦର ଛକ ନିକଟରେ ଗତ ୧୫ ତାରିଖରେ ଜଣେ ଯୁବକ ରକ୍ତ ଜୁଡୁବୁଡୁ ଅବସ୍ଥାରେ ପଡିଥିବା ଖବର ମିଳିଥିଲା। ଏହା ଏକ ହତ୍ୟାକାଣ୍ଡ ବୋଲି ପୋଲିସ ସନ୍ଦେହ କରି ତଦନ୍ତ ଚଳାଇଥିଲା। ମୃତକ ସିର୍ଲିଗୁଡା ଗ୍ରାମର କୈଳାସ ଦଣ୍ଡସେନା (୩୫)। କୈଳାସଙ୍କ ସ୍ତ୍ରୀ ମୀନା ଦଣ୍ଡସେନାଙ୍କ ଏତଲାକୁ ଭିତ୍ତି କରି ଭବାନୀପାଟଣା ସଦର ପୋଲିସ ଏସଆଇ ସୁବାସଚନ୍ଦ୍ର ମିଶ୍ର ମାମଲା(ନଂ. ୨୭୪/୧୯) ରୁଜୁ କରି ତଦନ୍ତ ଆରମ୍ଭ କରିଥିଲେ। ଏହି ଘଟଣାରେ ପୋଲିସ ୩ ଅଭିଯୁକ୍ତଙ୍କୁ ଗିରଫ କରି ଭବାନୀପାଟଣା ଏସ୍ଡିଜିଏମ୍ କୋର୍ଟରେ ହାଜର କରାଇଥିଲା। ଜାମିନ ନାମଞ୍ଜୁର ହେବାରୁ ଅଭିଯୁକ୍ତଙ୍କୁ ଜେଲକୁ ପଠାଇ ଦିଆଯାଇଛି।