ନୂଆଦିଲ୍ଲୀ: ଲକ୍ଡାଉନ୍ ସମୟରେ ଏବେ ପ୍ରକୃତିର ବିଭିନ୍ନ ରୂପକୁ ଦେଖିବାକୁ ପାଉଛନ୍ତି ଲୋକେ। ରାସ୍ତାଘାଟରେ ଲୋକମାନଙ୍କ କୋଳାହଳ କମ୍ଥିବାରୁ ଜୀବଜନ୍ତୁମାନେ ବେଶ୍ ସ୍ବଚ୍ଛନ୍ଦରେ ବୁଲାବୁଲି କରିପାରୁଛନ୍ତି। ଏମିତି ଏକ ଦୃଶ୍ୟ ଏବେ ଲୋକଙ୍କୁ ଆଚମ୍ବିତ କରିଛି। ଦିଲ୍ଲୀର ଜଣେ ବ୍ୟକ୍ତିଙ୍କ ଘରକୁ ହଠାତ୍ ଏକ ମୟୂର ଆସି ସମସ୍ତଙ୍କୁ ଆଶ୍ଚର୍ଯ୍ୟ କରିଦେଇଛି। ଏଇ ବ୍ୟକ୍ତିଜଣକ ହେଲେ ଗୁଞ୍ଜନ ମେହେଟ୍ଟା। ସେ ତାଙ୍କ ଟୁଇଟରରେ ତାଙ୍କ ଘର ବାଲକୋନିର ଏକ ଭିଡିଓ ଶେୟାର କରିଛନ୍ତି, ଯେଉଁଠାରେ ମୟୂରଟି ବେଶ୍କିଛି ମୁହୂର୍ତ୍ତ କଟାଇଛି। ମୟୂରଟିର ଆକର୍ଷଣୀୟ ପୁଚ୍ଛ ଓ ଆନନ୍ଦରେ ଖେଳୁଥିବାର ଦୃଶ୍ୟ ସମସ୍ତଙ୍କୁ ଆନନ୍ଦିତ କରିପାରିଛି। ମୟୂରଟି ଘରର ବାଲକୋନି ପର୍ଯ୍ୟନ୍ତ କିପରି ଆସିଲା ସେ ସମ୍ପର୍କରେ କାହାକୁ ଜଣା ନ ଥିଲେ ବି ଏହାକୁ ଦେଖିବା ମାତ୍ରେ ସମସ୍ତେ ପ୍ରଭାବିତ ହୋଇଛନ୍ତି। ସେଥିପାଇଁ ସୋସିଆଲ୍ ମିଡିଆରେ ଏହାକୁ ବହୁସଂଖ୍ୟାରେ ଲୋକେ ପସନ୍ଦ କରିଛନ୍ତି। ଭିଡିଓଟିକୁ ଶେୟାର କରିବାର ମାତ୍ର ଗୋଟିଏ ଦିନ ପରେ ଏହାକୁ ୨ ହଜାରରୁ ଅଧିକ ଲୋକ ଲାଇକ୍ କରିବା ସହିତ ୩୦୦ରୁ ଅଧିକ ରିଟୁଇଟ୍ କରିଛନ୍ତି। ଏହାକୁ ନେଇ ଲୋକେ ସୁନ୍ଦର ସୁନ୍ଦର କମେଣ୍ଟ ବି ଦେଇଛନ୍ତି।