ଲାଠୋର, ୧୪।୨(ଡି.ଏନ୍.ଏ.)- ବଲାଙ୍ଗୀର ଜିଲା ତୁରେକେଲା ବ୍ଲକ କୁଇବାହାଲ ପଁଚେତ୍ ଅଧୀନ ବାଞ୍ଜିପାଲି ଗଁାର ହିତାଧିକାରୀମାନେ ପିଡିଏସ୍ କିରାସିନ ବଁଟାରେ ଖେଲଢ଼େପ ହେଉଥିବାର ଅଭିଯୋଗ କରିଛନ୍। ଏନ୍ତା କି ଡିଲର ମାସ୍ମଏନା କିରାସିନ ନାଇଁ ଦେଉଥିବାର ହିତାଧିକାରୀମାନେ କହିଛନ୍।
ସୂଚନା ଅନ୍ସାରେ ଦୁଇଟା ଓ୍ବାର୍ଡକେ ନେଇ ଗଠିତ୍ ବାଞ୍ଜିପାଲି ଗଁାରେ ୨ଶହରୁ ଅଧ୍କା ପଡିକାର୍ଡ ରହିଛେ। ସରକାରୀ ନିୟମ ଅନ୍ସାରେ ଝନେ ହିତାଧିକାରୀକେ କାର୍ଡ ପିଛା ମାସିକ ୧.୭୮୬ ଲିଟର ହିସାବେ ୩ ମାସେ ୫.୩୫୮ଲିଟର କିରାସିନ ମିଲବାର କଥା। ହେଲେ ବାଞ୍ଜିପାଲି ଗଁାର ହିତାଧିକାରୀମାନେ ଗଲା ସେପ୍ଟେମ୍ବର ୨୦୧୯ରେ କିରାସିନ ପାଇଥିଲେ। ସେଦିନ୍ଠାନୁ ଆଏଜ୍କେ ୫ ମାସ ହେଲା କିରାସିନ ନାଇଁ ପାଇଥିବାର ହିତାଧିକାରୀ ଅନିତା କୁମ୍ଭାର, ବିଳାସ ତାଣ୍ଡି, ବେଲମତି କୁମ୍ଭାର, ବୈଦେହୀ କୁମ୍ଭାର, ଅମୁଚ୍ଛା ଛତ୍ରିଆ, ସୁକିଆ ତାଣ୍ଡି, ମଞ୍ଜୁ ତାଣ୍ଡି, ଜମୁନା ତାଣ୍ଡି, ସୁକାନ୍ତି ତାଣ୍ଡି ପରମୁଖ ଅଭିଯୋଗ କରିଛନ୍ତି। ଏନ୍ତାଥି ଗଁାର ନିରିହ ପରିବାରମାନେ ମାସ୍ମଏନା କିରାସିନ ନାଇଁପାଇ କରି ନାନା ସମସିଆର ସାମନା କରୁଛନ୍। ଇ ବାବ୍ଦେ ତୁରେକେଲା ବ୍ଲକ ଯୋଗାଣ ନିରୀକ୍ଷକ ଅସିତ କୁମାର ମହାନ୍ତିକୁଁ ପଚ୍ରାଲାରୁ ସରକାର ଫିମାସ କିରାସିନ ଯୁଗେଇ ଦେଉଛନ୍। ହେଲେ ଟଁକା ପଏସା ଅଭାବୁ କେତେ ଡିଲର ଠିକ୍ ସମିଆରେ କିରାସିନ ଉଠେଇ ନାଇଁପାରବାର। ଯେନ୍ମାନେ କିରାସିନ ଉଠାବାରେ ଖିଲାପି କରୁଛନ୍ ସେମାନକୁ ଆମେ ବିଦା କରି କିରାସିନ ବଁଟା ଦାଇତିଅ ପଁଚେତ୍କେ ଦେମୁ ବଲି ସେ କହିଥିଲେ। ହେଲେ ଜିଲା ପରଶାସନ ଆର ଜିଲା ଯୋଗାଣ ବିଭାଗ ଇ ଦିଗେ ଦୁରୁଷ୍ଟି ଦେଇ ସମସିଆର ସମାଧାନ କରବାକେ ବାଞ୍ଜିପାଲି ଗଁାବାସୀ ଦାବି କରିଛନ୍।
