କଣ୍ଟାପଡ଼ା, ୨।୬(ଡି.ଏନ୍.ଏ.): କରୋନା ମହାମାରୀ ଓ ଲକ୍ଡାଉନ ଯୋଗୁ ଗରିବ ତଥା ଦିନମଜୁରିଆ ଦୁଃଖକଷ୍ଟରେ ଜୀବନ ବିତାଉଛନ୍ତି। ତେବେ ରାସନ କାର୍ଡଧାରୀଙ୍କ ପାଇଁ ସରକାର କମ୍ ମୂଲ୍ୟରେ ଯୋଗାଇ ଦେଇଥିବା କିରୋସିନକୁ କଟକ ଜିଲା କଣ୍ଟାପଡା ବ୍ଲକରେ ଅସାଧୁ ରିଟେଲରମାନେ ଚଢ଼ାଦରରେ ବିକ୍ରିକରୁଛନ୍ତି। ଏହାର ପ୍ରତିବାଦରେ ଓଡ଼ିଶା ସୂଚନା ଅଧିକାର ପକ୍ଷରୁ ମଙ୍ଗଳବାର କଣ୍ଟାପଡା ବ୍ଲକ କାର୍ଯ୍ୟାଳୟ ସମ୍ମୁଖରେ ଧାରଣା ଦିଆଯାଇଛି।
ଅଭିଯୋଗରୁ ଜଣାପଡିଛି ଯେ, କେନ୍ଦ୍ରସରକାର କାର୍ଡଧାରୀଙ୍କୁ ମୁଣ୍ଡପିଛା ୫ କେଜି ହିସାବରେ ୩ମାସ ପାଇଁ ୧୫ କେଜି ଚାଉଳ, ୨ ଲିଟର କିରୋସିନ ଓ ୩ କେଜି ଡାଲି ଦେଉଛନ୍ତି। ରାଜ୍ୟ ସରକାର ଏହାକୁ ବିଭିନ୍ନ ରିଟେଲରଙ୍କ ମାଧ୍ୟମରେ କାର୍ଡଧାରୀଙ୍କ ନିକଟରେ ପହଞ୍ଚାଇବା ପାଇଁ ବ୍ୟବସ୍ଥା କରିଛନ୍ତି। କେନ୍ଦ୍ର ସରକାର ଚାଉଳ ଓ ଡାଲିକୁ ସମ୍ପୂର୍ଣ୍ଣ ମାଗଣା ଦେବାର ବ୍ୟବସ୍ଥା କରିଛନ୍ତି। ଅପରପକ୍ଷେ କଟକ ଜିଲାପାଳଙ୍କ କାର୍ଯ୍ୟାଳୟ ଚିଠି ନଂ. ୯୧୧/୬.୫.୨୦୨୦ ଅନୁଯାୟୀ କଣ୍ଟାପଡ଼ା ବ୍ଲକରେ ୧୩.୬୪ ବିକ୍ରି କରିବାକୁ ଉଲ୍ଲେଖ ରହିଛି। ଏପରି ସ୍ଥଳେ ବ୍ଳକର କେତେକ ଅଞ୍ଚଳରେ ମାଗଣା ଚାଉଳ ଓ ଡାଲି ଅଦ୍ୟାବଧି ଦିଆଯାଇ ନ ଥିବାବେଳେ ହିତାଧିକାରୀଙ୍କୁ କମ୍ ପରିମାଣର କିରୋସିନ ଦିଆଯାଇ ସେମାନଙ୍କଠାରୁ ଲିଟର ପିଛା ୪୦ରୁ ୫୦ଟଙ୍କା ପର୍ଯ୍ୟନ୍ତ ଆଦାୟ କରାଯାଉଛି। ଏହାର ପ୍ରତିବାଦରେ ସଂଗଠନର କଟକ ଜିଲା ସଂଯୋଜକ ଜିତେନ୍ଦ୍ର ସାହୁଙ୍କ ନେତୃତ୍ୱରେ ଦିଲୀପ ରାଉତରାୟ, ମାଧବାନନ୍ଦ ଭୋଇ, ନିରଞ୍ଜନ ଭୋଇ, ବସନ୍ତ ଜେନା, ସୁକାନ୍ତ ସ୍ବାଇଁ, ଶରତ ପ୍ରରିଡା, ସନ୍ତୋଷ ପ୍ରମୁଖ ଧାରଣାରେ ବସିଛନ୍ତି। ତଦନ୍ତ ନ ହେବା ପର୍ଯ୍ୟନ୍ତ ଏହା ଚାଲୁ ରହିବ ବୋଲି ଚେତାବନୀ ଦେଇଛନ୍ତି।