ବଇଣ୍ଡା,୨।୬(ଡି.ଏନ.ଏ)- ଅନୁଗୋଳ ଜିଲା କିଶୋରନଗର ବ୍ଲକ ବଇଣ୍ଡା, ହଣ୍ଡପା, ନାକିଚି, କିଶୋରନଗର, ବାମୁର, ଅଙ୍ଗପଡ଼ା, ତୁରୁଡ଼ା ଆଦି ଗ୍ରାମ ଗୁଡ଼ିକରେ ରବିବାର କାଳବୈଶାଖୀ ହୋଇଛି। ହଠାତ୍ ଝଡ଼ ତୋଫାନ ମାଡ଼ି ଆସିବାରୁ ବ୍ୟାପକ ଚାଳ ଛପର ଘର, ଆଜବେଷ୍ଟସ ଘର ଓ ଉଠା ଦୋକାନୀଙ୍କ ଅସ୍ଥାୟୀ କ୍ୟାମ୍ପ ଗୁଡ଼ିକ ପବନରେ ଉଡ଼ିଯାଇଛି। ଫଳରେ ବହୁ ସମ୍ପତ୍ତି ନଷ୍ଟ ହୋଇଯାଇଛି।
ବିଶେଷ କରି ବଇଣ୍ଡା ଅଞ୍ଚଳର ମନୋରଞ୍ଜନ ପ୍ରଧାନ, ଆଲୋକ ବେହେରା, ସିପୁନ ଦାସ, ସୁବ୍ରତ ପ୍ରଧାନ, କୁମୁଦ ପ୍ରଧାନ, ବିଜୟ ପ୍ରଧାନଙ୍କ ସମେତ ବହୁ ଉଠା ଦୋକାନୀଙ୍କ ଛପର ଉଡ଼ିଯାଇଛି। ସେହିପରି ରମେଶ ଚନ୍ଦ୍ର ଭୋଇ, କୁନ୍ତଳା ଭୋଇ, କୁଶ ଭୋଇ, ସୁରେନ୍ଦ୍ର ସାହୁ, କୁମୁଦିନୀ ପ୍ରଧାନ, ରବିନ୍ଦ୍ର ସାହୁ, ଗୋକୁଳାନନ୍ଦ ମାଝିଙ୍କ ସମେତ ବହୁ ଆଜବେଷ୍ଟସ, ଚାଳ ଛପର ଘର ଉଡ଼ିଯାଇଛି। ଏଥିସହ ବଇଣ୍ଡା ହାଇସ୍କୁଲର ସାଇକେଲ ଷ୍ଟାଣ୍ଡଟି ଝଡ଼ ତୋଫାନରେ ଭାଙ୍ଗିଯାଇଛି। ବହୁ ଗଛ ଭାଙ୍ଗି ରାସ୍ତା ଉପରେ ପଡ଼ିବା ସହ ଗମନାଗମନ ବାଧାପ୍ରାପ୍ତ ହୋଇଛି। ବିଦ୍ୟୁତ୍ ତାର ଭାଙ୍ଗି ପଡ଼ିଥିବାରୁ ବିଦ୍ୟୁତ୍ ସରବରାହ ବନ୍ଦ ରହିଛି। ସେହିପରି ଏହି ବର୍ଷାରେ କଦଳୀ ଗଛ ବ୍ୟାପକ ଭାଙ୍ଗି ଯାଇଥିବାବେଳେ ଚାଷୀମାନେ ଚିନ୍ତିତ ହୋଇପଡ଼ିଛନ୍ତି। ପନୀପରିବା ଚାଷ ଯଥା, ଟମାଟୋ, ବାଇଗଣ, ବ୍ୟାପକ କ୍ଷତିଗ୍ରସ୍ତ ହୋଇଛି। ଏ ନେଇ ନୁନୁକାପଶି ସରପଞ୍ଚ ଜଳଧର ସାହୁ କୁହନ୍ତି, କାଳବୈଶାଖୀରେ ବ୍ୟାପକ ଘର ଭାଙ୍ଗିଯିବାସହ ଉଠା ଦୋକାନୀଙ୍କର କ୍ଷତି ହୋଇଛି। ପଞ୍ଚାୟତ ପକ୍ଷରୁ କ୍ଷତିଗ୍ରସ୍ତଙ୍କୁ ଚିହ୍ନଟ କରାଯାଇ ସରକାରୀ ସାହାର୍ଯ୍ୟ ଯୋଗାଇ ଦେବା ପାଇଁ ତହସିଲଦାରଙ୍କୁ ଅବଗତ କରାଯିବ।