ଭୁବନେଶ୍ୱର,୫।୧୨(ବ୍ୟୁରୋ): ପ୍ରଧାନମନ୍ତ୍ରୀ କିଷାନ ଯୋଜନା ସହ ‘କାଳିଆ’ର ମିଶ୍ରଣ ପ୍ରସଙ୍ଗ ନେଇ ମୁହଁ ଖୋଲିଛନ୍ତି କୃଷି ମନ୍ତ୍ରୀ ଅରୁଣ ସାହୁ। ସେ କହିଛନ୍ତି, କାଳିଆ ଲାଭ ଲୋକଙ୍କ ପାଖକୁ ଯିବ। କାଳିଆ-କିଷାନର ମିଶ୍ରଣ ହେବ। କାଳିଆ ଯୋଜନା ଚାଲୁ ରହିବ। ଏପରିକି ଯୋଜନାର ୨ୟ କିସ୍ତି ଚାଲୁ ରହିଛି ବୋଲି ମନ୍ତ୍ରୀ କହିଛନ୍ତି।
ରାଜ୍ୟ ସରକାରଙ୍କ କାଳିଆ ଯୋଜନାର ପ୍ରଥମ କିସ୍ତିରେ ୫୧ ଲକ୍ଷ ୫ ହଜାର ୨ଶହ ୯୦ଜଣ ଚାଷୀଙ୍କୁ ଟଙ୍କା ମିଳିଛି। ହିତାଧିକାରୀଙ୍କ ମଧ୍ୟରୁ ୪୫,୯୬୫ଜଣ ଅଯୋଗ୍ୟ ବୋଲି ଅରୁଣ ବିଧାନସଭାରେ ସୂଚନା ଦେଇଥିଲେ। ଏବେ ‘କାଳିଆ’କୁ ‘କିଷାନ’ ସହ ମିଶ୍ରଣ କରିବା ନେଇ ରାଜ୍ୟ ବିଚାର କରୁଛି। ଆନ୍ଧ୍ର ସରକାର ‘ଅନ୍ନଦାତା ସୁଖିଭବ’ ଯୋଜନାକୁ କିଷାନରେ ବିଲୟ କରିଥିବା ବେଳେ ସେଭଳି ଢାଞ୍ଚାରେ ‘କାଳିଆ’କୁ ମିଶ୍ରଣ କରାଯିବାକୁ ସେ ଚାହୁଁଛନ୍ତି।
ସୂଚନାଯୋଗ୍ୟ, ‘କିଷାନ’ ଯୋଜନାରେ ଚାଷୀଙ୍କୁ ବର୍ଷକୁ ୬ହଜାର ଟଙ୍କା ମିଳୁଥିବା ବେଳେ ‘କାଳିଆ’ ଯୋଜନାରେ ଦୁଇଟି ଫସଲ ପାଇଁ ୧୦ହଜାର ଦେବାକୁ ଘୋଷଣା କରାଯାଇଛି। ଅପରପକ୍ଷେ ମିଶ୍ରଣ ହେବା ପରେ କେନ୍ଦ୍ର ସରକାର ୬ହଜାର ଟଙ୍କା ଦେବେ। ମାତ୍ର ଆଉ ୪ ହଜାର ଟଙ୍କାର ବୋଝ ରାଜ୍ୟ ବହନ କରିବାକୁ ସମ୍ମତ ହୋଇଛି। ଏହାଛଡ଼ା ଯୋଜନାରୁ ବାଦ ପଡ଼ିଥିବା ଯୋଗ୍ୟ ହିତାଧିକାରୀ(ଭୂମିହୀନ) ‘କିଷାନ’ରେ ସାମିଲ ହୋଇ ନ ପାରିଲେ ସେମାନଙ୍କୁ ରାଜ୍ୟ ସରକାର ସହାୟତା ପ୍ରଦାନ କରିବେ। ଏହି ପ୍ରସ୍ତାବରେ କେନ୍ଦ୍ର ମୋହର ମାରି ସାରିଛି।