ବ୍ରହ୍ମପୁର ଅଫିସ,୧୭ା୫: ଗଞ୍ଜାମ ଜିଲାରେ ଏବେ କରୋନା ସଂକ୍ରମିତଙ୍କ ସଂଖ୍ୟା ବଢ଼ିବାରେ ଲାଗିଛି। ଏନେଇ କୁକୁଡ଼ାଖଣ୍ଡି ବ୍ଲକ ଅଧିନସ୍ଥ ଦକ୍ଷିଣପୁର ପଞ୍ଚାୟତର ଗୁଣ୍ଠବନ୍ଧକୁ ରବିବାର ସିଲ୍ କରାଯାଇଛି। ଏପରିକି କୁକୁଡ଼ାଖଣ୍ଡି ଗୋଷ୍ଠୀ ଅଧିକାରୀଙ୍କ ପକ୍ଷରୁ ଉକ୍ତ ଗ୍ରାମକୁ କଣ୍ଟେନ୍ମେଣ୍ଟ୍ ଜୋନ୍ ଘୋଷଣା କରାଯାଇଛି। ଏବେ କୁକୁଡ଼ାଖଣ୍ଡିରେ କରୋନା ଭୟର ବାତାବରଣ ସୃଷ୍ଟି ହୋଇଛି। ବ୍ରହ୍ମପୁର ଆମ୍ବ ମାର୍କେଟ ଲିଙ୍କ୍ରେ ଗୁଣ୍ଠବନ୍ଧରେ ରହୁଥିବା ଜଣେ ବ୍ୟବସାୟୀ ଆସିଥିବା ବେଳେ ଏହି ଗ୍ରାମରୁ ଗୋଟିଏ ପରିବାରର ଜଣଙ୍କୁ ଶୀତଳାପଲି କୋଭିଡ୍ ହସ୍ପିଟାଲ ପଠାଯାଇଥିବା ବେଳେ ଅନ୍ୟ ୨ ଜଣଙ୍କ ସ୍ବାବ୍ ଟେଷ୍ଟ ପାଇଁ ଏମ୍କେସିଜି ମେଡିକାଲ ପଠାଯାଇଛି। ଫଳରେ ଏହି ଅଞ୍ଚଳକୁ ଏବେ ସିଲ୍ କରାଯାଇଛି। ରବିବାର ସକାଳେ କୁକୁଡ଼ାଖଣ୍ଡି ଗୋଷ୍ଠୀ ଉନ୍ନୟନ ଅଧିକାରୀ ଗଦାଧର ପାତ୍ର , ତହସିଲଦାର ଇପ୍ସିତା ପ୍ରିୟଦର୍ଶିନୀ ମିଶ୍ର, ବ୍ରହ୍ମପୁର ଉପଜିଲାପାଳ ସିନ୍ଧେ ଦତ୍ତତ୍ରାୟ ଭାଉସାହେବ ଓ ସଦର ଥାନା ପୋଲିସ ଉପସ୍ଥିତିରେ ଉପରୋକ୍ତ ଗାଁର ଚତୁଃପାର୍ଶ୍ୱ ରାସ୍ତା ସିଲ୍ କରାଯାଇଥିବା ନେଇ ବିଡିଓ ସୂଚନା ଦେଇଛନ୍ତି । ସେହିପରି ଗାଁରେ ଥିବା ସମସ୍ତ ଦୋକାନ ବଜାର ବନ୍ଦ ରଖିବାକୁ ନିର୍ଦ୍ଦେଶ ଦିଆଯାଇଛି। ପରବର୍ତ୍ତୀ ନିର୍ଦ୍ଦେଶ ପର୍ଯ୍ୟନ୍ତ ପ୍ରତ୍ୟେକ ପରିବାରବର୍ଗ ନିଜ ନିଜ ଘରେ ସଙ୍ଗରୋଧରେ ରହିବେ। ଅତ୍ୟାବଶ୍ୟକ ସାମଗ୍ରୀ ଓ ସ୍ବାସ୍ଥ୍ୟସେବା ସମ୍ପର୍କିତ ସୁବିଧା ବ୍ଲକ ପକ୍ଷରୁ ଯୋଗାଇ ଦିଆଯିବ ବୋଲି ବିଡିଓ କହିଛନ୍ତି । ସେହିପରି ସମସ୍ତ ସରକାରୀ କାର୍ଯ୍ୟାଳୟ ଓ ବେସରକାରୀ ଅନୁଷ୍ଠାନ ବନ୍ଦ କରିବାକୁ ନିର୍ଦ୍ଦେଶ ଦିଆଯାଇଛି। ଏହାସହିତ ୨ ଜଣ ଅଧିକାରୀଙ୍କୁ ନୋଡାଲ ଅଫିସର ଭାବେ ନିୟୋଜିତ କରାଯାଇଛି। କରୋନା ସଂକ୍ରମିତ ପରିବାରଙ୍କ ସହ ସମ୍ପର୍କରେ ଆସିଥିବା ଗ୍ରାମର ୬୦ରୁ ଊଦ୍ଧର୍ବ ଲୋକଙ୍କ ସୋମବାର ସ୍ବାବ୍ ନମୁନା ସଂଗ୍ରହ ପାଇଁ ଗ୍ରାମକୁ ଏକ ଡାକ୍ତରୀ ଦଳ ଆସିବେ ବୋଲି ବିଡିଓ ସୂଚନା ଦେଇଛନ୍ତି।