କୁଜଙ୍ଗ,୨୩ା୭(ସ୍ବ.ପ୍ର.): ଶ୍ରାବଣ ମାସ ଆରମ୍ଭ ହୋଇଯାଇଥିଲେ ମଧ୍ୟ ବର୍ଷା ଦେଖାନାହିଁ। ଏଥିଯୋଗୁ ଜଗତ୍ସିଂହପୁର ଜିଲାର ଉପକୂଳ କୁଜଙ୍ଗ ଅଞ୍ଚଳରେ ମରୁଡ଼ିର ପଦଧ୍ୱନୀ ଶୁଣାଗଲାଣି। ବହୁ କଷ୍ଟରେ ଚାଷୀ ଯେଉଁ ତଳି ପକାଇଥିଲେ ବର୍ଷା ଅଭାବରୁ ସେସବୁ ନଷ୍ଟ ହେବାକୁ ବସିଲାଣି। ଏଥିରେ ମ୍ରିୟମାଣ ହୋଇ ବାଲିଆ ପଞ୍ଚାୟତ ପାରିଅଙ୍ଗ ଗ୍ରାମର ଜଣେ ଚାଷୀଙ୍କ ମୃତ୍ୟୁ ଘଟିଥିବା ଜଣାପଡିଛି। ସେ ହେଲେ ମହେଶ୍ୱର ନାୟକ (୬୧)। ନିଜ ବିଲରେ ତଳିଘେରା ନଷ୍ଟ ହେବାର ଦେଖି ସେ ଧୈର୍ଯ୍ୟ ହରାଇଥିଲେ। ଫଳରେ ବିଲରେ ହିଁ ହୃଦ୍ଘାତର ଶିକାର ହୋଇ ସେ ଟଳିପଡିଲେ ବୋଲି ଗ୍ରାମବାସୀ କହିଛନ୍ତି। ସୂଚନା ଅନୁଯାୟୀ, ସୋମବାର ପୂର୍ବାହ୍ନ ପ୍ରାୟ ୧୧ଟାରେ ମହେଶ୍ୱର ନିଜ ତଳି ବିଲ ଦେଖିବାକୁ ଯାଇଥିଲେ। ବର୍ଷା ତଥା ଜଳସେଚନ ଅଭାବ ଓ ଗ୍ରୀଷ୍ମ ପ୍ରକୋପରେ ତାଙ୍କ ଜମିରେ ତଳି ସବୁ ଜଳିଯାଇଥିଲା। ଏହା ତାଙ୍କୁ ଗଭୀର ଆଘାତ ଦେଇଥିଲା। ଏବର୍ଷ ଚାଷ କରି ନ ପାରିଲେ କିପରି ଚଳିବେ ଭାବି ସେ ସଜ୍ଞାହୀନ ହୋଇ ପଡିଯାଇଥିଲେ। ଏହା ଦେଖି ନିକଟରେ ଚାଷ କରୁଥିବା ଅନ୍ୟ ଚାଷୀମାନେ ତାଙ୍କୁ ତୁରନ୍ତ କୁଜଙ୍ଗ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରକୁ ନେଇଥିବାବେଳେ ସେଠାରେ ଡାକ୍ତର ମୃତ ଘୋଷଣା କରିଥିଲେ। ମହେଶ୍ୱର ଏହି ଅଞ୍ଚଳର ଜଣେ ଅଗ୍ରଣୀ ଚାଷୀ ଥିଲେ। ଚାଷ ହିଁ ତାଙ୍କ ପରିବାର ପ୍ରତିପୋଷଣର ଏକମାତ୍ର ପନ୍ଥା ଥିଲା। ତେଣୁ ତଳିଘେରା ନଷ୍ଟ ହୋଇଯାଇଥିବା ଦେଖି ସେ ହୃଦ୍ଘାତର ଶିକାର ହୋଇଥିବା ଗ୍ରାମବାସୀ କହିଛନ୍ତି।