ନୂଆଗାଁ, ୯ା୧(ଡି.ଏନ୍.ଏ.): ସୁନ୍ଦରଗଡ଼ ଜିଲା ସୀମାନ୍ତ ବିଶ୍ରା ବନାଞ୍ଚଳ ନୂଆଗାଁ ବ୍ଲକ ଚିତାପେଡି ପଞ୍ଚାୟତ ଅନ୍ତର୍ଗତ କୁଦାହୁଡାଙ୍ଗ ଜଙ୍ଗଲରେ ବୁଧବାର ଏକ ମାଈ ହାତୀର ମୃତଦେହ ମିଳିଛି। ହାତୀକୁ କେହି ମାରି ଦେଇଛନ୍ତି ନା ଅନ୍ୟ କୌଣସି କାରଣରୁ ମୃତ୍ୟୁ ଘଟିଛି ତାହା ଅସ୍ପଷ୍ଟ ରହିଛି। ମୃତଦେହ ବ୍ୟବଚ୍ଛେଦ ପରେ କାରଣ ଜଣାପଡିବ ବୋଲି ବିଶ୍ରା ବନ ବିଭାଗ ପକ୍ଷରୁ କୁହାଯାଇଛି।
ଗତ ୩ ଦିନ ତଳେ ସୁନ୍ଦରଗଡ଼ ଜିଲା ସୀମାନ୍ତ ରୁଙ୍ଘି ଜଙ୍ଗଲରେ ଏକ ହାତୀର ମୃତ୍ୟୁ ହୋଇଥିଲା। ଏହି ଘଟଣା ଝାଡ଼ଖଣ୍ଡ ଅଞ୍ଚଳରେ ଘଟିଥିବାରୁ ଝାଡ଼ଖଣ୍ଡ ବନବିଭାଗ ଏହାର ବ୍ୟବଚ୍ଛେଦ କରିଥିଲା। ବିଶ୍ରା ବନବିଭାଗ ମଧ୍ୟ ସେଠାକୁ ଯାଇ ଘଟଣାର ତଦନ୍ତ କରିଥିଲେ। ହେଲେ ଉକ୍ତ ହାତୀକୁ କେହି ଦୁର୍ବୃତ୍ତ ମାରିଥିଲେ ନା ନାହଁ ସ୍ପଷ୍ଟ ସୂଚନା ବନବିଭାଗ ତରଫରୁ ମିଳି ନ ଥିଲା । ଏପରିକି ବିଷାକ୍ତ ଖାଦ୍ୟ ହାତୀ ମୃତ୍ୟୁର କାରଣ ବି ହୋଇପାରେ ବୋଲି ସେତେବେଳେ ବିଶ୍ରା ବନବିଭାଗ ପକ୍ଷରୁ କୁହାଯାଇଥିଲା। ଉକ୍ତ ଘଟଣାର ୩ ଦିନ ପରେ ପୁଣି ବୁଧବାର ସୀମାବର୍ତ୍ତୀ କୁଦାହୁଡାଙ୍ଗ ଜଙ୍ଗଲରେ ଆଉ ଏକ ମାଈ ହାତୀ ମରିପଡିଥିବା ଗାଁ ଲୋକେ ଦେଖିଥିଲେ ଓ ବିଶ୍ରା ବନବିଭାଗକୁ ଖବର ଦେଇଥିଲେ। ଖବରପାଇ ପାନପୋଷ ଡିଏଫ୍ଓ ସଞ୍ଜୟ କୁମାର ସ୍ବାଇଁ, ଏସିଏଫ୍ ଦିଲୀପ କୁମାର ସାହୁ, ବିଶ୍ରା ରେଞ୍ଜର ମାଣିକେଶ୍ୱରୀ ହାଁସଦା, ଡେପୁଟି ରେଞ୍ଜର ମନୋଜ ଡିଗା ପ୍ରମୁଖ କୁଦାହୁଡାଙ୍ଗ ଜଙ୍ଗଲରେ ପହଞ୍ଚତ୍ ଘଟଣାର ତଦନ୍ତ କରୁଛନ୍ତି। ବନବିଭାଗ କହିବାନୁଯାୟୀ ମୃତ ହାତୀର କୌଣସି ସ୍ଥାନରେ କ୍ଷତଚିହ୍ନ ନାହିଁ। ତେଣୁ ତାକୁ କେହି ମାରିଛନ୍ତି ବୋଲି କହି ହେଉନାହିଁ। ଅନ୍ୟପକ୍ଷରେ ଗତ ୩ ଦିନ ଅନ୍ତରରେ ୨ କିଲୋମିଟର ବ୍ୟବଧାନରେ ୨ଟି ହାତୀର ମୃତ୍ୟୁ ଘଟଣା ନିଶ୍ଚିତ ଭାବେ ଉଦ୍ବେଗର ବିଷୟ। କିଛିମାସ ହେବ ଓଡ଼ିଶା ସୀମାନ୍ତ ଗାଁ କୁଦାହୁଡାଙ୍ଗ, ଲୋଆରମ, ଯୋକେତା, ସୋରଡା ଆଦିରେ ଝାଡ଼ଖଣ୍ଡ ହାତୀପଲ ରାତିରେ ପଶି ଧନଜୀବନ ନଷ୍ଟ କରୁଛନ୍ତି। ଲୋକେ ଏକ ପ୍ରକାର ମାନସିକ ସ୍ତରରେ ହାତୀପ୍ରତି କଠୋର ନୀତି ଅବଲମ୍ବନ କରୁଥିବା ଦେଖିବାକୁ ମିଳୁଛି। ଫଳସ୍ବରୂପ ହାତୀମାନଙ୍କୁ ସେମାନେ ଆକ୍ରମଣ ମଧ୍ୟ କରୁଛନ୍ତି ବୋଲି କୁହାଯାଉଛି।