କଟକ ଅଫିସ,୪ା୨: ସୋସିଆଲ ମିଡିଆ ଟିକ୍ଟକ୍ ଓ ଫେସ୍ବୁକ୍ରେ ଭାଇରାଲ ହୋଇଛି ରେଭେନ୍ଶା ବିଶ୍ୱବିଦ୍ୟାଳୟ କୁଳପତି ପ୍ରଫେସର ଇଶାନ କୁମାର ପାତ୍ରଙ୍କ ବ୍ୟଙ୍ଗ ଫଟୋ ଓ ଭିଡିଓ। ବିଶ୍ୱବିଦ୍ୟାଳୟର କେତେଜଣ ଛାତ୍ର ଓ ପୂର୍ବତନ ଛାତ୍ର ଏଭଳି କାର୍ଯ୍ୟ କରିଥିବା ଜଣାପଡିଛି।
ମିଳିଥିବା ସୂଚନା ଅନୁଯାୟୀ, କୁଳପତି ସମୂହ ପୂଜା ପାଳନକୁ ସମର୍ଥନ କରି ଭିନ୍ନଭିନ୍ନ ହଷ୍ଟେଲରେ ବ୍ୟକ୍ତିଗତ ଭାବେ ନ କରିବାକୁ ନୋଟିସ ଜାରି କରିଥିଲେ। ବିଶ୍ୱବିଦ୍ୟାଳୟର ଗୋଟିଏ ସ୍ଥାନରେ ହିଁ ସମୂହ ପୂଜା ହେବ ବୋଲି କୁହାଯାଇଥିଲା। ଗତ ଗଣେଶ ପୂଜାରେ ଏହି ନୋଟିସ କାର୍ଯ୍ୟକାରୀ କରାଯାଇଥିବାବେଳେ ଏହାକୁ ବିଶ୍ୱବିଦ୍ୟାଳୟର ଛାତ୍ରୀଛାତ୍ର ସମର୍ଥନ କରିଥିଲେ। ହେଲେ ସରସ୍ବତୀ ପୂଜାରେ ନିୟମକୁ କେହି ମାନି ନ ଥିଲେ। ସମସ୍ତ ହଷ୍ଟେଲରେ ପୃଥକ ଭାବେ ପାଳନ ହୋଇଥିଲା ସରସ୍ବତୀ ପୂଜା। ଏହି ପ୍ରସଙ୍ଗକୁ ଆଧାରକରି ବ୍ୟଙ୍ଗ ଭିଡିଓ ଓ ଫଟୋ ଭାଇରାଲ ହୋଇଛି। ‘କୁଳପତି ପଦରେ ରହିବାକୁ ଯୋଗ୍ୟ ନୁହନ୍ତି, ତାଙ୍କ ବାରଣ ସତ୍ତ୍ବେ ଛାତ୍ରୀଛାତ୍ର ନିଜ ଅଧିକାର ଜାହିର କରିଛନ୍ତି’ ବୋଲି ବ୍ୟଙ୍ଗାତ୍ମକ ଫଟୋରେ କ୍ୟାପସନ ଦିଆଯାଇଥିବା ଦେଖିବାକୁ ମିଳିଛି। ଏହାଛଡ଼ା ଭାରତୀୟ ଦଳର ଓପନିଂ ବ୍ୟାଟ୍ସମ୍ୟାନ କେ.ଏଲ. ରାହୁଲ ରେଭେନ୍ଶା ବିଶ୍ୱବିଦ୍ୟାଳୟର ପରବର୍ତ୍ତୀ କୁଳପତି ହେବେ ବୋଲି ବ୍ୟଙ୍ଗ ଫଟୋରେ ଉଲ୍ଲେଖ କରାଯାଇଛି। ଏ ନେଇ କୁଳପତି ପ୍ରଫେସର ପାତ୍ର କୁହନ୍ତି, କୁଳପତି ପଦବୀକୁ ସମ୍ମାନ ଦିଆଯିବା ଉଚିତ। ଖୁବ୍ଶୀଘ୍ର ଏ ସମ୍ପର୍କରେ ସାଇବର ସେଲ୍ରେ ଅଭିଯୋଗ କରାଯିବ। ଯେଉଁମାନେ ଏଭଳି କାର୍ଯ୍ୟ କରିଛନ୍ତି ସେମାନଙ୍କ ବିରୋଧରେ ଦୃଢ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ।