ବ୍ରହ୍ମଗିରି,୧୬ା୯(ଡି.ଏନ୍.ଏ.) : ବହୁ ପରିଶ୍ରମ ପରେ ପୁରୀ ଜିଲା କୃଷ୍ଣପ୍ରସାଦ ବ୍ଲକ ରାଜହଂସ କୂଳରେ ଲାଗିଥିବା ମାଲେସିଆ ଜାହାଜ ଜିନ୍ ହ୍ବା କୂଳ ଛାଡ଼ିଛି। ଏହାକୁ ଉଦ୍ଧାର କରିବା ପାଇଁ ଶନିବାର ପହଞ୍ଚତ୍ଥିବା ଏମ୍ଭି ଚିତା ନାମକ ଜାହାଜ ସାହଯ୍ୟରେ ରବିବାର ରାତି ୯ଟା ୩୦ରେ ଜିନ୍ ହ୍ବାକୁ ସମୁଦ୍ର ମଧ୍ୟକୁ ନିଆଯାଇଥିବା ଜଣାପଡ଼ିଛି। ରବିବାର ସକାଳୁ ଏହି ଜାହାଜଟି ଉଦ୍ଧାର କରିବା ପାଇଁ ଉଦ୍ୟମ ଆରମ୍ଭ କରାଯାଇଥିଲା। ଏମ୍ଭି ଚିତା ଉପକୂଳଠାରୁ ପ୍ରାୟ ଦେଢ କିଲୋମିଟର ଗଭୀର ସମୁଦ୍ରରେ ରହି ଚେନ ସାହାଯ୍ୟରେ ଭିଡିବା ପାଇଁ ଚେଷ୍ଟା କରିଥିଲା। ମାତ୍ର ଜିନ ହ୍ବା ବାଲିରେ ପୋତି ହୋଇଯାଇଥିବାରୁ ଏହାକୁ ଟାଣିବା ସମ୍ଭବପର ହୋଇ ନ ଥିଲା। ଜାହାଜକୁ ଉପକୂଳରୁ ଘୁଞ୍ଚାଇବା ପାଇଁ ଜେସିବି ସାହାଯ୍ୟରେ ବାଲି କଢା ଯାଇଥିଲେ ମଧ୍ୟ ବାରମ୍ବାର ବାଲି ଧସି ଆସି ଜାହାଜ ସହ ଲାଖି ଯାଉଥିଲା। ଶେଷରେ ମାଲେସିଆରୁ ଆସିଥିବା ୮ଜଣିଆ ଟିମ୍ ଜାହାଜକୁ କାଢ଼ିବାରେ ସଫଳ ହୋଇଥିଲେ।
ମାଲେସିଆର ଜିନ ହ୍ବା ଜାହାଜ ଗତ ମାସ ୮ ତାରିଖରେ ବୈଷୟିକ ତୃଟି ଯୋଗୁ ରାଜହଂସ ନିକଟରେ ଲାଗିଥିଲା। ଏହାର କଣ୍ଟେନରଟି ଅଲଗା ହୋଇ ସମୁଦ୍ର ଜୁଆର ମାଡରେ କ୍ଷତିଗ୍ରସ୍ତ ହୋଇ ଓଲଟି ପଡିଥିଲା। ଜାହାଜରେ ଭରିରହିଥିବା ତେଲ ଚିଲିକାର ଜୈବ ବିବିଧତା ଉପରେ ପ୍ରଭାବ ପକାଇବାର ଆଶଙ୍କା କରି ଏହାକୁ ତୁରନ୍ତ ନେବା ପାଇଁ ପ୍ରଶାସନ ତରଫରୁ ଜାହାଜର ମାଲିକଙ୍କୁ ନୋଟିସ କରାଯାଇଥିଲା। ପରବର୍ତ୍ତି ସମୟରେ ଏହି ଜାହାଜରେ ଥିବା ତେଲକୁ ପ୍ରଶାସନ ତରଫରୁ କଢାଯାଇଥିଲା। ତେଲ କଢା ଯିବାର ସାତ ଦିନ ମଧ୍ୟରେ ଜାହାଜଟିକୁ ଉପକୂଳରୁ ନେବା ପାଇଁ ଜିଲାପାଳ ନିର୍ଦ୍ଦେଶ ଦେଇଥିଲେ।