ଗଞ୍ଜାମ,୨୭ା୬(ଡି.ଏନ.ଏ.)-ଗଞ୍ଜାମ ବ୍ଲକ ଗୋଖରକୁଦାଠାରୁ ପ୍ରୟାଗୀ ଏବଂ ଦକ୍ଷିଣରେ ଥିବା ଆର୍ଯୀପଲ୍ଲୀ ପର୍ଯ୍ୟନ୍ତ ଦିନକୁ ଦିନ ସମୁଦ୍ର କୂଳ ଲଙ୍ଘୁଛି। ଏଥିଯୋଗୁ ଋଷିକୁଲ୍ୟା ବେଳାଭୂମି ଅବକ୍ଷୟ ହେବାରେ ଲାଗିଛି। ଋଷିକୁଲ୍ୟା ବେଳାଭୂମିରୁ ବଟେଶ୍ୱର ଶୈବପୀଠ ପର୍ଯ୍ୟନ୍ତ ବେଳାଭୂମି ଅଞ୍ଚଳ ସମ୍ପୂର୍ଣ୍ଣ ଭାବେ ସମୁଦ୍ରରେ ଲୀନ ହେବାକୁ ବସିଲାଣି। ବେଳାଭୂମି ନିକଟବର୍ତ୍ତୀ ଅଞ୍ଚଳରୁ ଝାଉଁବଣ କାଟିବା ଏହାର ମୁଖ୍ୟ କାରଣ ବୋଲି ପରିବେଶବିତମାନେ କହିଛନ୍ତି । କାଠ ମାଫିଆମାନେ ଅବାଧରେ ଏହାକୁ କାଟି ଜାଳେଣି ଓ ଅନ୍ୟାନ୍ୟ ବ୍ୟବହାରରେ ଲଗାଉଥିବା ଅଭିଯୋଗ ହୋଇଛି। ଏପରି ହେଲେ ଆଗାମୀ ଦିନରେ ସମୁଦ୍ରର ଅଶାନ୍ତ ଜୁଆର ଦ୍ୱାରା ନିକଟବର୍ତ୍ତୀ ଅଞ୍ଚଳ କ୍ଷତିଗ୍ରସ୍ତ ହେବା ଯଥେଷ୍ଟ ସମ୍ଭାବନା ରହିଛି। ୨୦୦୭ରୁ ସାମୁଦ୍ରିକ ଅଞ୍ଚଳରେ ସମୁଦ୍ର କୂଳ ଖାଇବା ଆରମ୍ଭ ହୋଇଥିବା ସ୍ଥାନୀୟ ଅଞ୍ଚଳବାସୀ ଯୋଗାଯୋଗ ବେଳେ ସୂଚନା ଦେଇଛନ୍ତି। ବେଳାଭୂମି ଅବକ୍ଷୟ ହେବାରୁ ପ୍ରତିବର୍ଷ ଗଞ୍ଜାମ ମୁହାଣକୁ ଗଣ ଅଣ୍ଡାଦାନ ପାଇଁ ଆସୁଥିବା ବିରଳ ଅଲିଭ ରିଡ୍ଲେ କଇଁଛମାନେ ମୁହଁ ଫେରାଇଲେଣି। ତାହା ଚଳିତ ବର୍ଷ ପ୍ରମାଣିତ ହୋଇଥିବା ଅଞ୍ଚଳବାସୀ କହିଛନ୍ତି। ସମୁଦ୍ର ଉଚ୍ଚ ଜୁଆର ଯୋଗୁ ବେଳାଭୂମି ହିଡ଼ ସୃଷ୍ଟି ହୋଇଥାଏ। ଫଳରେ କଇଁଛମାନେ ଉପରକୁ ଉଠି ନ ପାରି ଫେରି ଯାଉଥିବା ସେମାନେ କହିଛନ୍ତି। ଏଥିପାଇଁ ବନ ବିଭାଗ ପକ୍ଷରୁ ବେଳାଭୂମିରେ ପର୍ଯ୍ୟାପ୍ତ ପରିମାଣରେ ଚାରା ରୋପଣ କରାଯାଉଥିବା ବନ ବିଭାଗ ପକ୍ଷରୁ କୁହାଯାଇଛି । ପ୍ରକାଶ ଯେ, ୨୦୦୭ରେ କୂଳ ଖାଇବା ପରେ ସ୍ଥାନୀୟ ପୋଡ଼ମପେଟା ଅଞ୍ଚଳର ୧୪୨ ମତ୍ସ୍ୟଜୀବୀ ପରିବାରଙ୍କୁ ଅନ୍ୟତ୍ର ସ୍ଥାନାନ୍ତର କରାଯାଇଥିଲା।