ନୂଆଦିଲ୍ଲୀ, ୧୨।୪-ପାଣ୍ଡ୍ୟା ବ୍ରଦର୍ସଭାବେ ପରିଚିତ କୃନାଲ ଏବଂ ହାର୍ଦ୍ଦିକ ଭାରତୀୟ କ୍ରିକେଟରେ ଦୁଇ ପରଚିତ ନାମ। ଦୁହେଁ ଅଲରାଉଣ୍ଡର। କୃନାଲ ସ୍ପିନର ହୋଇଥିବାବେଳେ ହାର୍ଦ୍ଦିକ ମିଡିୟମ ପେସର। ତେବେ ଫର୍ମରେ ଥିବାବେଳେ କଷ୍ଟସାଧ୍ୟ ପରିସ୍ଥିତିରେ ବିସ୍ଫୋରକ ବ୍ୟାଟିଂ କରି ଦଳକୁ ବିପଦରୁ ଉଦ୍ଧାର କରିବାରେ ଉଭୟ ମାହିର। ଏହି ଦୁଇ ଭାଇ ସୟଦ ମୁସ୍ତାକ ଅଲୀ କ୍ରିକେଟ ଟୁର୍ନାମେଣ୍ଟରୁ ଆବିଷ୍କୃତ ହୋଇଥିଲେ। ପୂର୍ବତନ କୋଚ୍ ଜନ୍ ରାଇଟ୍ ଏହି ଦୁଇଭାଇଙ୍କ ପ୍ରତିଭାକୁ ଚିହ୍ନି ମୁମ୍ବାଇ ଇଣ୍ଡିଆନ୍ସ ଦଳରେ ସୁଯୋଗ ଦେଇଥିଲେ। ପରେ ପ୍ରଦର୍ଶନ ଭିତ୍ତିରେ ଦୁହେଁ ଜାତୀୟ ଦଳରେ ପ୍ରବେଶ କରିଥିଲେ। ପିଠିରେ ଯନ୍ତ୍ରଣା ଯୋଗୁ ହାର୍ଦ୍ଦିକ କିଛିଦିନଧରି କ୍ରିକେଟରୁ ଦୁରେଇ ରହିଛନ୍ତି। ଗତବର୍ଷ ଅଗଷ୍ଟରେ ସେ ଅସ୍ତ୍ରୋପଚାର ମଧ୍ୟ କରାଇଛନ୍ତି। କୃନାଲ ଭାରତୀୟ ଟି୨୦ ଦଳର ଜଣେ ନିୟମିତ ସଦସ୍ୟ ପାଲଟିଛନ୍ତି। ଗତ ମାସରେ ହେବାକୁଥିବା ଦକ୍ଷିଣ ଆଫ୍ରିକା ବିପକ୍ଷ ଦିନିକିଆ ସିରିଜରେ ହାର୍ଦ୍ଦିକଙ୍କ ପାଇଁ ପ୍ରତ୍ୟାବର୍ତ୍ତନ ସୁଯୋଗ ଥିଲା। ମାତ୍ର କରୋନା ଭାଇରସ୍ ସଂକ୍ରମଣର ପ୍ରଭାବରୁ ଏହି ସିରିଜ ବାତିଲ ହୋଇଗଲା ।
ଇଣ୍ଡିଆନ ପ୍ରିମିୟର ଲିଗ୍(ଆଇପିଏଲରେ) ଦୁଇଭାଇ ମୁମ୍ବାଇ ଇଣ୍ଡିଆନ୍ସ ପକ୍ଷରୁ ଖେଳିଥାନ୍ତି। ଭାରତୀୟ କ୍ରିକେଟ ଦଳର ପୂର୍ବତନ କୋଚ୍ ଜନ୍ ରାଇଟ ପରେ ମୁମ୍ବାଇ ଇଣ୍ଡିଆନ୍ସର ମଧ୍ୟ କୋଚ୍ ଥିଲେ । ଏହି ଅବସରରେ ସେ ସୟଦ ମୁସ୍ତାକ ଅଲୀ କ୍ରିକେଟ ଟୁର୍ନାମେଣ୍ଟରେ କୃନାଲ ଓ ହାର୍ଦ୍ଦିକଙ୍କ ପ୍ରଦର୍ଶନକୁ ଦେଖି ପ୍ରଭାବିତ ହୋଇଥିଲେ । ଏ ସମ୍ପର୍କରେ ଅତୀତକୁ ମନେ ପକାଇଛନ୍ତି କୃନାଲ। ”ଅତୀତରେ ଏକଦା ସ୍ପିଡ୍ ପୋଷ୍ଟ ସରକାରୀ ଚାକିରି ଟ୍ରାଏଲ ପାଇଁ ମୋତେ ପତ୍ର ମିଳିଥିଲା। ବାପା କହିଥିଲେ ଯେ, ଏହା ଏକ ଭଲ ସୁଯୋଗ। ମାସକୁ ୧୫ରୁ ୨୦ ହଜାର ଟଙ୍କା ମିଳିବ, ତେଣୁ ତୁମେ ଏଥିପାଇଁ ଚେଷ୍ଟା କରିବା ଉଚିତ। ମାତ୍ର ସେହି ସମୟରେ ମୋତେ ବରୋଦା ଟିମ୍ ପକ୍ଷରୁ ସୟଦ ମୁସ୍ତାକ ଅଲୀ ଟ୍ରଫି ପାଇଁ ମଧ୍ୟ ଟ୍ରାଏଲ ସୁଯୋଗ ମିଳିଥିଲା। ମୁଁ ପୂର୍ବ ୨-୩ ବର୍ଷ ଧରି କଠିନ ପରିଶ୍ରମ କରିଥିବାରୁ ଜଣେ ଖେଳାଳି ହେବାକୁ ଉଚିତ ମନେ କଲି। ମୁଁ ବରୋଦା ଟିମ୍ ଟ୍ରାଏଲକୁ ଗଲି ଏବଂ ଭଲ ପ୍ରଦର୍ଶନ କରି ଚୟନ ହେଲି । ହାର୍ଦ୍ଦିକ ପୂର୍ବରୁ ଟିମ୍ରେ ଥିଲେ। ଆମେ ସାଥିହୋଇ ସୟଦ ମୁସ୍ତାକ ଅଲୀ ମ୍ୟାଚ ମୁମ୍ବାଇରେ ଖେଳିଲୁ। ମୁମ୍ବାଇ ଇଣ୍ଡିଆନ୍ସ କୋଚ୍ ଜନ ରାଇଟ ଆମ ଦୁଇ ଭାଇଙ୍କ ପ୍ରତିଭାରେ ପ୍ରଭାବିତ ହେଲେ ଏବଂ ଆମ ନିକଟରେ ବହୁ ପ୍ରତିଭାଥିବା କଥା କହିଲେ। ସେ ଆମ ଦୁହିଁଙ୍କୁ ଚୟନ କଲେ ଏବଂ ଆମ ଜୀବନଶୈଳୀ ବଦଳି ଗଲା“ ବୋଲି ହାର୍ଦ୍ଦିକ ପ୍ରକାଶ କରିଛନ୍ତି। ଯଦି ସେତେବେଳେ ମୁଁ ବରୋଦା ଦଳର ଟ୍ରାଏଲକୁ ନ ଆସି ସ୍ପିଡ୍ ପୋଷ୍ଟ ଚାକିରି ଟ୍ରାଏଲକୁ ଯାଇଥାନ୍ତି ତେବେ ସମ୍ଭବତଃ ଆମ ଜୀବନଶୈଳୀ ଭିନ୍ନ ହୋଇଥାନ୍ତା ବୋଲି କୃନାଲ କହିଛନ୍ତି ।
