କେନ୍ଦୁଝର, ୧୫ା୫ (ସ୍ବ.ପ୍ର.) କେନ୍ଦୁଝର ଜିଲାରେ ଚାଷୀମାନେ ୨୦୧୫ରେ ପ୍ରିମିୟମ ଅର୍ଥ ଦେଇଥିଲେ ହେଁ ମରୁଡି ଯୋଗୁ୍ କ୍ଷତିଗ୍ରସ୍ତ ହୋଇଥିବା ବହୁ ଚାଷୀଙ୍କୁ ଅଦ୍ୟାବଧି କୃଷିବୀମା ବାବଦ ଅର୍ଥ ମିଳୁ ନ ଥିବାରୁ ଚିନ୍ତାରେ ରହିଛନ୍ତି। ସରକାର କାଳିଆ ଯୋଜନାରେ ଚାଷୀଙ୍କୁ ସହାୟତା ଦେଉଥିବା କହୁଥିବା ବେଳେ କ୍ଷତିଗ୍ରସ୍ତ ଚାଷୀଙ୍କ କ୍ଷତିପୂରଣ ଦେବାରେ ଅବହେଳା କାହିଁକି କରୁଛନ୍ତି ବୋଲି ଚାଷୀମାନେ ପ୍ରଶ୍ନ କରିଛନ୍ତି। କ୍ଷତିପୂରଣ ପାଇଁ ବିଭିନ୍ନ ବିଭାଗ ଓ ଜିଲା ପ୍ରଶାସନର ଦ୍ୱାରସ୍ଥ ହୋଇ ନ ପାଇବାରୁ ଧାରକରଜ କରି ଉଚ୍ଚ ନ୍ୟାୟାଳୟର ଦ୍ୱାରସ୍ଥ ହେବାକୁ ପଡିଛି।
ଏଭଳି ଝୁମ୍ପୁରା ବ୍ଲକର ଖୁଣ୍ଟାପଡା ଓ ଅର୍ଶଳା ପଞ୍ଚାୟତର ବାରଖଣ୍ଡିଆ, ମହାଦେବପୁର, ଅସୁକି, ଖୁଣ୍ଟାପଡା, ଅର୍ଶଳା, ଦୁର୍ଗାପୁର, ଅନ୍ଧାରୀ ଖମଣ, ସୁଣ୍ଢି ମୁରୁସୁଆଁ, ବଳଭଦ୍ରପୁର, ପ୍ରଭାତିପୁର ଆଦି ଗ୍ରାମର ୫୦ ଜଣ ଚାଷୀ ଉଚ୍ଚ ନ୍ୟାୟାଳୟଙ୍କ ଦ୍ୱାରସ୍ଥ ହୋଇ ପିଟିଶନ ଦାଖଲ କରିଥିଲେ ା ରିଟ୍ ପିଟିଶନ କେସ ନମ୍ବର ୬୩୨୭, ୬୩୨୮, ୬୩୨୯,୬୩୩୦, ୬୩୩୧ର ଶୁଣାଣି କରି ଉଚ୍ଚ ନ୍ୟାୟାଳୟ ଏପ୍ରିଲ ୮, ୨୦୧୯ ରେ ଜିଲାପାଳଙ୍କୁ ଚାଷୀଙ୍କ ଅଭିଯୋଗର ଶୁଣାଣି ୪ ମାସ ମଧ୍ୟରେ କରିବାକୁ ଆଦେଶ କରିଛନ୍ତି।
ଏ ନେଇ ସୋମବାର ଧରଣୀଧର ସାହୁ, ଦୁର୍ଯ୍ୟୋଧନ ପ୍ରଧାନ, ପ୍ରସନ୍ନ କୁମାର ନାଏକ, ଦୁର୍ଲ୍ଲଭ ବେହେରା, ଦୁଃଖବନ୍ଧୁ ବାରିକ, ନୀଳମଣି ବେହେରା, ପ୍ରମୋଦ କୁମାର ସାହୁ, ପରମାନନ୍ଦ ଦଣ୍ଡସେନାଙ୍କ ସମେତ ଚାଷୀମାନେ ଜିଲାପାଳଙ୍କୁ ଲିଖିତ ରାୟର କପି ସହ ଜଣାଇ ତୁରନ୍ତ ଫଇସଲା କରି ବୀମା ଅର୍ଥ ଦେବାକୁ ଦାବି କରିଛନ୍ତି। ଏ ନେଇ ଜିଲାପାଳ ଆବେଦନକାରୀଙ୍କୁ ଶୁଣାଣି କରିବାକୁ କୋର୍ଟ ଆଦେଶ କରିଛନ୍ତି। ଜିଲାର କ୍ଷତିଗ୍ରସ୍ତ ସମସ୍ତ ଚାଷୀଙ୍କୁ ସେମାନଙ୍କ କ୍ଷତିପୂରଣ ବାବଦକୁ ବୀମା ଅର୍ଥ ଦେବାକୁ ଦାବି ହେଉଛି।