ଚନ୍ଦାହାଣ୍ଡି, ୧୮ା୪ (ଡି.ଏନ.ଏ.)-ନବରଙ୍ଗପୁର ଜିଲା ଚନ୍ଦାହାଣ୍ଡି ବ୍ଲକରେ ମୋହରା ପଞ୍ଚାୟତ ଅନ୍ତର୍ଗତ ପୂଜାରୀଗୁଡା ଗ୍ରାମରେ କୃଷିଭିତ୍ତିକ ପର୍ବ ବିହନ ଛିନା ପାଳନ କରାଯାଇଛି । ଏହି ବ୍ଲକରେ ବିଭିନ୍ନ ଗ୍ରାମରେ ଭିନ୍ନ ଭିନ୍ନ ଭାବରେ ତିଥି ବାର ଦେଖି ପୂଜାରୀଙ୍କ ନିର୍ଦ୍ଦେଶରେ ବିହନ ଛିନା ଅନୁଷ୍ଠିତ ହୋଇଥାଏ। ଚାଷର ପ୍ରଥମ ପର୍ବ ହେଉଛି ବିହନ ଛିନା । ଆଦିବାସୀ ସଂପ୍ରଦାୟରେ ଏହା ବିଶେଷ ଭାବେ ପାଳିତ ହେଉଥିବାବେଳେ ଗାଁର ସମସ୍ତ ସଂପ୍ରଦାୟର ଲୋକେ ଏଥିରେ ଭାଗ ନେଇଥାଆନ୍ତି । ଏହା ଗାଁ ଗହଳିରେ ବିଶେଷ ଭାବରେ ଦୁଇଦିନ ଧରି ପାଳିତ ହୁଏ । ପ୍ରଥମ ଦିନରେ ଗାଁରେ ଥିବା ମାଟିଦେବତାଙ୍କ ପୀଠରେ ପିତାବିହନ ପାଳିତ ହୁଏ । ଗାଁ ପୂଜାରୀ ପାରମ୍ପରିକ ରୀତିରେ ମାଟିଦେବତାଙ୍କୁ ପୂଜା କଲା ପରେ ସେଠାରେ ଘୁଷୁରୀ ଏବଂ କୁକୁଡା ବଳୀ ଦିଆଯାଇଥାଏ। ଘୁଷୁରି ଏବଂ କୁକୁଡା ମୁଣ୍ଡକୁ ମାଟିଦେବତାଙ୍କ ପୀଠରେ ପୋତି ଦେବା ପରେ ତାର ଅନ୍ୟ ଅଂଶକୁ ନେଇ ଗାଁ ବାହାରେ ରାନ୍ଧି ଖିଆଯାଇଥାଏ । ମାଟି ଦେବତାଙ୍କ ପୂଜା ବିଶେଷତଃ ରାତିରେ କରାଯାଇଥାଏ। ତା’ ପରଦିନ ଗାଁ ବାହାରେ ଥିବା ବିହନ ଛିନା ଗୁଡି ପାଖରେ ଗାଁର ସମସ୍ତେ ଏକତ୍ରିତ ହୋଇଥାଆନ୍ତି । ସେଠାରେ ପୂଜାରୀ ପୂଜାପାଠ ପରେ ମେଣ୍ଢା ବଳୀ ଦିଆଯାଇଥାଏ ।ଉକ୍ତ ରକ୍ତଭିଜା ଚାଉଳକୁ ସମସ୍ତ ଚାଷୀ ମୁଣ୍ଡରେ ଟିକା ଦେଇଥାନ୍ତି । ଏହା ପରେ ସେଠାରେ ପିପଳ ଗଛର ପତ୍ରରେ ପୋଢ କରାଯାଏ । ଡାଳରେ ଲଙ୍ଗଳ କରାଯାଇ ସେଠାରେ ଏକ ସ୍ଥାନରେ କାଦୁଅ କରାଯାଏ । ଚାଷୀମାନେ ଘରୁ ନେଇଥିବା ଧାନବିହନକୁ ପୂଜାରୀ ପୂଜା କରିଥାଏ । ପୂଜା ପରେ କାଦୁଅ ବୋଳା ପର୍ବ ଅନୁଷ୍ଠିତ ହୁଏ । ଚାଷୀମାନେ ନୂଆ ବସ୍ତ୍ରରେ ପୂଜାରୀ ଦେଇଥିବା ଧାନକୁ ନେବା ପରେ ସେଠାରେ ସମସ୍ତେ କାଦୁଅ ଖେଳିଥାନ୍ତି । ସମସ୍ତଙ୍କ ପଛପଟେ କାଦୁଅ ବୋଳାଯାଏ । ଏହା ପରେ ବଳି ଦିଆଯାଇଥିବା ମେଣ୍ଢାକୁ ଗ୍ରାମବାସୀ ସମସ୍ତେ ରାନ୍ଧି ଖାଇଥାଆନ୍ତି । ପରେ ପୂଜାରୀଙ୍କୁ ଧରି ସମସ୍ତେ ଗ୍ରାମକୁ ଫେରନ୍ତି । ଗାଁ ପୂଜାରୀ ଘରେ ଏକ ବୈଠକ ହୋଇଥାଏ । ଗାଁର ସମସ୍ତ ଚାଷୀଙ୍କୁ ଚଳିତବର୍ଷ ଭଲ ଫସଲ ହେଉ ବୋଲି ଆଶ୍ୱାସନା ଦେଇଥାନ୍ତି। ପୂଜାରୀଙ୍କ ଦ୍ୱାରା ପୂଜା କରାଯାଇଥିବା ଧାନକୁ ଚାଷୀ କ୍ଷେତରେ ଅକ୍ଷୟ ତୃତୀୟା ଦିନ ଅକ୍ଷିମୁଠି ଅନୁକୂଳ କରିଥାଏ ।