ଗୋପ, ୨୨।୮(ଡି.ଏନ୍.ଏ.)-ଗୋପ ବ୍ଲକ୍ ଅଧୀନ ବଡ଼ତରା ସେବା ସମବାୟ ସମିତିରୁ ଚାଷୀମାନଙ୍କୁ କୃଷି ଋଣ ମିଳୁ ନ ଥିବା ନେଇ ଚାଷୀମାନେ ଗୁରୁବାର ୫ରୁ ଊର୍ଦ୍ଧ୍ୱ ମିଳିତ ଦେୟ ଗୋଷ୍ଠୀର ସଦସ୍ୟାମାନେ ଧାରଣା ଦେଇଥିଲେ। ସେବା ସମବାୟ ସମିତି ସମ୍ପାଦକ ବ୍ରଜବନ୍ଧୁ ପାତ୍ର ପହଞ୍ଚତ୍ ଖୁବ୍ ଶୀଘ୍ର ଋଣ ପ୍ରଦାନ କରାଯିବ ବୋଲି ପ୍ରତିଶ୍ରୁତି ଦେବା ପରେ ଧାରଣା ପ୍ରତ୍ୟାହୃତ ହୋଇଥିଲା। ସରକାର କୃଷି ଓ କୃଷକଙ୍କ ଉନ୍ନତି ଲାଗି ବିଭିନ୍ନ ଯୋଜନା ପ୍ରଣୟନ କରିଥିବାବେଳେ ଚାଷ କାର୍ଯ୍ୟ କରିବା ଲାଗି ବିନା ସୁଧରେ କୃଷି ଋଣ ଯୋଗାଇ ଦେଉଛନ୍ତି। ମାତ୍ର ବଡ଼ତରା ସେବା ସମବାୟ ସମିତିରୁ ମିଳିତ ଦେୟ ଗୋଷ୍ଠୀ ମାଧ୍ୟମରେ ଋଣ ନେଇଥିବା କେତେକ ଗୋଷ୍ଠୀ ଋଣ ପରିଶୋଧ କରିଥିଲେ। ପୁନରାୟ ଋଣ ଯୋଗାଇବା ଲାଗି ବାରମ୍ବାର ସମବାୟ କାର୍ଯ୍ୟାଳୟକୁ ଦୌଡ଼ୁଥିଲେ ବି କର୍ମଚାରୀଙ୍କ ଅନୁପସ୍ଥିତି ଯୋଗୁ ସେମାନେ ଫେରିବାକୁ ବାଧ୍ୟ ହେଉଥିଲେ। ଏହି ଧାରଣାରେ ଲକ୍ଷ୍ମୀ କାଣ୍ଡି, ଶାନ୍ତିଲତା ବାରିକ, ରଶ୍ମିତା ମଲ୍ଲିକ୍ ପ୍ରମୁଖ ସାମିଲ ହୋଇଥିଲେ।