ଛେଣ୍ତିପଦା,୧୬।୯(ସ୍ବ.ପ୍ର) ଛେଣ୍ଡିପଦା ବ୍ଲକ ଚାଙ୍ଗୁଡିଆ ସମବାୟ ସମିତିରେ ଚାଷୀଙ୍କ ଋଣ ଟଙ୍କା ହଡପ ହୋଇଥିବା ନେଇ ରବିବାର ଥାନାରେ ଅଭିଯୋଗ ହୋଇଛି। ଅଭିଯୋଗ ପାଇ ପୋଲିସ କେସ ନଂ. ୨୭୩/୧୯ରେ ଏକ ମାମଲା ରୁଜୁ କରି ସମବାୟ ସମିତିର ସଭାପତିଙ୍କୁ ଅଟକ ରଖି ପଚରା ଉଚରା ଚଳାଇଛି। ଅନ୍ୟପକ୍ଷରେ ସମିତି ସେକ୍ରେଟାରୀଙ୍କୁ ପୋଲିସ ପଚରା ଉଚରା ପରେ ପୋଲିସ ଛାଡି ଦେଇଥିବା ଜଣାପଡ଼ିଛି। ଟଙ୍କା ହଡ଼ପର ଶିକାର ହୋଇଥିବା ସେହି ଗ୍ରାମର ଚାଷୀ ଭିକାରୀ ସାହୁ ଅଭିଯୋଗରେ ଦର୍ଶାଇଛନ୍ତି, ସମିତିର ଅନେକ ଚାଷୀଙ୍କ ଅଗୋଚରରେ ସେମାନଙ୍କ ଖାତାରେ କୃଷି ଋଣ କରାଯାଇଛି। କିନ୍ତୁ ଋଣ ଟଙ୍କା ଚାଷୀଙ୍କୁ ନ ଦିଆଯାଇ ସମିତି ପକ୍ଷରୁ ଏନଇଏଫଟି ମାଧ୍ୟମରେ ହଡପ କରିଛନ୍ତି। ତାଙ୍କୁ ମିଶାଇ ବାବୁଲି ସାହୁ, ସୁଧାକର ସାହୁ, ଟୁଟୁ ସାହୁ, ଚିନ୍ତ ସାହୁ ପ୍ରମୁଖଙ୍କ ନାମରେ ଟଙ୍କା ଋଣ କରାଯାଇ ଲୁଟ୍ ହୋଇଥିବା ଅଭିଯୋଗରେ ଉଲ୍ଲେଖ ରହିଛି। ବାବୁଲି ସାହୁଙ୍କ ନାମରେ ୧୦,୦୦୦ ଟଙ୍କା ଋଣ ହୋଇଥିବାବେଳେ ୮୦୦୦ ଟଙ୍କା ପାଇଛନ୍ତି। ସେହିପରି ଭିକାରୀ ସାହୁଙ୍କ ନାମରେ ୧୨୫୦୦ ଟଙ୍କା ଋଣ ହୋଇଥିବାବେଳେ ସେ ୭୦୦୦ ଟଙ୍କା ପାଇଥିବା ଅଭିଯୋଗ କରିଛନ୍ତି। ସୁଧାକର ସାହୁଙ୍କ ନାମରେ ୨୨୦୦୦ ଓ ଟୁଟୁ ସାହୁଙ୍କ ନାମରେ ୧୦୦୦୦୦ ଟଙ୍କା ଋଣ ହୋଇଥିବାବେଳେ ଉଭୟେ ଆଦୌ ଅର୍ଥ ପାଇନାହାନ୍ତି। ଚିନ୍ତ ସାହୁଙ୍କ ନାମରେ ୨୦୦୦୦ ଟଙ୍କା ଋଣ ହୋଇଥିବାବେଳେ ୬୦୦୦ ଟଙ୍କା ପାଇଥିବା ଅଭିଯୋଗପତ୍ରରେ ଦର୍ଶାଯାଇଛି। ଏ ନେଇ ଥାନା ଅଧିକାରୀ ସତ୍ୟବ୍ରତ ରାଉତ କହିଛନ୍ତି, ସମିତିର ସଭାପତିଙ୍କୁ ଅଟକ ରଖାଯାଇ ଘଟଣାର ତଦନ୍ତ ଚାଲିଛି। ପ୍ରାଥମିକ ତଦନ୍ତରୁ ୪ ଲକ୍ଷରୁ ଊଦ୍ଧର୍ବ ଟଙ୍କାର ଦୁର୍ନୀତି ହୋଇଥିବା ଅନୁମାନ କରାଯାଉଛି। ତଦନ୍ତ ପରେ କେତେ ଟଙ୍କା ହଡ଼ପ ହୋଇଛି ଓ ଏହି ଘଟଣାରେ କେଉଁମାନେ ସମ୍ପୃକ୍ତ ଅଛନ୍ତି ଜଣାପଡିବ।