ଭୁବନେଶ୍ୱର,୨।୨(ବ୍ୟୁରୋ): ୨୦୨୦-୨୧ ଆର୍ଥିକବର୍ଷ ପାଇଁ ଶନିବାର କେନ୍ଦ୍ର ସରକାର ପାର୍ଲାମେଣ୍ଟରେ ବଜେଟ ଉପସ୍ଥାପନ କରିଛନ୍ତି। ଏହି ବଜେଟରେ ନିଆଯାଇଥିବା କେତେକ ପଦକ୍ଷେପକୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ସ୍ବାଗତ କରିଥିବା ବେଳେ କେନ୍ଦ୍ରୀୟ ଟିକସ ହ୍ରାସ, ପୁଞ୍ଜିନିବେଶ, ନିଯୁକ୍ତି, କେନ୍ଦ୍ରୀୟ ଅନୁଦାନ, ସଂସ୍କୃତି ଓ ପର୍ଯ୍ୟଟନ କ୍ଷେତ୍ରକୁ ଅଣଦେଖା କରାଯାଇଥିବାରୁ ଉଦ୍ବେଗ ପ୍ରକାଶ କରିଛନ୍ତି। ଲୋକସେବା ଭବନଠାରେ ନିଜ ପ୍ରତିକ୍ରିୟାରେ ମୁଖ୍ୟମନ୍ତ୍ରୀ କହିଛନ୍ତି ଯେ କୃଷି, ରେଳ ଏବଂ କୃଷି ଉଡାନ, ପିଏମ୍-କୁସୁମରେ ୨୦ ଲକ୍ଷ ଚାଷୀଙ୍କୁ ସୌରଚାଳିତ ପମ୍ପ ଯୋଗାଇବା, ଡିଭିଡେଣ୍ଟ ଡିଷ୍ଟ୍ରିବ୍ୟୁଶନ ଟିକସ ଉଚ୍ଛେଦ ଓ କନ୍ସେସନାଲ ଟିକସ ଆଦିକୁ ବଜେଟରେ ଅନ୍ତର୍ଭୁକ୍ତ କରିବାକୁ ମୁଖ୍ୟମନ୍ତ୍ରୀ ସ୍ବାଗତ କରିଛନ୍ତି। ମୁଖ୍ୟମନ୍ତ୍ରୀ କହିିଛିନ୍ତି ଯେ ସମବାୟ ସଂସ୍ଥାଗୁଡିକୁ ଟିକସ ରିହାତି ବ୍ୟବସ୍ଥାକୁ ବଢାଇବା ପାଇଁ ରାଜ୍ୟ ସକରାର ଅନୁରୋଧ କରିଥିଲେ। ଏହାକୁ ଗ୍ରହଣ କରାଯାଇଥିବାରୁ ମୁଖ୍ୟମନ୍ତ୍ରୀ ଖୁସି ବ୍ୟକ୍ତ କରିଛନ୍ତି। କେନ୍ଦ୍ର ବଜେଟରେ ବ୍ୟାଙ୍କଗୁଡିକରେ ଜମାପୁଞ୍ଜି ବୀମା ବ୍ୟବସ୍ଥାକୁ ୧ ଲକ୍ଷ ଟଙ୍କାରୁ ୫ ଲକ୍ଷକୁ ବୃଦ୍ଧି କରାଯାଇଛି। ଏଥିସହିତ ନୂତନ ଶିକ୍ଷାନୀତି ଓ ଶିକ୍ଷା କ୍ଷେତ୍ରରେ ବିଦେଶୀ ପୁଞ୍ଜିବିନିଯୋଗକୁ ମୁଖ୍ୟମନ୍ତ୍ରୀ ସ୍ବାଗତ କରିଛନ୍ତି।
ଅନ୍ୟପକ୍ଷରେ କେନ୍ଦ୍ର ପ୍ରବର୍ତ୍ତିତ ଯୋଜନାରେ ଏହି ବଜେଟରେ କୌଣସି ଆଖିଦୃଶିଆ ବ୍ୟୟ ବରାଦ ନ କରି ସ୍ଥାଣୁ କରାଯାଇ ଥିବାରୁ ମୁଖ୍ୟମନ୍ତ୍ରୀ ଚିନ୍ତା ପ୍ରକଟ କରିଛନ୍ତି। ରାଜ୍ୟ ଅଂଶଧନ କେନ୍ଦ୍ରୀୟ ଟିକସକୁ ପ୍ରାୟ ୫୯ ହଜାର କୋଟି ଟଙ୍କାକୁ ହ୍ରାସ କରାଯାଇଥିବାରୁ ଓଡିଶା ଏ ବାବଦରେ ପ୍ରାୟ ୩ ହଜାର କୋଟି ହରାଇବ ବୋଲି ମୁଖ୍ୟମନ୍ତ୍ରୀ ଅନୁମାନ କରିଛନ୍ତି। ଆଇକନିକ ସାଇଟରେ ଓଡିଶାର କୌଣସି ପ୍ରତ୍ନତତ୍ତ୍ୱ ସ୍ଥଳକୁ ସାମିଲ କରାଯାଇ ନାହିଁ। ଓଡିଶା ଆଦିବାସୀ ବହୁଳ ରାଜ୍ୟ ହୋଇଥିଲେ ମଧ୍ୟ ଏଠାରେ ଜାତୀୟ ଆଦିବାସୀ ମ୍ୟୁଜିୟମ ନ କରିବା ପ୍ରସ୍ତାବକୁ ନେଇ ମୁଖ୍ୟମନ୍ତ୍ରୀ ଅସନ୍ତୋଷ ବ୍ୟକ୍ତି କରିଛନ୍ତି । ପାନୀୟ ଜଳ ଯୋଗାଣ ଏକ ଜାତୀୟ ଗୁରୁତ୍ୱ । ୩.୬ ଲକ୍ଷ କୋଟି ବ୍ୟୟ ବରାଦ ଜାଗାରେ ହୋଇଛି ମାତ୍ର ୧୧,୫୦୦ କୋଟି । ଓଡିଶା ପାନୀୟ ଜଳ ଯୋଗାଣ କ୍ଷେତ୍ରରେ ୩୬୦୦ କୋଟି ଟଙ୍କା ଖର୍ଚ୍ଚ କରି ସାରିଲାଣି। ଦେଶର ସେନ୍ସେକ୍ସ ୧ ହଜାର ପଏଣ୍ଟ ତଳକୁ ଖସିବା ଅର୍ଥ ଏହି ବଜେଟ ନୈରାଶ୍ୟଜନକ ଅବସ୍ଥାକୁ ସୂଚାଉଛି । ନୂତନ ପୁଞ୍ଜିନିବେଶ ପାଇଁ ପୁଞ୍ଜିନିବେଶକାରୀଙ୍କ ବିଶ୍ୱାସ ସବୁଠୁ ଗୁରୁତ୍ୱପୂର୍ଣ୍ଣ। ବର୍ତ୍ତମାନ ଧିମା ଅଭିବୃଦ୍ଧି ଏକ ବଡ ସମସ୍ୟା ଭାବେ ଉଭା ହୋଇଛି। ଏହା ନିଯୁକ୍ତି ସୁଯୋଗ ସୃଷ୍ଟି କରିବା ଏବଂ ଆମ ଯୁବବର୍ଗଙ୍କର ଜୀବିକା ବାଛିବା କ୍ଷେତ୍ରରେ ଏକ ବଡ ପ୍ରଭାବ ପକାଇବ ବୋଲି ମୁଖ୍ୟମନ୍ତ୍ରୀ କହିଛନ୍ତି।