ରଣଜୀ ଟ୍ରଫି ଦେଶର ସବୁଠୁ ଗୁରୁତ୍ୱପୂର୍ଣ୍ଣ ଘରୋଇ କ୍ରିକେଟ ପ୍ରତିଯୋଗିତା। ଏଥିରୁ ହିଁ ଖେଳାଳିଙ୍କୁ ଭାରତୀୟ ଦଳ ପାଇଁ ଚୟନ କରାଯାଏ। କିନ୍ତୁ ଏହି ରଣ୍ଜୀ ଟ୍ରଫି ପ୍ରଥମେ କେଉଁ ଭଳି ଆରମ୍ଭ ହୋଇଥିଲା, ତାହା ପ୍ରାୟ ପ୍ରଶଂସକଙ୍କୁ ଜଣା ନ ଥିବ। ଇଂରେଜ ଶାସନ ଅମଳରେ ନଓ୍ବାନଗର ନାମକ ଏକ ରାଜ୍ୟ ଥିଲା। ଏବେ ତାହା ବିହାରର ଅଂଶବିଶେଷ। ସେତେବେଳେ ସେଠାରେ ସିହ୍ନାଜି ରାଜ ବଂଶ ରାଜୁତି କରୁଥିଲେ। ୧୮୭୨ ମସିହା ସେପ୍ଟେମ୍ବର ୧୦ ତାରିଖରେ ରାଜ ପରିବାରେ ଜନ୍ମଗ୍ରହଣ କରିଥିଲେ ରଣଜିତସିହ୍ନାଜି। ସେ ବେଙ୍ଗଲରେ ଶିକ୍ଷା ଗ୍ରହଣ କରୁଥିବାବେଳେ କଲେଜ ଅଧ୍ୟକ୍ଷଙ୍କଠାରୁ କ୍ରିକେଟ ବିଷୟରେ ଜାଣିବାକୁ ସୁଯୋଗ ପାଇଥିଲେ। ପରେ ସେ କ୍ରିକେଟ ଖେଳିବା ଆରମ୍ଭ କରିଥିଲେ। ସେ ସସେକ୍ସ ପାଇଁ ପଦାର୍ପଣ ଫାଷ୍ଟ କ୍ଲାସ ମ୍ୟାଚ୍ରେ ୭୭ ଓ ୧୫୦ ରନ୍ କରିଥିଲେ। କିଛି ଦିନ ପରେ ରଣଜିତସିହ୍ନାଜି ଇଂଲଣ୍ଡ ପାଇଁ ପଦାର୍ପଣ କରିଥିଲେ। ଅଷ୍ଟ୍ରେଲିଆ ବିପକ୍ଷ ପ୍ରଥମ ଅନ୍ତର୍ଜାତୀୟ ମ୍ୟାଚ୍ରେ ମଧ୍ୟ ଅର୍ଦ୍ଧଶତକ ଓ ଶତକ ହାସଲ କରିଥିଲେ। ଅନ୍ତର୍ଜାତୀୟ କ୍ରିକେଟ ଖେଳିବାରେ ସେ ପ୍ରଥମ ଭାରତୀୟ। ରାଜ୍ୟ ଶାସନ ଦାୟିତ୍ୱ ଥିବାରୁ କ୍ରିକେଟରେ ବଡ଼ କ୍ୟାରିୟର କରିପାରି ନ ଥିଲେ। କିନ୍ତୁ ଛୋଟିଆ କ୍ୟାରିୟରରେ ସେ ଇଂଲଣ୍ଡର ପ୍ରତିଷ୍ଠିତ ବ୍ୟାଟ୍ସମ୍ୟାନ ପାଲଟିଥିଲେ। ସେ ଆଧୁନିକ ବ୍ୟାଟ୍ସମ୍ୟାନଙ୍କ ଶଟ୍ ଯଥା ଲେଟ୍ କଟ, ଲେଗ୍ ଗ୍ଲାନ୍ସ ଭଳି ଶଟ୍ ପ୍ରଥମେ ଖେଳିବା ଆରମ୍ଭ କରିଥିଲେ। ଜଣେ ଭାରତୀୟ ଖେଳାଳି ଇଂଲଣ୍ଡ ପାଇଁ ଖେଳିବାର ଏହା ଥିଲା ପ୍ରଥମ ଘଟଣା। ସେ ମାତ୍ର ୧୫ ଟେଷ୍ଟ ଖେଳି ୨ ଶତକ ଓ ୬ ଅର୍ଦ୍ଧଶତକ ସହ ୯୮୯ ରନ୍ କରିଥିଲେ। ତାଙ୍କ ମୃତ୍ୟୁର ଗୋଟିଏ ବର୍ଷ ପରେ ବିସିସିଆଇ ରଣଜୀ ଟ୍ରଫି ଘରୋଇ କ୍ରିକେଟ ଟୁର୍ନାମେଣ୍ଟ ୧୯୩୪-୩୫ରେ ଆରମ୍ଭ କରିଥିଲା। ସେଥର ବିସିସିଆଇକୁ ଟ୍ରଫି ମଧ୍ୟ ରଣଜିତସିହ୍ନାଜିଙ୍କ ପରିବାର ବର୍ଗ ପ୍ରଦାନ କରିଥିଲେ।