କେନ୍ଦୁଝର, ୨୧।୪(ସ୍ବ.ପ୍ର.)-ନଳକୂପ ଖନନ କରି ପେଟପାଟଣା କରି ପରିବାର ପୋଷୁଥିବା ୩୩ଜଣ ଶ୍ରମିକ ଶ୍ରେଣୀର ଲୋକ ମଙ୍ଗଳବାର ଚାଲି ଚାଲି କେନ୍ଦୁଝର ଜିଲା ପାଟଣା ବ୍ଲକ ଅଞ୍ଚଳରୁ କେନ୍ଦୁଝର ସହର ଦେଇ ଏନ୍ଏଚ୍ ୪୯ରେ ଯାଉଥିବା ଘଟଣା ଚର୍ଚ୍ଚାର ବିଷୟ ହୋଇଛି। କାମ ଧନ୍ଦା ଅଭାବ ସାଙ୍ଗକୁ ରହିବା ଓ ଖାଇବାର ସମସ୍ୟା ଯୋଗୁ ନିଷ୍ପତ୍ତି ନେଇ ପଳାଇ ଯାଉଥିବା ଜଣାପଡିଛି। କେନ୍ଦୁଝର ସହରରେ ଏନେଇ ବିଭିନ୍ନ ଅଧିକାରୀଙ୍କୁ ସ୍ଥାନୀୟ ଲୋକ ଜଣା ଥିଲେ ହେଁ କେହି ନ ଆସିବାରୁ ସେମାନେ ଚାଲି ଚାଲି ପଳାଇଥିଲେ। ଅନ୍ୟ ରାଜ୍ୟର ଲୋକଙ୍କୁ ଖାଇବା ଓ ରହିବା ବ୍ୟବସ୍ଥା ମାଗଣାରେ କରାଯାଉଥିବା ରାଜ୍ୟ ସରକାର କହୁଥିଲେ ହେଁ ଏଭଳି ବାହାର ରାଜ୍ୟର ଶ୍ରମିକଙ୍କ ପଳାୟନକୁ ବିରୋଧୀ ଦଳର ନେତା ମାନେ ତୀବ୍ର ପ୍ରତିକ୍ରିୟା ପ୍ରକାଶ କରୁଛନ୍ତି। ସେମାନେ ଖାଦ୍ୟ ସାମଗ୍ରୀ ଧରି ଯାଉଥିବା ବେଳେ କେବେ ପହଞ୍ଚିବେ ଠିକ ଜାଣି ନ ଥିବା କହିଛନ୍ତି। ଶୁଆକାଟି ନିକଟରେ ଦୁଇଟି ଦଳରେ ଚାଲି ଚାଲି ଯାଉଥିବା ଦେଖିବାକୁ ମିଳିଥିଲା। ଏଣୁ ଏ ନେଇ ପଦକ୍ଷେପ ନେବାକୁ ଦାବି ହେଉଛି।