କେନ୍ଦୁଝର,୮।୧(ସ୍ବ.ପ୍ର.): କେନ୍ଦୁଝର ଜିଲାରେ ଦରଦାମ ବୃଦ୍ଧି ଓ ଅନ୍ୟାନ୍ୟ ପ୍ରତିବାଦରେ ବିଭିନ୍ନ ରାଜନୈତିକ ଦଳ ଓ ଶ୍ରମିକ ସଂଗଠନ ପକ୍ଷରୁ ବନ୍ଦ ଡାକରା ଶାନ୍ତିପୂର୍ଣ୍ଣ ଭାବେ ଆରମ୍ଭ ହୋଇଛି। ବିଭିନ୍ନ ଦଳ ଓ ସଂଗଠନର ନେତା ଓ କର୍ମୀମାନେ ଗାନ୍ଧୀ ଛକରେ ଟାୟାର ଜାଳି ବନ୍ଦ ପାଳନ କରିଛନ୍ତି। ଏନଏଚ ୪୯ ଓ ଏନଏଚ ୨୦ରେ ହଜାର ହଜାର ସଂଖ୍ୟାରେ ଗାଡି ଠିଆ ହୋଇଥିବାରୁ ଯାତାୟତ ଠପ୍ ହୋଇଯାଇଛି। ସହରରେ ଦୋକାନ ବଜାର ଓ ଶିକ୍ଷାନୁଷ୍ଠାନ ଆଦି ବନ୍ଦ ରହିଛି। ଫଳରେ ସାଧାରଣ ଜନଜୀବନ ବ୍ୟତିବ୍ୟସ୍ତ ହୋଇ ପଡିଛି।
ବୁଧବାର ସକାଳୁ କେନ୍ଦୁଝର ରେଳ ଷ୍ଟେଶନରେ ଟ୍ରେନ କିଛି ସମୟ ଅଟକ ଯୋଗୁ ଟ୍ରେନ ଚଳାଚଳ ବ୍ୟାହତ ହୋଇଥିଲା। କେତେକ ଲୋକ ବନ୍ଦର ସୁବିଧା ନେଇ ରାତି ୪ଟାରୁ ଲାଇନ ଟ୍ରକଗୁଡିକୁ ଅଟକାଇ ଚାନ୍ଦା ଆଦାୟ କରୁଥିବା ଭିଡିଓକୁ ନେଇ ଚର୍ଚ୍ଚା ଜୋର ଧରିଛି। ଆନ୍ଦୋଳନ ଯୋଗୁ ପରିବହନ ବାଧାପ୍ରାପ୍ତ ହୋଇଛି। ପିକେଟିଂ କରି ଅନେକ ସ୍ଥାନରେ ଦୋକାନ ଓ ଅଫିସ ବନ୍ଦ କରାଯାଉଥିବା ଅଭିଯୋଗ ହେଉଛି। ବିଭିନ୍ନ ସଂଗଠନ ସାମିଲ ଥିବାରୁ ବ୍ୟାଙ୍କ, ଡାକଘର, ଟେଲିଫୋନ ଆଦି ସରକାରୀ କାର୍ଯ୍ୟାଳୟରେ ମଧ୍ୟ କାର୍ଯ୍ୟ ବାଧାପ୍ରାପ୍ତ ହୋଇଛି। ସୁରକ୍ଷା ବ୍ୟବସ୍ଥାକୁ ଦୃଷ୍ଟିରେ ରଖି ବିଭିନ୍ନ ସ୍ଥାନରେ ବ୍ୟାପକ ପୋଲିସ ମୁତୟନ କରାଯାଇଛି। ସରକାରୀ ଅଫିସ ଖୋଲା ଯାଇଥିଲେ ହେଁ, ବନ୍ଦ ଯୋଗୁ ବିଭିନ୍ନ କର୍ମଚାରୀ ଅଫିସରେ ପହଞ୍ଚି ପାରିନାହାନ୍ତି।