ନୂଆଦିଲ୍ଲୀ,୨୩।୫: ୨୦୧୯ ସାଧାରଣ ନିର୍ବାଚନରେ ଭାଜପା ବୃହତ ବିଜୟ ଆଡ଼କୁ ଅଗ୍ରସର ହେଉଛି। ଭାଜପା ରାଷ୍ଟ୍ରୀୟ ଅଧ୍ୟକ୍ଷ ଅମିତ ଶାହଙ୍କ ନିର୍ବାଚନ ରଣନୀତି ଯୋଗୁ ଭାଜପା ୩ଶହରୁ ଊର୍ଦ୍ଧ୍ୱ ଲୋକ ସଭା ଆସନରେ ବିଜୟୀ ହୋଇ ସରକାର ଗଢ଼ିବା ଏକ ପ୍ରକାର ସ୍ପଷ୍ଟ ହୋଇଛି। କଂଗ୍ରେସ ଅଧ୍ୟକ୍ଷ ରାହୁଲ ଗାନ୍ଧୀଙ୍କ ଚୌକିଦାର ମନ୍ତବ୍ୟ ଓ ରାଫେଲ ଦୁର୍ନୀତି ଆଦି ସ୍ଲୋଗାନ ବିଫଳ ହୋଇଥିବାକୁ ନେଇ ସୋସିଆଲ ମିଡିଆରେ ଚର୍ଚ୍ଚା ହେଉଛି। ବାରାଣସୀରୁ ମୋଦି ବିଜୟୀ ହୋଇଥିବା ବେଳେ ଗୁଜରାଟ ଗାନ୍ଧୀନଗର ଆସନରୁ ବିପୁଳ ଭୋଟରେ ବିଜୟ ଲାଭ କରିଛନ୍ତି ଶାହ। ଏହା ପରେ ମୋଦି ଭାରତର ଜନସାଧାରଣଙ୍କୁ ଧନ୍ୟବାଦ ଜଣାଇବା ସହ ନିଜ ଟୁଇଟର ଆକାଉଣ୍ଟରୁ ‘ଚୌକିଦାର’ ଶବ୍ଦ ହଟାଇଛନ୍ତି। ରାହୁଲଙ୍କ ‘ଚୌକିଦାର ଚୋର ହେ’ ଆକ୍ଷେପ ପରେ ମୋଦି ତାଙ୍କ ନାମ ପୂର୍ବରୁ ଚୌକିଦାର ଶବ୍ଦ ଯୋଡ଼ିଥିଲେ। ଧିରେ ଧିରେ ଏହା ଟ୍ରେଣ୍ଡ ପାଲଟିବା ସହ ଜଣଙ୍କ ପରେ ଜଣେ ଭାଜପା କର୍ମୀ ଓ ସମର୍ଥକ ମଧ୍ୟ ଏଭଳି କରିବା ଦେଖାଯାଇଥିଲା। ଏବେ ମୋଦି ଜିତିବା ପରେ ନିଜ ନାମ ଆଗରୁ ଏହି ଟ୍ୟାଗ୍କୁ ହଟାଇଛନ୍ତି। ସମସ୍ତେ ମିଳିତ ହୋଇ ଦେଶର ଅଗ୍ରଗତି ନିମନ୍ତେ କାମ କରିବାକୁ ସେ ଅନୁରୋଧ କରିଛନ୍ତି। ଏଥି ସହ ସମସ୍ତ ଭାଜପା କର୍ମୀ ଓ ସମର୍ଥକଙ୍କୁ ମଧ୍ୟ ସମାନ ଭାବେ ଏହି ଟ୍ୟାଗ୍କୁ ହଟାଇବାକୁ କହିଛନ୍ତି।
