କେନ୍ଦ୍ରାପଡା ଅଫିସ, ୨୧।୯: କେନ୍ଦ୍ରାପଡା ଅର୍ବାନ ବ୍ୟାଙ୍କର ନିଯୁକ୍ତି ଓ ମୁଖ୍ୟ କାର୍ଯ୍ୟ ନିର୍ବାହୀଙ୍କ କାର୍ଯ୍ୟରେ ଅନିୟମିତତା ଦର୍ଶାଇ ସଭ୍ୟ ସ୍ମୃତିରଞ୍ଜନ ବେହେରା ଗତ ୭ ତାରିଖରେ ଭୁବନେଶ୍ୱରସ୍ଥିତ କୋଅପରେଟିଭ ସୋସାଇଟି ରେଜିଷ୍ଟ୍ରାରଙ୍କୁ ଚିଠି ଲେଖଥିଲେ। ତେବେ ଏହାର ତଦନ୍ତ ପାଇଁ ଜଏଣ୍ଟ ରେଜିଷ୍ଟ୍ରାର ଗତ ୧୬ ତାରିଖରେ ଚିଠି (ନଂ.-୨୦୦୬୦) କରିଛନ୍ତି। ଅଭିଯୋଗର ତଦନ୍ତ କରି ଆସନ୍ତା ୭ ଦିନ ମଧ୍ୟରେ ରିପୋର୍ଟ ପ୍ରଦାନ ପାଇଁ ଡେପୁଟି ରେଜିଷ୍ଟ୍ରାରଙ୍କୁ ଚିଠି ଯୋଗେ ନିର୍ଦ୍ଦେଶ ଦିଆଯାଇଛି। ସ୍ମୃତିରଞ୍ଜନଙ୍କ ଅଭିଯୋଗ ଅନୁଯାୟୀ, ମୁଖ୍ୟ କାର୍ଯ୍ୟନିର୍ବାହୀ ଅଧିକାରୀ ସୁଶିଲ କୁମାର ସାମଲ ମନମୁତାବକ କର୍ମଚାରୀ ନିଯୁକ୍ତ କରିଛନ୍ତି। ଯାହାସମବାୟ ସମିତି ନୀତି ନିୟମ ବହିର୍ଭୂତ। ନିଯୁକ୍ତ କର୍ମଚାରୀଙ୍କ ପରୀକ୍ଷା କରାଯାଇ ନଥିବା ବେଳେ ଏମାନେ ବ୍ୟାଙ୍କର ପୂର୍ବତନ ନିର୍ଦ୍ଦେଶକଙ୍କ ସମ୍ପର୍କୀୟ ବୋଲି ସୂଚନା ମିଳିଛି। ସେହିପରି ୨୦୧୩ରେ ସ୍ଥାନୀୟ ଅଞ୍ଚଳର ପ୍ରଭାସ ଚନ୍ଦ୍ର ମିଶ୍ରଙ୍କୁ ୬୫ ଲକ୍ଷ ଟଙ୍କା ଋଣ ଯୋଗାଇ ଦିଆଯାଇଥିବା ବେଳେ ଏଥିପାଇଁ ଯୋଗ୍ୟ ସିକ୍ୟୁରିଟି ରଖାଯାଇନାହିଁ। ପ୍ରଭାସଙ୍କ ଚେକ ବାଉନସ ହୋଇଥିବା ବେଳେ ଏ ନେଇ ମୁଖ୍ୟକାର୍ଯ୍ୟ ନିର୍ବାହୀ ଅଧିକାରୀ କୋର୍ଟରେ ମାମଲା ରୁଜୁ କରୁନାହାନ୍ତି। ସେହିପରି ୨୦୧୪ରେ ଏହି ଅଧିକାରୀ କେତେକ କାଗଜପତ୍ରରେ ଅନିୟମିତତା କରିଥିବା ସ୍ମୃତିରଞ୍ଜନ ଅଭିଯୋଗପତ୍ରରେ ଉଲ୍ଲେଖ କରିଛନ୍ତି। ବ୍ୟାଙ୍କ ଋଣ ପ୍ରଦାନ କ୍ଷେତ୍ରରେ ଦେବାଳିଆ ପରିସ୍ଥିତି ସୃଷ୍ଟି ହୋଇଥିବା ବେଳେ ଏହି ଘଟଣାର ତଦନ୍ତ ସହ କାର୍ଯ୍ୟାନୁଷ୍ଠାନ ପାଇଁ ସ୍ମୃତିରଞ୍ଜନ ଉଲ୍ଲେଖ କରିଛନ୍ତି। ମୁଖ୍ୟ କାର୍ଯ୍ୟ ନିର୍ବାହୀ ଅଧିକାରୀ ସାମଲଙ୍କୁ ପଚାରିବାରେ କର୍ମଚାରୀ ବ୍ୟାଙ୍କରେ କର୍ମଚାରୀ ନିଯୁକ୍ତି ହୋଇଛି। ମାତ୍ର ତଦନ୍ତ ନିର୍ଦ୍ଦେଶ ସମ୍ପର୍କରେ କିଛି ଜାଣିନାହାନ୍ତି ବୋଲି କହିଛନ୍ତି।