ବ୍ରହ୍ମପୁର ଅଫିସ,୨୬ା୭- ବ୍ରହ୍ମପୁର ଲୋକ ସଭା କ୍ଷେତ୍ର ଅନ୍ତର୍ଭୁକ୍ତ ଗଜପତି ଜିଲାରେ ଥିବା ପୁରାଣ ପ୍ରସିଦ୍ଧ ଓ ଐତିହାସିକ ସ୍ଥଳି ମହେନ୍ଦ୍ରଗିରି ପର୍ବତର ବିକାଶ ପ୍ରତି କେନ୍ଦ୍ର ସରକାର ଅବହେଳା କରୁଛନ୍ତି। ଭାରତୀୟ ପ୍ରନତ୍ତତ୍ତ୍ବ ବିଭାଗ (ଏଏସ୍ଆଇ) ମଧ୍ୟ ଆବଶ୍ୟକ ପଦକ୍ଷେପ ନେଇନାହାନ୍ତି। ଲୋକ ସଭାରେ ଏମ୍ପି ଚନ୍ଦ୍ରଶେଖର ସାହୁ ଏଭଳି ଅଭିଯୋଗ କରିବା ସହ ଏହାର ସର୍ବାଙ୍ଗୀନ ଉନ୍ନତି ପାଇଁ ତ୍ୱରିତ ପଦକ୍ଷେପ ନେବା ଉପରେ ଗୁରୁତ୍ୱାରୋପ କରିଛନ୍ତି। ମହେନ୍ଦ୍ରଗିରିର ସୁରକ୍ଷା ଓ ସଂରକ୍ଷଣ ପାଇଁ ପ୍ରନତ୍ତତ୍ତ୍ବ ବିଭାଗ ଯୋଜନାବଦ୍ଧ କାର୍ଯ୍ୟକ୍ରମ କରିବାକୁ ମଧ୍ୟ ସେ ଦାବି କରିଛନ୍ତି। ସୂଚନାଯୋଗ୍ୟ, ମୋଦି ସରକାର ଦୁଇବର୍ଷ ତଳେ ସ୍ବଦେଶୀ ଦର୍ଶନ ଯୋଜନା ଆରମ୍ଭ କରିଛନ୍ତି। ରାମାୟଣ ସର୍କିଟ ନାମରେ ପର୍ଯ୍ୟଟନ ପ୍ରକଳ୍ପ କାର୍ଯ୍ୟକାରୀ କରିବା ସହ ସେଥିରେ ଦେଶର ୧୫ ପର୍ଯ୍ୟଟନ ସ୍ଥଳି ମଧ୍ୟରେ ମହେନ୍ଦ୍ରଗିରିକୁ ସ୍ଥାନୀତ କରାଯାଇଛି।
ଏହା ଏକ ପ୍ରଶଂସନୀୟ ଯୋଜନା ହୋଇଥିବାରୁ ମହେନ୍ଦ୍ରଗିରି ପର୍ବତର ଅନେକ ଉନ୍ନତି ଘଟିବାର ଲୋକେ ଆଶା କରିଥିଲେ। ୨ ବର୍ଷ ମଧ୍ୟରେ କୌଣସି ବିକାଶ ହୋଇ ନ ଥିବାରୁ ଏମପି ଉଦ୍ବେଗ ପ୍ରକାଶ କରିଛନ୍ତି। ପ୍ରଧାନମନ୍ତ୍ରୀ ଶ୍ରୀଲଙ୍କା ଗସ୍ତ ବେଳେ ରାମାୟଣ ସର୍କିଟ ପ୍ରସଙ୍ଗ ଉଠାଇଥିଲେ ମଧ୍ୟ ପୁରାଣ ପ୍ରସିଦ୍ଧ ମହେନ୍ଦ୍ରଗିରି ଏବେବି ଅବହେଳିତ ହୋଇ ରହିଛି। ପର୍ଯ୍ୟଟନ ମନ୍ତ୍ରଣାଳୟ ପକ୍ଷରୁ ଏହାର ବିକାଶ ଲାଗି ବଜେଟରେ ବ୍ୟୟବରାଦ, ସ୍ବଦେଶୀ ଦର୍ଶନ ଯୋଜନାର ରାମାୟଣ ସର୍କିଟ ପ୍ରକଳ୍ପ କାର୍ଯ୍ୟକାରୀ କରିବାକୁ ପର୍ଯ୍ୟଟନ ମନ୍ତ୍ରୀ ପଦକ୍ଷେପ ନେବାକୁ ଚନ୍ଦ୍ରଶେଖର ଦାବି କରିଛନ୍ତି।