ଠିକ୍ କୋଡ଼ିଏ ଦିନ ତଳେ କେନ୍ଦ୍ର ସରକାର ଜମ୍ମୁ-କଶ୍ମୀରକୁ ନେଇ ଏକ ବଡ଼ ନିଷ୍ପତ୍ତି ନେଇଥିଲେ। ରାଜ୍ୟକୁ ସ୍ବତନ୍ତ୍ର ମାନ୍ୟତା ପ୍ରଦାନକାରୀ ସମ୍ବିଧାନର ଅନୁଚ୍ଛେଦ ୩୭୦ ହଟାଇଦେଇ ଜମ୍ମୁ-କଶ୍ମୀର ଏବଂ ଲଦାଖ ନାମରେ ଦୁଇଟି କେନ୍ଦ୍ରଶାସିତ ଅଞ୍ଚଳ ଗଠନର ନିଷ୍ପତ୍ତି ନେଇଥିଲେ। ସଂଖ୍ୟାବଳରେ ବଳୀୟାନ ସରକାରଙ୍କ ଏହି ଐତିହାସିକ ନିଷ୍ପତ୍ତିକୁ ଦେଶବ୍ୟାପୀ ସ୍ବାଗତ କରାଯାଇଥିବାବେଳେ ବିରୋଧର ସ୍ବର ମଧ୍ୟ କମ୍ ଉଠିନାହିଁ। ରାଷ୍ଟ୍ରପତି ଶାସନାଧୀନ ଉପତ୍ୟକାରେ ସବୁକିଛି ଠିକ୍ ଚାଲିଛି ବୋଲି ରାଜ୍ୟପାଳ ସତ୍ୟପାଲ ମଲିକଙ୍କ ପ୍ରଶାସନ କହୁଥିବାବେଳେ ସେଠାକୁ କୌଣସି ବିରୋଧୀ ନେତାଙ୍କୁ ପ୍ରବେଶ କରିବାକୁ ଦିଆଯାଉନାହିଁ। ତିନିଜଣ ପୂର୍ବତନ ମୁଖ୍ୟମନ୍ତ୍ରୀଙ୍କ ସମେତ ୪୦୦ରୁ ଊର୍ଦ୍ଧ୍ୱ ନେତା ଓ କର୍ମୀଙ୍କୁ ଗୃହବନ୍ଦୀ କରାଯାଇଛି। ଗଣମାଧ୍ୟମ ଉପରେ ମଧ୍ୟ କଟକଣା ବଳବତ୍ତର ରହିଛି। ଏପରି କି ମୋବାଇଲ, ଇଣ୍ଟରନେଟ ସେବା ସମ୍ପୂର୍ଣ୍ଣ ରୂପେ ସ୍ବାଭାବିକ ହୋଇନାହିଁ। ମାଧ୍ୟମିକ ଯାଏ ସ୍କୁଲଗୁଡ଼ିକର ତାଲା ଖୋଲିଛି। ହେଲେ ଛାତ୍ରୀଛାତ୍ରଙ୍କୁ ବିଦ୍ୟାଳୟକୁ ପଠାଇବା ପାଇଁ ମା’ବାପା ସୁରକ୍ଷିତ ମଣୁନାହାନ୍ତି। ସବୁଠି ଚାପା ଉତ୍ତେଜନା। କେତେବେଳେ କେଉଁଠି ବୋମା ଫୁଟିବ କି ଗୁଳି ବର୍ଷା ହେବ କହିହେଉନାହିଁ। ସୁତରାଂ କୁହୁଳୁଥିବା କଶ୍ମୀରକୁ ଏବେ ନିଆଁର ଡର।