ନୂଆଦିଲ୍ଲୀ, ୨୬ା୧୧ : ରାଜଧାନୀ ଦିଲ୍ଲୀ ଓ ଏହାର ଆଖପାଖ ଅଞ୍ଚଳରେ ବାୟୁ ଓ ଜଳ ପ୍ରଦୂଷଣ ଭୟଙ୍କର ରୂପ ଧାରଣ କରିଛି। ପରିସ୍ଥିତି ଏମିତି ହୋଇଛି ଯେ, ସାଧାରଣ ଜୀବନଯାପନ ଦୁର୍ବିଷହ ହୋଇପଡ଼ିଛି। ନର୍କଠାରୁ ବି ଏହା ତଦ୍ରୂପ। ଏହାର ସୁଧାର ଲାଗି କେନ୍ଦ୍ର କି ରାଜ୍ୟ ସରକାର ସେଭଳି କୌଣସି ପଦକ୍ଷେପ ଗ୍ରହଣ ନ କରିବା ପରିତାପର ବିଷୟ ବୋଲି ସୁପ୍ରିମକୋର୍ଟ ସୋମବାର କହିଛନ୍ତି। କେନ୍ଦ୍ର ଓ ରାଜ୍ୟ ସରକାରଙ୍କୁ ସମାଲୋଚନା କରି ସାଧାରଣ ମଣିଷଙ୍କ ଜୀବନ ସହ ଖେଳ ଖେଳାଯାଉଛି। ପରସ୍ପର ବାକ୍ଯୁଦ୍ଧ ବନ୍ଦକରି ଏହାର ନିରାକରଣ ଦିଗରେ ଉଭୟ ସରକାର ପଦକ୍ଷେପ ନେବାକୁ ସର୍ବୋଚ୍ଚ ଅଦାଲତ ନିର୍ଦ୍ଦେଶ ଦେଇଛନ୍ତି। ଦିଲ୍ଲୀ ସରକାରଙ୍କୁ ସମାଲୋଚନା କରି ଗାଦିରେ ରହିବାର କୌଣସି ଅଧିକାର ଏ ସରକାରର ନାହିଁ ବୋଲି ସୁପ୍ରିମକୋର୍ଟ ଭର୍ସନା କରି କହିଛନ୍ତି।
ଜଷ୍ଟିସ ଅରୁଣ ମିଶ୍ର ଓ ଜଷ୍ଟିସ ଦୀପକ ଗୁପ୍ତାଙ୍କୁ ନେଇ ଗଠିତ ଖଣ୍ଡପୀଠ ପଡ଼ୋଶୀ ରାଜ୍ୟଗୁଡ଼ିକରେ ନଡ଼ା ପୋଡ଼ି ଯୋଗୁ ଦିଲ୍ଲୀ ପ୍ରଦୂଷଣ ମାତ୍ରା ବୃଦ୍ଧି ପାଉଥିବା କହିଥିଲେ। ସେହିଭଳି ଦିଲ୍ଲୀର ପାଣି ନିରାପଦ ନୁହେଁ, ଏନେଇ ବ୍ୟୁରୋ ଅଫ୍ ଇଣ୍ଡିଆ ଷ୍ଟାଣ୍ଡାର୍ଡର ରିପୋର୍ଟରୁ ସ୍ପଷ୍ଟ। ତୁରନ୍ତ ଦିଲ୍ଲୀର ଏଏପି ସରକାର ଓ କେନ୍ଦ୍ର ସରକାର ଏହାର ନିରାକରଣ ଲାଗି ପଦକ୍ଷେପ ଗ୍ରହଣକରି ବିସ୍ତୃତ ରିପୋର୍ଟ ପ୍ରଦାନକରିବାକୁ ସୁପ୍ରିମକୋର୍ଟଙ୍କ ଖଣ୍ଡପୀଠ ନିର୍ଦ୍ଦେଶ ଦେଇଛନ୍ତି। ଲୋକମାନଙ୍କୁ ଗ୍ୟାସ ଚାମ୍ବରରେ ରହିବାକୁ ବାଧ୍ୟ କରାଯାଉଛି। ପ୍ରତି ମୁହୂର୍ତ୍ତରେ ସେମାନଙ୍କୁ ମରିବାକୁ ପଡ଼ୁଛି। ଏହାଠାରୁ ଭଲହେବ ବିସ୍ଫୋରକ ଆଣି ଏକାଥରକେ ଶେଷ କରିଦେବା ବୋଲି କୋର୍ଟ ପ୍ରକାଶ କରିଛନ୍ତି। ହରିୟାଣା ଓ ପଞ୍ଜାବରେ ନଡ଼ାପୋଡ଼ି ପୁଣି ଦିଲ୍ଲୀ ପରିବେଶକୁ ଭୟଙ୍କର କରିବାରେ ଲାଗିଛି। ଉତ୍ତରପ୍ରଦେଶ ସ୍ଥିତି ମଧ୍ୟ ଏକାଭଳି। ଏନେଇ ବାରମ୍ବାର ଅଭିଯୋଗ ଆସୁଛି। ସମ୍ପୃକ୍ତ ରାଜ୍ୟର ମୁଖ୍ୟ ସଚିବମାନେ ଏନେଇ ତୁରନ୍ତ ପଦକ୍ଷେପ ଗ୍ରହଣ କରିବାକୁ ସୁପ୍ରିମକୋର୍ଟ ନିର୍ଦ୍ଦେଶ ଦେଇଛନ୍ତି। ସମ୍ପୃକ୍ତ ରାଜ୍ୟଗୁଡ଼ିକ ବାୟୁର ମାନ ସହ ପ୍ରଦୂଷଣ ରୋକିବା ଲାଗି କି କି ପଦକ୍ଷେପ ଗ୍ରହଣ କରାଯାଇଛି, ସେ ସମ୍ପର୍କରେ ବିସ୍ତୃତ ତଥ୍ୟ ଦେବାକୁ ଖଣ୍ଡପୀଠ ନିର୍ଦ୍ଦେଶ ଦେଇଛନ୍ତି। ଦିଲ୍ଲୀ ସରକାରଙ୍କୁ ମଧ୍ୟ ନୋଟିସ ଜାରି କରାଯାଇ ପରିସ୍ଥିତି ସୁଧାରିବା ଲାଗି ପଦକ୍ଷେପ ନେବାକୁ କୁହାଯାଇଛି।