ନୂଆଦିଲ୍ଲୀ,୯।୭: ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜରିଓ୍ବାଲ ଏବେ କେନ୍ଦ୍ରର ଭାଜପା ସରକାରଙ୍କ ଆଡକୁ ଢଲିଥିବା ଲକ୍ଷ୍ୟ କରାଯାଇଛି। ଦିଲ୍ଲୀର ଉନ୍ନତି ପାଇଁ ସେ କେନ୍ଦ୍ର ସରକାରଙ୍କ ସହ ଏକାଠି ହେବାକୁ ସ୍ଥିର କରିଥିବା କୁହାଯାଉଛି। ଦିଲ୍ଲୀର ଆଇନ ଶୃଙ୍ଖଳା ବ୍ୟବସ୍ଥାଠାରୁ ନେଇ ଜଳ ଯୋଗାଣ ପର୍ଯ୍ୟନ୍ତ କେଜରିଓ୍ବାଲ କେନ୍ଦ୍ର ସରକାରଙ୍କ ସହ ମିଶି କାମ କରିବାକୁ ପ୍ରସ୍ତୁତ ଥିବା ସୂଚନା ମିଳିଛି। ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଘରେ ଘରେ ପାନୀୟ ଜଳ ଯୋଗାଣ ବ୍ୟବସ୍ଥା କଥା ଘୋଷଣା କରିବା ପରେ କେଜରିଓ୍ବାଲ ଏହା ମାଧ୍ୟମରେ ବିକାଶର କଥା ଚିନ୍ତା କରିଛନ୍ତି। ସବୁଠାରୁ ଗୁରୁତ୍ୱପୂର୍ଣ୍ଣ କଥା ହେଲା ମୋଦି ଜଳ ସଞ୍ଚୟ କଥା କହିବା ପରେ ଦିଲ୍ଲୀର କେଜରିଓ୍ବାଲ ସରକାର ଯମୁନା ନଦୀ କୂଳରେ ଛୋଟ ଛୋଟ ପୋଖରୀ କରି ଜଳ ସଂରକ୍ଷଣ କରିବା ସହ କେନ୍ଦ୍ର ସରକାରଙ୍କ ସହଯୋଗରେ ସିଓ୍ବେଜ ଟ୍ରିଟମେଣ୍ଟ ପ୍ଲାଣ୍ଟର ଶିଳାନ୍ୟାସ ମଧ୍ୟ କରି ସାରିଛନ୍ତି। ତେଣୁ ମୋଦି ସରକାରଙ୍କ ଉପରେ କେଜରିଓ୍ବାଲ ନରମ ମନୋଭାବ ପ୍ରକାଶ କରିଥିବା ଆଲୋଚନା ହେଉଛି।