ଅମିତାଭ ବଚ୍ଚନ ଖୁବ୍ଶୀଘ୍ର ଲୋକପ୍ରିୟ ରିଅଲିଟି ଶୋ’ ‘କୌନ୍ ବନେଗା କରୋଡ଼ପତି’(କେବିସି) ସିଜିନ୍ ୧୧ରେ ପୁଣି ଟିଭି ପରଦାକୁ ଫେରିବେ। ମୁମ୍ବାଇରେ ଅନୁଷ୍ଠିତ ଏକ କାର୍ଯ୍ୟକ୍ରମରେ ଶୋ’ ସହିତ ଜଡ଼ିତ କିଛି ପ୍ରଶ୍ନର ଉତ୍ତର ଦେଇଛନ୍ତି ଅମିତାଭ। ସେ କହିଛନ୍ତି, ତାଙ୍କ ପରିବାରର କୌଣସି ସଦସ୍ୟ ଏହି ଶୋ’ରେ ଭାଗ ନେବାର ଅନୁମତି ନାହିଁ। ସେ ଏକ ପ୍ରୋଜେକ୍ଟକୁ ପ୍ରମୋଟ କରିବାକୁ ଆସିପାରନ୍ତି କିନ୍ତୁ ଜଣେ ପ୍ରତିଯୋଗୀଙ୍କ ପରି ଏହି ଖେଳ ଖେଳିପାରନ୍ତି ନାହିଁ। ଅମିତାଭ ଏକଥା ବି କହିଛନ୍ତି କି, ତାଙ୍କୁ ହଟ୍ ସିଟ୍ରେ ବସିଲେ ବହୁତ ଡର ଲାଗେ। କାରଣ ତାଙ୍କର ସାଧାରଣ ଜ୍ଞାନ ଏତେ ଭଲ ହୁଏ ନାହିଁ। ଯେତେବେଳେ ୨୦୦୦ ମସିହାରେ ‘କୌନ ବନେଗା କରୋଡ଼ପତି’ଆରମ୍ଭ ହୋଇଥିଲା ସେତେବେଳେ କିଛି ଲୋକ ମୋତେ ଏହି ଶୋ’ କରିବାକୁ ମନା କରିଥିଲେ। ଏମିତିକି ମୋ’ ପରିବାର ସଦସ୍ୟ ମଧ୍ୟ ମୋତେ ମନା କରିଥିଲେ। କିନ୍ତୁ ଶୋ’ ସହିତ ଜଡ଼ିତ ଲୋକମାନେ ବହୁତ ଦାୟିତ୍ୱସମ୍ପନ୍ନ ଥିଲେ। ସେମାନେ ଚାହୁଁଥିଲେ ମୁଁ ଏହି ଶୋ’ କରେ ବୋଲି। ଶୋ’ ଆରମ୍ଭ ହେବା ପରେ ମୋତେ ଏମିତି ପରିବେଶ ମିଳିଲା ଯାହାକୁ ନେଇ ଆଜି ମୁଁ ଗର୍ବ ଅନୁଭବ କରୁଛି।
