ନୂଆଦିଲ୍ଲୀ, ୨୨ା୫ (ପି.ଟି.)-କରୋନା ଭାଇରସ୍ ପାଇଁ ଲକ୍ଡାଉନ୍ ସତ୍ତ୍ୱେ ଆଥଲେଟ୍୍ମାନଙ୍କ ଟ୍ରେନିଂ ଲାଗି ସରକାର ବିନା ଦର୍ଶକରେ ଷ୍ଟାଡିୟମ ଓ ସ୍ପୋଟର୍ସ କମ୍ପ୍ଲେକ୍ସ ଖେଳିବାକୁ ଅନୁମତି ଦେଇଛନ୍ତି। ଖେଳାଳିମାନଙ୍କୁ ଏହି ସମୟରେ ସ୍ପୋଟର୍ସ ଅଥରିଟି ଅଫ୍ ଇଣ୍ଡିଆ (ସାଇ) ପକ୍ଷରୁ ଜାରି କରାଯାଇଥିବା ଷ୍ଟାଣ୍ଡାର୍ଡ ଅପରେଟିଂ ପ୍ରୋସିଜ୍ୟୁୟର (ଏସ୍ଓପି)କୁ ମାନି ଚଳିବାକୁ ନିର୍ଦ୍ଦେଶ ରହିଛି। ହେଲେ କେତେବେଳେ ଟ୍ରେନିଂ ଆରମ୍ଭ ହେବ ତାହା ସ୍ପଷ୍ଟ କରାଯାଇ ନାହିଁ। ଏସ୍ଓପିରେ ରହିଥିବା ବ୍ୟବସ୍ଥା ଅନୁସାରେ ରିଲେ ଟ୍ରେନିଂ ବେଳେ ବାଟନ ଅଦଳ ବଦଳ ହୋଇପାରିବ ନାହିଁ। ବକ୍ସରମାନେ ରିଙ୍ଗ୍ର ସୁବିଧା ନେଇପାରିବେ ନାହିଁ। କେବଳ ସିଙ୍ଗଲ୍ସ ଖେଳାଳିମାନେ ଇନ୍ଡୋର ବ୍ୟାଡ୍ମିଣ୍ଟନ କୋର୍ଟରେ ଅଭ୍ୟାସ କରିପାରିବେ। ଆଥଲେଟିକ୍ସ, ହକି, ବ୍ୟାଡ୍ମିଣ୍ଟନ, ବକ୍ସିଂ ଓ ଶୁଟିଂ ଆଦି ୧୧ ପ୍ରକାର ଖେଳକୁ ଆଉଟ୍ଡୋର ଟ୍ରେନିଂ ପାଇଁ ଅନୁମତି ଦିଆଯାଇଛି। ଭାରୋତ୍ତୋଳକ, ତୀରନ୍ଦାଜ, ସାଇକ୍ଲିଷ୍ଟ, ଫେନ୍ସର, ରେସ୍ଲର ଏବଂ ଟେବୁଲ ଟେନିସ୍ ଖେଳାଳି ମଧ୍ୟ ଆବଶ୍ୟକ ସୁରକ୍ଷା ପଦକ୍ଷେପ ସହ ଟ୍ରେନିଂ ଆରମ୍ଭ କରିପାରିବେ। ହେଲେ ସଂକ୍ରମଣ ଆଶଙ୍କା ଯୋଗୁ ସନ୍ତରଣକାରୀଙ୍କୁ ସୁଇମିଂପୁଲ୍ ବ୍ୟବହାର ପାଇଁ ଅନୁମତି ମିଳିନି। ଚତୁର୍ଥ ପର୍ଯ୍ୟାୟରେ ଲକ୍ଡାଉନ୍ ଅବଧିକୁ ମେ ୩୧ ପର୍ଯ୍ୟନ୍ତ ବୃଦ୍ଧି କରାଯିବା ପରେ ଗୃହ ମନ୍ତ୍ରଣାଳୟ ସ୍ପୋଟର୍ସ କମ୍ପ୍ଲେକ୍ସ ଓ ଷ୍ଟାଡିୟମ ଖୋଲିବାକୁ ଅନୁମତି ଦେବା ପରେ ସାଇ ତରଫରୁ ଏସ୍ଓପି ଜାରି କରାଯାଇଥିଲା। ହେଲେ ଟ୍ରେନିଂ କେବେଠାରୁ ଆରମ୍ଭ ହେବ ସେ ସମ୍ପର୍କରେ ସ୍ପଷ୍ଟ କରାଯାଇ ନାହିଁ।
