ବମ୍ବେ: ‘ବିଗ୍ ବସ୍’ରୁ ରାତାରାତି ଷ୍ଟାର ପାଲଟିଯାଇଛନ୍ତି ଜମ୍ମୁ-କଶ୍ମୀରର ମଡେଲ୍ ଆସିମ ରିଆଜ। ଆଜି ବିଶ୍ୱର କୋଣ ଅନୁକୋଣରେ ତାଙ୍କ ଫ୍ୟାନ୍। ତାଙ୍କର ଟିକିଏ ଝଲକ ପାଇବା ପାଇଁ ଲୋକେ ପାଗଳ ପ୍ରାୟ ହୋଇଯାଉଛନ୍ତି। କେହି କେହି ତାଙ୍କୁ ‘ଜିରୋରୁ ହିରୋ’ ହୋଇଥିବା କହୁଛନ୍ତି। ଏପରିସ୍ଥଳେ କିଙ୍ଗ ଖାନଙ୍କ ସହ ତାଙ୍କର ଏକ ଭିଡିଓ ହେଉଛି ଭାଇରାଲ।
ଭିଡିଓଟି ଏକ ବିଜ୍ଞାପନ ଶୁଟିଂ ସମୟର। ଏଥିରେ ଶାହରୁଖ ନିଜର ଲୋକପ୍ରିୟ ପୋଜ୍ରେ ହାତରେ ଗିଟାର ଧରିଛନ୍ତି। ପଛରେ ଥିବା ଲୋକମାନଙ୍କ ମଧ୍ୟରେ ଆସିମ ଛିଡ଼ା ହୋଇଛନ୍ତି। ଚେହେରା ଦେଖିଲେ ଆସିମ ପୂର୍ବେ କେତେ ପତଳା ଥିଲେ ତାହା ବାରି ହୋଇପଡ଼ୁଛି। ଏବେ ତାଙ୍କ ଲୁକ୍ ପୁରାପୁରି ବଦଳିଯାଇଛି। ବିଗ୍ବସ୍ରେ ଥିବାବେଳେ ସେ ଲଗାତାର ବ୍ୟାୟାମ କରି ଏକ ଫିଟ୍ ଲୁକ୍ ହାସଲ କରିପାରିଛନ୍ତି। ଏଥିପାଇଁ ସେ ଅନେକଙ୍କ ପ୍ରେରଣା ସାଜିଛନ୍ତି। ଏହାଛଡ଼ା ସେ ପୂର୍ବରୁ ବରୁଣଙ୍କ ସହ କାମ କରି ସାରିଥିବା ନେଇ ଶୋ’ରେ ଜଣାପଡ଼ିଥିଲା।