ବଅଁରପାଳ,୨୫ା୯(ଡି.ଏନ.ଏ.)-ତାଳଚେରରେ ଚାଲିଥିବା ଖଣି ବନ୍ଦ ଆନ୍ଦୋଳନ ଯୋଗୁ ରାଷ୍ଟ୍ରାୟତ୍ତ ଉଦ୍ୟୋଗ ନାଲ୍କୋକୁ କୋଇଲା ଯୋଗାଣ ହୋଇପାରୁ ନାହିଁ। ଫଳରେ ବିଦ୍ୟୁତ୍ ଉତ୍ପାଦନ ପାଇଁ ଆବଶ୍ୟକ କୋଇଲା ନ ଥିବାରୁ ନିଜସ୍ବ ବିଦ୍ୟୁତ୍ କେନ୍ଦ୍ର (ସିପିପି)ର ୫ଟି ୟୁନିଟ୍କୁ ନାଲ୍କୋ କର୍ତ୍ତୃପକ୍ଷ ବନ୍ଦ ରଖିଛନ୍ତି। ଫଳରେ ଗ୍ରୀଡ୍ରୁ ଚଢ଼ା ଦରରେ ବିଦ୍ୟୁତ୍ କିଣାଯାଇ ଏବେ ପ୍ଲାଣ୍ଟ ଚଳାଯାଉଥିବା ସୂଚନା ମିଳିଛି।
୧୨ ଶହ ମେଗାୱାଟ୍ ଉତ୍ପାଦନ କ୍ଷମତା ବିଶିଷ୍ଟ ନାଲ୍କୋ ସିପିପିରେ ମୋଟ୍ ୧୦ଟି ୟୁନିଟ୍ ରହିଛି। ଗୋଟିଏ ୟୁନିଟ୍ରୁ ୧୨୦ ମେଗାୱାଟ ଶକ୍ତି ଉତ୍ପାଦନ ହୋଇଥାଏ। ହେଲେ ପୂର୍ଣ୍ଣମାତ୍ରାରେ ଏହି ଶକ୍ତି ଉତ୍ପାଦନ ପାଇଁ ଦୈନିକ ୧୫ରୁ ୧୬ ହଜାର ମେଟ୍ରିକ ଟନ୍ କୋଇଲା ଦରକାର ପଡ଼ିଥାଏ। ମାତ୍ର ୨ ଦିନ ହେଲା ଏମ୍ସିଏଲ୍ରୁ ଆବଶ୍ୟକ ପରିମାଣର କୋଇଲା ଆସି ନ ଥିବାରୁ କର୍ତ୍ତୃପକ୍ଷ ଷ୍ଟକ୍ୟାର୍ଡ ଉପରେ ନିର୍ଭର କରୁଛନ୍ତି। ଏବେ ଷ୍ଟକୟାର୍ଡରେ ଯେତିକି କୋଇଲା ଅଛି ସେଥିରେ ପ୍ଲାଣ୍ଟ ୨ରୁ ୩ ଦିନ ଚାଲିପାରିବ। ତେଣୁ ନାଲ୍କୋ କର୍ତ୍ତୃପକ୍ଷ ଏବେ ୩୩୦ ମେଗାୱାଟ ବିଦ୍ୟୁତ୍ ଶକ୍ତି ଗ୍ରୀଡ୍ରୁ କିଣୁଛନ୍ତି।