କେନ୍ଦୁଝର, ୨୪ା୧୦ (ସ୍ବ.ପ୍ର.)-କୋଇଲା ଚୋରି କରି ଅନ୍ୟ ଜଣଙ୍କୁ ବିକିଥିବା ଟ୍ରକ ଚାଳକ ଓ ହେଲପରଙ୍କ ସମେତ କୋଇଲା କିଣିଥିବା ଜଣେ ଇଟା କାରଖାନା ମାଲିକଙ୍କୁ ବୁଧବାର ସ୍ଥାନୀୟ ସିଜେଏମ କୋର୍ଟ ପକ୍ଷରୁ ଦଣ୍ଡାଦେଶ ପ୍ରଦାନ କରାଯାଇଛି। ୧୦ ଜଣ ସାକ୍ଷୀଙ୍କ ବୟାନକୁ ଭିତ୍ତି କରି ସିଜେଏମ ତିରଞ୍ଜନ ପାତ୍ର ଗାଡି ଡ୍ରାଇଭର ଗିରିଧାରୀ ନାୟକ ଓ ହେଲପର ପ୍ରକାଶ ମହାନ୍ତଙ୍କୁ ୫ ବର୍ଷ ସଶ୍ରମ କାରାଦଣ୍ଡ ଓ ୧୦ ହଜାର ଟଙ୍କା ଜରିମାନା କରାଯାଇଛି। ଜରିମାନା ଅନଦେୟ ଆଉ ୩ ମାସ ଜେଲ ଭୋଗିବାକୁ ପଡ଼ିବ। ସେହିପରି ଚୋରାମାଲ କିଣିଥିବା ଇଟା କାରଖାନା ମାଲିକ ବାଲେଶ୍ୱର ଜିଲା ବଉଳଗାଡ଼ିଆ ଅଞ୍ଚଳର ରମେଶ ମହାନ୍ତିଙ୍କୁ ୩ ବର୍ଷ ଜେଲ ଓ ୫ ହଜାର ଟଙ୍କା ଜରିମାନା କରାଯାଇଛି। ଜରିମାନା ନ ଦେଲେ ଅଧିକ ଏକ ମାସ ଜେଲ ଭୋଗିବାକୁ ପଡ଼ିବ। ତେବେ ପ୍ରମାଣ ଅଭାବରୁ ଇଟା କାରଖାନା କର୍ମଚାରୀ ଭଦ୍ରକ ଜିଲା ଥମ୍ବାଖୁଣ୍ଟି ଅଞ୍ଚଳର ବସନ୍ତ କୁଅଁରଙ୍କୁ ଖଲାସ କରାଯାଇଥିବା ସରକାରୀ ଓକିଲ ଅଶୋକ କୁମାର ଦାସସୂଚନା ଦେଇଛନ୍ତି ା ମକଦ୍ଦମା ବିବରଣୀ ଅନୁଯାୟୀ, ୨୦୧୩ ମାର୍ଚ୍ଚ ମାସରେ କେନ୍ଦୁଝରରୁ ଲୁହାପଥର ନେଇ ଏକ ଟ୍ରକ ବିଶାଖାପଟ୍ଟନାମକୁ ଯାଇଥିଲା। ସେଠାରୁ ତ୍ରିବେଣୀ ଟ୍ରାନ୍ସପୋର୍ଟର କୋଇଲା ଧରି ଏହି ଟ୍ରକ ଅନୁଗୋଳର ଗଣେଶ ସ୍ପଞ୍ଜ କାରଖାନାକୁ ଫେରୁଥିଲା। କେନ୍ଦୁଝର ଆସିବା ପରେ ଡ୍ରାଇଭର ଓ ହେଲପର ଗାଡି ମାଲିକଙ୍କୁ ଭଡ଼ା ହସ୍ତାନ୍ତର କରି କୋଇଲା ଧରି ଅନୁଗୋଳ ଯାଉଛି ବୋଲି କହି ଯାଇଥିଲେ। କିଛି ଦିନ ପରେ କୋଇଲା ନ ପହଞ୍ଚିବାରୁ ଏନେଇ ଖୋଳତାଡ଼ କରାଯିବାରୁ ଏହାକୁ ବାଲେଶ୍ୱରରେ ବିକ୍ରି କରାଯାଇଥିବା ପୋଲିସ ଜାଣିବାକୁ ପାଇଥିଲା। ଗାଡ଼ି ମାଲିକଙ୍କ ଏତାଲା ଭିତ୍ତିରେ ପୋଲିସ ମକଦ୍ଦମା ରୁଜୁ କରି ୪ଜଣଙ୍କୁ ଗିରଫ କରିଥିଲା।
