ବଇଣ୍ଡା,୧୩ା୬(ଡି.ଏନ.ଏ.) ଅନୁଗୋଳ ଜିଲା କିଶୋରନଗର ବ୍ଲକ ହଣ୍ଡପା ପଞ୍ଚାୟତ ଗୁଣ୍ଡୁରୀମୁଣ୍ଡା ନିକଟରେ ନିର୍ମାଣ ହୋଇଥିବା କୋଇଲା ଡିପୋକୁ ଗୁଣ୍ଡୁରୀମୁଣ୍ଡା ସମେତ ୫ଟି ଗ୍ରାମବାସୀ ବିରୋଧ କରିଛନ୍ତି। ଶୁକ୍ରବାର ଉକ୍ତ ଡିପୋରେ କୋଇଲା ଅନ୍ଲୋଡ୍ ବେଳେ ଉତ୍ତେଜନା ଦେଖାଦେଇଛି। ଗ୍ରାମବାସୀ ରାସ୍ତା ଅବରୋଧ କରିବାରୁ ଡିପୋକୁ ଆସିଥିବା ୫ରୁ ଅଧିକ ଟ୍ରକ୍ ଠିଆ ହୋଇ ରହିଛି।
ଗ୍ରାମବାସୀଙ୍କ କହିବା ଅନୁଯାୟୀ, ଏକ ଘରୋଇ ସଂସ୍ଥା ପକ୍ଷରୁ ଗୁଣ୍ଡୁରୀମୁଣ୍ଡା ନିକଟରେ କୋଇଲା ଡିପୋ କରାଯାଇଛି। ଏଠାକୁ ତାଳଚେର, ଛେଣ୍ଡିପଦା ଅଞ୍ଚଳରୁ ଟ୍ରକ୍ରେ କୋଇଲା ଅଣାଯାଇ ଟ୍ରେନ୍ ଯୋଗେ ରାଜ୍ୟ ଓ ବାହାରକୁ ପଠାଯିବ। ଏଥିଯୋଗୁ ଗୁଣ୍ଡୁରୀମୁଣ୍ଡା ସହ ଅର୍ଜୁନଧରା, ପାପସରା, ହଣ୍ଡପା, ବିଲେଇନାଳୀ, ବଇଶିଣା ଆଦି ଗ୍ରାମରେ ପ୍ରଦୂଷଣ ସମସ୍ୟା ସୃଷ୍ଟି ହେବାର ଆଶଙ୍କା ରହିଛି। କୋଇଲା ଗୁଣ୍ଡ ଉଡ଼ି ଗ୍ରାମର ଅନେକ ଘର ବାହାରେ କଳା ଆସ୍ତରଣ ପଡ଼ିଗଲାଣି। ଡିପୋ ନିର୍ମାଣ ନ କରିବାକୁ ପୂର୍ବରୁ ଗ୍ରାମବାସୀ ପ୍ରଶାସନକୁ ଅନୁରୋଧ କରିଥିଲେ ହେଁ ପଦକ୍ଷେପ ନିଆଯାଇ ନାହିଁ। ଫଳରେ ଗ୍ରାମ ରାସ୍ତାରେ କୋଇଲା ବୋଝେଇ ଟ୍ରକ୍ ଡିପୋକୁ ନିଆଯାଉଛି। ଶୁକ୍ରବାର ଭୋର୍ ସମୟରେ ୫ରୁ ଅଧିକ ଟ୍ରକ୍ ଡିପୋକୁ ଆସିଥିବା ଖବରପାଇ ଗ୍ରାମବାସୀ ବିରୋଧ କରିଥିଲେ। ଗ୍ରାମ ରାସ୍ତାରେ ଭାରିଯାନ ଚଳାଚଳ ନ କରିବା ଦାବିରେ ସେମାନେ ରାସ୍ତା ଅବରୋଧ କରିଥିଲେ।
