ଅନୁଗୋଳ ଅଫିସ, ୧୩।୬- ଅନୁଗୋଳ ସହରର ବିଭିନ୍ନ କୋଚିଂ ସେଣ୍ଟରଗୁଡ଼ିକରେ ବୁଧବାର ଅଗ୍ନିଶମ ଅଧିକାରୀମାନେ ସଦଳବଳ ପହଞ୍ଚତ୍ ଅଗ୍ନି ନିରାପତ୍ତା ବ୍ୟବସ୍ଥାର ଯାଞ୍ଚ କରିଛନ୍ତି। ଅନୁଗୋଳର ୬ଟି ଓ ନାଲ୍କୋରେ ୨ଟି କୋଚିଂ ସେଣ୍ଟରରେ ୮ଟି ଟିମ୍ ସକାଳେ ପହଞ୍ଚତ୍ଥିଲେ। ଅଗ୍ନି ନିରାପତ୍ତା ବ୍ୟବସ୍ଥାର ଯାଞ୍ଚ ପରେ ଅଗ୍ନିକାଣ୍ଡର କାରଣ ଓ ଏଥିରୁ ସୁରକ୍ଷିତ ଭାବେ ବର୍ତ୍ତିବା ଦିଗରେ ଛାତ୍ରୀଛାତ୍ର ଓ କୋଚିଂ ସେଣ୍ଟର ମାଲିକଙ୍କୁ ସଚେତନ କରାଇଥିଲେ। ସହରର ପ୍ରାୟ ୧୫ଟି କୋଚିଂ ସେଣ୍ଟରରେ ଏହି ବ୍ୟବସ୍ଥା ନ ଥିବାରୁ ଏହାର ମାଲିକଙ୍କୁ ନୋଟିସ୍ ଜାରି କରାଯାଇଥିବା ଜଣାପଡିଛି। ଏଥିସହ ଅଗ୍ନିନିରାପତ୍ତା ବ୍ୟବସ୍ଥା କରିବା ପାଇଁ ସ୍ଥାନୀୟ ଅଗ୍ନିଶମ କେନ୍ଦ୍ରରେ ଆବେଦନ କରିବାକୁ ଅଧିକାରୀମାନେ ପରାମର୍ଶ ଦେଇଛନ୍ତି।
ନିକଟରେ ଗୁଜରାଟର ସୁରଟସ୍ଥିତ କୋଚିଂ ସେଣ୍ଟରରେ ଭୟାବହ ଅଗ୍ନିକାଣ୍ଡ ଘଟିବା ପରେ ଓଡ଼ିଶା ଅଗ୍ନିଶମ ବିଭାଗରେ ତତ୍ପରତା ପ୍ରକାଶ ପାଇଛି। ସହରରେ ଥିବା କୋଚିଂ ସେଣ୍ଟରରେ ଚଢ଼ାଉ ପରେ ଅନ୍ୟାନ୍ୟ ଶିକ୍ଷାନୁଷ୍ଠାନ ସହ ଏବଂ ଆବାସିକ ପ୍ରତିଷ୍ଠାନଗୁଡିକରେ ମଧ୍ୟ ଚଢ଼ାଉ ହୋଇଥିଲା। ଅଗ୍ନିକାଣ୍ଡ ସମୟରେ ଭୟଭୀତ ନ ହୋଇ କିପରି ନିଜେ ସୁରକ୍ଷିତ ଭାବେ ମୁକୁଳିବା ସହ ଅନ୍ୟକୁ ସହଯୋଗ କରିହେବ ସେ ବାବଦରେ ବିଭିନ୍ନ କୌଶଳ ବିଭାଗୀୟ କର୍ମଚାରୀମାନେ ପ୍ରଦର୍ଶନ କରିଥିଲେ। ସେହିପରି ଛାତ୍ରୀଛାତ୍ରଙ୍କୁ ବିଭିନ୍ନ ପ୍ରକାର ତାଲିମ୍ ପ୍ରଦାନ କରାଯାଇଥିବା ଅନୁଗୋଳ ସର୍କଲ ଡେପୁଟି ଅଗ୍ନିଶମ ଅଧିକାରୀ ଚକ୍ରମୋହନ ରାଉତରାୟ ସୂଚନା ପ୍ରଦାନ କରିଛନ୍ତି। ଏଥିସହ କୋଚିଂ ସେଣ୍ଟରରେ କୌଣସି ବଡ଼ ଅଘଟଣ ଘଟିଲେ ଡାକବାଜି ଯନ୍ତ୍ର ସାହାଯ୍ୟରେ ଘୋଷଣା କରିବାକୁ ବ୍ୟବସ୍ଥା ଅଛି କି ନାହିଁ ତାହାର ମଧ୍ୟ ଯାଞ୍ଚ କରାଯାଇଥିଲା। ଅଗ୍ନି ନିରାପତ୍ତା ପାଇଁ ଆବେଦନ କରିବା ପରେ ବିଭାଗ ପକ୍ଷରୁ ସମ୍ପୃକ୍ତ କୋଚିଂ ସେଣ୍ଟରକୁ ପ୍ରମାଣପତ୍ର ପ୍ରଦାନ କରାଯିବ ବୋଲି ସୂଚନା ଦିଆଯାଇଛି। ଏହା ନ କଲେ ସମ୍ପୃକ୍ତ କୋଚିଂ ସେଣ୍ଟର ତଥା ଘର ମାଲିକଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ରାଉତରାୟ କହିଛନ୍ତି।