ଧାମନଗର, ୨୧।୧୦ (ଡି.ଏନ.ଏ.)- ଭଦ୍ରକ ଜିଲା ଧାମନଗର ବ୍ଲକ ପଧାନୀ ପଞ୍ଚାୟତର ଉପର ଶଇଲୋ ନିକଟ କୋଚିଳା ନଦୀବନ୍ଧରେ ଫାଟ ସୃଷ୍ଟି ହୋଇଛି। ଏହାକୁ ନେଇ ସ୍ଥାନୀୟ ଲୋକେ ଆତଙ୍କିତ ଅବସ୍ଥାରେ ଅଛନ୍ତି। ଶନିବାର ଫାଟ ସୃଷ୍ଟି ହୋଇ ଏହା ବଢ଼ିବାରେ ଲାଗିଛି। ନିମ୍ନମାନର କାର୍ଯ୍ୟ ଯୋଗୁ ଏଭଳି ଫାଟ ହୋଇଥିବା ସ୍ଥାନୀୟ ଲୋକେ ଅଭିଯୋଗ କରିଛନ୍ତି। ସ୍ଥାନୀୟ ବିଧାୟକ ବିଷ୍ଣୁଚରଣ ସେଠୀ, ବିଭାଗୀୟ ସହକାରୀ ଯନ୍ତ୍ରୀ ଭୁବନାନନ୍ଦ ମହାନ୍ତି, କନିଷ୍ଠ ଯନ୍ତ୍ରୀ କିଶୋର ଦାସ ଏବଂ ପ୍ରଦୀପ ଦାସ ଘଟଣାସ୍ଥଳ ବୁଲି ଦେଖିବା ସହିତ ତୁରନ୍ତ ମରାମତି ପାଇଁ ଉଦ୍ୟମ ଜାରି ରଖିଛନ୍ତି। ପ୍ରକାଶ ଯେ, ନଦୀବନ୍ଧର ଉକ୍ତ ସ୍ଥାନରେ କ୍ରମାଗତ ଭାବେ ୪ ବର୍ଷ ଧରି ଫାଟ ସୃଷ୍ଟି ହେଉଛି। ସେହିପରି ବିଭିନ୍ନ ସ୍ଥାନରେ ନଦୀବନ୍ଧ ଧସୁଛି। ଏବେ ଫାଟ ହୋଇଥିବା ସ୍ଥାନରେ ନଦୀଗର୍ଭକୁ ପଥରପ୍ୟାକିଂ ହୋଇଥିବାବେଳେ ଦକ୍ଷିଣ ଦିଗକୁ ୱାଲ ମଧ୍ୟ କରାଯାଇଛି। ପୂର୍ବବର୍ଷ ଧସିଥିବା ସ୍ଥାନରେ ମରାମତି କାର୍ଯ୍ୟ ହୋଇଥିଲେ ମଧ୍ୟ ପୁଣି ଚଳିତବର୍ଷ ସେହି ସ୍ଥାନରେ ଫାଟ ନେଇ ସ୍ଥାନୀୟ ଲୋକେ ଆତଙ୍କିତ ହୋଇପଡ଼ିଛନ୍ତି। ବିଭାଗର କାର୍ଯ୍ୟକୁ ନେଇ ପ୍ରଶ୍ନବାଚୀ ସୃଷ୍ଟି ହୋଇଛି। ବାରମ୍ବାର ନଦୀବନ୍ଧ ଧସୁଥିବାରୁ ଅସନ୍ତୋଷ ପ୍ରକାଶ ପାଇଛି।